Sirac 1
1
Pasiuna#Ang basahon nga Sirac gisulat sa Hebreo apan gihubad kini sa tagsulat niining maong pasiuna ngadto sa Grego.
Ang Balaod, ang mga Propeta ug ang ulahi nga mga magsusulat nagbilin kanato ug usa ka bahandi sa bililhon nga mga pagtulon-an, ug angay nga daygon nato ang Israel tungod sa pahimangno ug kaalam nga ilang gihatag. Apan dili igo nga ang mga tawo nga nagbasa niini makakab-ot ug kahibalo alang sa ilang kaugalingon. Bisan kinsa nga nagmahal sa kahibalo kinahanglan nga makatabang sa uban pinaagi sa iya mismo nga gisulti ug gisulat. Mao kini hinungdan nga ang akong apohan nga si Jesus nagkugi sa pagbasa sa Balaod ug sa mga Propeta ug sa uban nga mga basahon sa atong mga katigulangan. Human siya mahimong batid niini, nadasig siya sa pagsulat ug usa ka basahon aron maambitan sa uban ang iyang kaalam ug kahibalo, aron bisan kinsa nga makaambit sa iyang gugma alang sa kahibalo makagamit usab sa maong basahon ug labi pa siyang makahimo pagkinabuhi subay sa Balaod.
Busa awhagon ko kamo sa pagbasa pag-ayo niining basahona ug sa inablihan nga hunahuna. Ug palihog pagbaton ug pailob niadtong mga dapit diin bisan pa sa tanan nakong makugihon nga paningkamot, wala tingali ako makahubad pag-ayo sa pipila ka mga pulong. Ang gisulat sa sinugdan diha sa Hebreo dili kanunay may samang takdo nga kahulogan inighubad na niini ngadto sa laing pinulongan. Tinuod kini dili lamang niining basahona kondili bisan mahitungod sa Balaod mismo, sa mga Propeta ug sa ubang mga basahon. Ang mga hubad malain gayod ug diyutay kay sa tinubdan nga sinultihan.
Miabot ako sa Ehipto sa ika-38 nga tuig sa paghari ni Hari Evergetes ug mipuyo ako didto sa igo-igong panahon. Samtang didto ako, nakabaton akog higayon sa pagtuon pag-ayo ug gibati ko nga kinahanglang hubaron ang maong basahon. Gipaninguha ko nga magamit ang tanan kong kakugi ug kahibalo aron paghingpit niini ug aron nga magamit kini sa tanang nagpuyo sa kayutaan nga langyaw nga buot makakat-on ug nga may igong kalig-on sa kinaiya ug sa pagkinabuhi subay sa Balaod ni Moises.
Pagdayeg sa Kaalam
1Ang#Pan. 2:6. tanang kaalam naggikan sa Ginoo,
ug ang Kaalam anaa kaniya hangtod sa kahangtoran.
2Kinsay makaihap sa mga tulo sa ulan
o sa balas diha sa kabaybayonan?
Kinsay makaihap sa mga adlaw sa eternidad?
3Unsa ba kahabog ang kapanganoran?
Unsa kalapad ang kalibotan?
Unsa ba kalalom ang lawod?
Unsa ka dili matugkad ang Kaalam?
May makahatag bag mga tubag niining mga pangutanaha?
4Ang Kaalam unang gibuhat kay sa bisan unsang butang;
ang salabotan sa kanunay diha na.#1:4 Ang ubang sinulat nagdugang ug bersikulo 5: Ang tinubdan sa kaalam mao ang Pulong sa Dios sa kahitas-an; ang iyang mga paagi mga kasugoan nga walay kataposan.
6May gipakitaan na ba kon diin magsugod ang Kaalam?
May nakasabot ba sa iyang talagsaong paagi?#1:6 Ang ubang sinulat nagdugang ug bersikulo 7: Kinsa may gipahayagan sa kahibalo sa Kaalam? Kinsay nakasabot sa iyang dakong kasinatian?
8Usa lamang siya nga maalamon,
ug kinahanglang mobarog kita sa kataha atubangan sa iyang trono.
9Ang#Pan. 8:22-31; Sir. 24:9. Ginoo mismo maoy nagbuhat sa Kaalam;
nakakita siya sa Kaalam ug giila ang iyang bili;
busa gipuno niya sa Kaalam ang tanan nga iyang gibuhat.
10Gihatagan niya ug pipila ka bahin sa Kaalam ang tagsatagsa,
apan gibubo niya kini ngadto kanila nga nahigugma kaniya.
11Kon mahadlokon ikaw sa Ginoo,
maimo ang dungog ug garbo;
purongpurongan ka sa kalipay ug kamaya.
12Ang pagpasidungog sa Ginoo maoy usa ka kinasingkasing nga kalipay;
maghatag kini kanimo ug usa ka hataas ug malipayon nga kinabuhi,
13ug sa kataposan sa imong mga adlaw,
ang tanan mahimong maayo alang kanimo.
Ang Dios magpanalangin kanimo sa adlaw sa imong kamatayon.
14Ang pagkahadlok sa Ginoo maoy unang lakang ngadto sa Kaalam.
Ang Kaalam gihatag ngadto sa mga matinumanon
diha sa mga tagoangkan sa ilang mga inahan.
15Nagpuyo ang Kaalam uban kanato sukad pa sa karaang panahon,
ug ang mga kaliwat nga umaabot mosalig kaniya.
16Ang pagkahadlok sa Ginoo maoy Kaalam diha sa kinahingpitan;
motagbaw siya kanato sa hingpit pinaagi sa iyang mga gasa,
17ug#Klm. Sol. 7:11. magpuno sa atong mga panimalay ug sa atong mga kamalig
sa tanan nga gipangandoy sa atong mga kasingkasing.
18Ang pagkahadlok sa Ginoo mao ang bulak sa Kaalam
nga mobuklad uban sa kalinaw ug sa maayong panglawas.#1:18 Ang ubang sinulat nagdugang niini: Nakita niya ang Kaalam ug giila niya ang bili niini.
19Ang Ginoo nagpaulan ug kaalam ug pagpanabot,
ug magdugang sa dungog kanila nga modawat sa Kaalam.
20Ang#Pan. 3:16; 4:10. pagkahadlok sa Ginoo mao ang gamot sa Kaalam;
ang iyang mga sanga mao ang hataas nga kinabuhi.#1:20 Ang ubang sinulat nagdugang ug bersikulo 21: Ang pagpasidungog sa Ginoo magkuha sa sala; diin anaa ang kahadlok sa Ginoo, mahanaw ang kasuko.
Ang Pagpugong sa Kaugalingon
22Ang kasuko nga dili makatarunganon dili gayod maayo kay magdala kini kanimo ngadto sa imong kapakyasan. 23Pagpailob ug pagpaabot sa hustong panahon ug unya moabot kanimo ang kalipay. 24Pagpakahilom hangtod sa husto nga panahon sa pagsulti ug makabaton ikaw ug dungog sa pagkamaalamon.
Ang Kaalam ug Pagtahod sa Dios
25Ang bahandi sa Kaalam mao ang mga makinaadmanon nga panultihon apan ang mga makasasala walay laing buhat gawas sa pagpangyam-id sa mga butang nga diosnon. 26Kon buot ikaw nga mahimong maalamon, tumana ang mga sugo sa Ginoo ug hatagan ikaw niya ug kaalam. 27Ang pagkahadlok sa Ginoo maoy kaalam ug usa ka edukasyon na mismo. Mahimuot siya diha sa pagkamatinumanon ug pagkamapaubsanon. 28Padayon sa pagbaton ug kahadlok sa Ginoo ug himoa kini sa tibuok nimong kasingkasing. 29Pagmatngon mahitungod sa imong isulti ug ayaw pagpakaaron-ingnon. 30Ayaw pagginarboso kay tingali unyag masugamak ka ug maulawan. Ang Ginoo magpadayag sa imong mga tinagoan ug maghimo kanimong ubos atubangan sa tanan didto sa sinagoga tungod kay wala ka moadto didto uban sa pagtahod sa Ginoo kondili sa pagpakaaron-ingnon.
Currently Selected:
Sirac 1: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.