Numeros 27
27
Ang mga Anak nga Babaye ni Selofehad
1Unya miduol ang mga babayeng anak ni Selofehad nga anak ni Hefer nga anak ni Gilead nga anak ni Makir nga anak ni Manases nga anak ni Jose. Ang mga ngalan sa iyang mga anak nga babaye mao si Maala, si Noa, si Hegla, si Milca ug si Tirza. 2Ug mibarog sila atubangan ni Moises ug sa katilingban didto sa pultahan sa Tolda nga Tagboanan ug miingon sila, 3“Namatay ang among amahan didto sa kamingawan apan dili siya usa niadtong mga tawo nga nakig-abin kang Korah pagsukol sa Ginoo. Namatay siya tungod sa iyang sala ug wala siyay anak nga lalaki. 4Nganong papason man ang ngalan sa among amahan gikan sa laray sa iyang banay tungod lang kay wala siyay anak nga lalaki? Bahini kami sa kabilin sa among amahan sama sa nadawat sa among mga kadugo.”
5Gidala ni Moises ngadto sa Ginoo ang ilang problema. 6Ug giingnan sa Ginoo si Moises, 7“May#Num. 36:2. katarongan ang mga anak nga babaye ni Selofehad. Hatagi silag bahin sa kabilin sa ilang amahan. 8Ug ingna ang katawhan sa Israel, ‘Kon mamatay ang usa ka tawo nga walay anak nga lalaki, kinahanglan nga ang iyang kabilin ihatag ngadto sa iyang mga anak nga babaye. 9Ug kon wala siyay anak nga babaye, ihatag ang iyang kabilin ngadto sa iyang mga igsoong lalaki. 10Ug kon wala siyay mga igsoong lalaki, maoy pasunda sa iyang kabilin ang mga igsoong lalaki sa iyang amahan. 11Ug kon ang iyang amahan walay mga igsoong lalaki, maoy pasunda sa kabilin ang iyang labing suod nga paryenti. Mao kini ang tulomanon ug lagda nga gihatag sa Ginoo kang Moises alang sa katawhan sa Israel.’”
Si Josue Maoy Mopuli kang Moises
(Deut. 31:1-8)
12Giingnan#Deut. 3:23-27; 32:48-52. sa Ginoo si Moises, “Tungas niining Bukid sa Abarim ug tan-awa gikan didto ang yuta nga gihatag ko sa katawhan sa Israel. 13Ug tapos mo kini makita, mamatay ka sama sa imong igsoon nga si Aaron 14kay gisupak man ninyo ang akong mando didto sa kamingawan sa Zin. Sa dihang nagkaguliyang ang katawhan didto sa Meriba, wala nimo ilha ang akong balaang gahom didto sa ilang atubangan.” (Kini mao ang mga tubig sa Meriba sa Cades didto sa kamingawan sa Sin.)
15Nag-ampo si Moises, 16“O Ginoo nga Dios, tinubdan sa tanang kinabuhi, nag-ampo ako nga magtudlo ka ug tawo nga makapangulo sa katawhan 17ug#1 Hari 22:17; Ezeq. 34:5; Mat. 9:36; Mar. 6:34. makamando kanila#27:17 makamando kanila: o makamando kanila sa panggubatan. aron ang imong katawhan dili mahisama sa mga karnero nga walay magbalantay.”
18Ug#Exo. 24:13. miingon ang Ginoo kang Moises, “Ipatawag si Josue, ang anak ni Nun, ang tawo nga gigamhan sa espiritu ug itapion kaniya ang imong kamot. 19Patindoga siya atubangan ni Eleazar, ang pari, ug sa katawhan ug itugyan kang Josue ang katungdanan diha sa atubangan nila. 20Hatagi siyag awtoridad aron ang katawhan sa Israel motahod kaniya. 21Ug#Exo. 28:30; 1 Sam. 14:41; 28:6. motindog siya sa atubangan ni Eleazar nga pari nga maoy magpakisayod sa Ginoo alang kaniya unsa ang iyang hukom pinaagi sa Urim ug Tumim. Motuman sila bisan unsay iyang imando.” 22Ug gibuhat ni Moises ang gisugo kaniya sa Ginoo. Gipatawag niya si Josue ug gipatindog niya atubangan ni Eleazar nga pari ug sa atubangan sa katawhan. 23Ug#Deut. 31:23. gitapion ni Moises kang Josue ang iyang kamot ug gitugyanan siya ni Moises sa buluhaton sumala sa gisugo kaniya sa Ginoo.
Currently Selected:
Numeros 27: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.
