Numeros 34
34
Mga Utlanan sa Canaan
1Miingon ang Ginoo kang Moises, 2“Sultihi ang katawhan sa Israel: Inigsulod ninyo sa Canaan, ang yuta nga akong gihatag kaninyo, 3ang inyong utlanan dapit sa habagatan sa tampi sa Edomea mao ang kamingawan sa Zin sukad sa dagat nga ginganlag Patayng Dagat dapit sa sidlakan. 4Moliko kini paingon sa habagatan ngadto sa bakilid sa Akrabim ug molatas sa Zin ug mosangko kini sa habagatang bahin sa Cades Barnea. Unya magpadayon kini ngadto sa Hasar-Adar hangtod sa Asmon 5ug gikan sa Asmon mopaingon kini sa Sapa sa Ehipto ug mosangko sa Dakong Dagat.#34:5 Dakong Dagat: o Dagat sa Mediteraneo.
6“Sa kasadpan, ang utlanan mao ang Dakong Dagat ug ang mga kabaybayonan niini.
7“Sa amihanan ang utlanan magsukad sa Dakong Dagat ngadto sa Bukid sa Hor. 8Gikan didto mopaingon kini duol sa Hamat ug mosangko kini sa Zedad. 9Unya mopadayon kini sa Seprona ug mosangko sa Hasar-Enan.
10“Sa sidlakan, magsukad ang inyong utlanan sa Haser-Enan hangtod sa Sefam. 11Unya molahos kini ngadto sa Ribla dapit sa sidlakang bahin sa Ain ug molahos pa gayod ngadto sa utlanan sa Lanaw sa Galilea dapit gihapon sa sidlakan. 12Unya molahos kini ngadto sa Jordan ug mosangko sa Patayng Dagat. Mao kini ang inyong yuta ug ang mga utlanan niini.”
13Busa#Num. 26:52-56. #Jos. 14:1-5. giingnan ni Moises ang katawhan sa Israel, “Mao kining yutaa nga inyong panag-iyahon pinaagi sa ripa kay nagbuot ang Ginoo nga ihatag kini ngadto sa siyam ug tunga ka banay. 14Nabahinan na ang matag panimalay sa banay ni Ruben ug sa banay ni Gad ingon man ang katungang banay ni Manases. 15Kining duha ka banay ug tunga nakadawat na sa ilang bahin sa tabok sa Jordan atbang sa Jerico dapit sa sidlakan.”
Ang mga Pangulo nga Gihatagag Katungod Pagbahin sa Yuta
16Giingnan sa Ginoo si Moises, 17“Mao kining mga tawhana ang mobahinbahin kaninyo sa yuta: si Eleazar nga pari ug si Josue nga anak ni Nun. 18Pagkuhag usa ka pangulo sa matag banay aron maoy magbahinbahin sa yuta.” 19-28Mao kini ang mga tawo nga gipili sa Ginoo:
| Banay | Pangulo |
|---|---|
| ni Juda | Caleb nga anak ni Jefone |
| ni Simeon | Shemuel nga anak ni Amihud |
| ni Benjamin | Elidad nga anak ni Ceslon |
| ni Dan | Boci nga anak ni Jogli |
| ni Manases | Haniel nga anak ni Efod |
| ni Efraim | Kemuel nga anak ni Seftan |
| ni Zabulon | Elisafan nga anak ni Parnac |
| ni Isacar | Paltiel nga anak ni Asan |
| ni Aser | Ahihud nga anak ni Selomi |
| ni Neftali | Padahel nga anak ni Amihud |
29Mao kini sila ang gisugo sa Ginoo sa pagbahinbahin sa yuta sa Canaan ngadto sa katawhan sa Israel.
Currently Selected:
Numeros 34: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.
