Ester (Grego) 2
2
Si Ester Nahimong Rayna
1Unya nabugnaw ra ang kasuko sa hari. Bisan tuod wala na siya maghisgot kang Vasti, nagpadayon siyag hunahuna mahitungod sa iyang pagsilot kaniya. 2Busa pipila sa mga magtatambag sa hari misugyot sa pag-ingon, “Nganong dili ka man mangita ug pipila ka matahom nga mga batan-ong babaye nga maayog batasan? 3Makatudlo ka ug mga opisyal sa matag probinsiya sa emperyo ug sugoon mo sila sa pagdala sa tanang maanyag nga batan-ong mga ulay nganhi sa imong harem dinhi sa Susa. Ibutang sila ubos sa pagdumala ni Hegai, ang yunuko nga tigdumala sa imong mga babaye ug pahatagan mo sila ug bisan unsa nga ilang gikinahanglan sa pagpaguwapa. 4Unya pilion mo ang babaye nga imo gayong magustohan ug himoa siya nga rayna puli kang Vasti.”
Nakaangay ang hari sa maong tambag busa iya kining gisunod.
5Didto sa Susa may nagpuyo nga usa ka Judio nga ginganlag Mardoqueo nga anak ni Jair. Sakop siya sa banay ni Benjamin ug kaliwat ni Kis ug ni Simei. 6Siya#2 Hari 24:10-16; 2 Cron. 36:10. usa sa mga bihag gikan sa Jerusalem nga gidala ni Hari Nabucodonosor sa Babilonia. 7Si Mardoqueo mao ang nagbantay kang Ester, ang anak nga babaye sa iyang uyoan nga si Aminadab. Usa siya ka maanyag nga dalaga ug sa pagkamatay sa iyang mga ginikanan, si Mardoqueo mao ang nag-alima kaniya hangtod nga midako na siya.
8Sa pagpakanaog sa hari sa iyang bag-ong kasugoan, daghang mga dalaga ang gidala ngadto sa Susa ug si Ester usa kanila. Gibutang usab siya didto sa palasyo sa hari ubos sa pagbantay ni Hegai nga maoy tig-atiman sa harem. 9Si Hegai nakagusto kang Ester ug pinangga niya kini. Wala siya maglangan sa paghatag kaniya sa mga patahom pinaagi sa mga masahe ug linain nga pagkaon. Nagtudlo siya ug pito ka dalaga nga gilain gayod pagpili gikan sa palasyo sa hari aron mag-alagad kang Ester ug giayo niya pagtratar si Ester ug ang iyang mga sulugoon.
10Tungod sa tambag ni Mardoqueo wala itug-an ni Ester nga siya usa ka Judio. 11Matag adlaw, magpasopaso si Mardoqueo atubangan sa patyo sa harem, magbantay unsa ang mahitabo kang Ester.
12Ang naandang pagpatahom alang sa batan-ong mga dalaga milungtad ug usa ka tuig: ang mga masahe sa lana sa mira moabot sa unom ka bulan ug ang mga panghidhid sa pagpatahom sulod sa dugang nga unom ka bulan. 13Human niana, ang matag dalaga gitugyan ngadto sa usa ka tawo nga gitudlo aron magdala kaniya gikan sa harem ngadto sa palasyo ug dad-on siya ngadto sa hari. 14Moadto siya didto sa sayo sa gabii ug sa pagkabuntag dad-on siya ngadto sa laing harem ug ubos sa pagbantay ni Hegai,#2:14 Hegai: o Saasgaz. ang yunuko nga tig-atiman kanila. Dili na siya moadto sa hari pag-usab gawas kon ipatawag siya sa hari pinaagi sa paghingalan gayod kaniya.
15Unya miabot ang panahon alang kang Ester, ang anak ni Aminadab nga uyoan ni Mardoqueo, sa pag-adto sa hari. Gihimo niya ang tanan nga gitambag kaniya ni Hegai ug gidayeg siya sa tanan nga nakakita kaniya. 16Busa sa ikapito nga tuig sa paghari ni Ahasuero, sa ika-12 nga bulan nga mao ang bulan sa Adar, gidala si Ester ngadto sa hari. 17Nahigugma siya kang Ester nga nakapahimuot kaniya labaw sa uban ug gibutang niya ang korona sa pagkarayna sa ulo ni Ester. 18Unya ang hari nagkombira sulod sa usa ka semana alang sa tanan niyang magtatambag ug mga administrador aron pagsaulog sa iyang kaminyoon kang Ester. Ug gipakubsan niya ang mga buhis sa tibuok emperyo.
Giluwas ni Mardoqueo ang Kinabuhi sa Hari
19Niining tungora si Mardoqueo gitudlo ngadto sa usa ka taas nga katungdanan. 20Sa laing bahin wala pa gayod si Ester magpahibalo nga siya Judio. Giingnan siya ni Mardoqueo nga dili kini itug-an kang bisan kinsa ug iya kining gituman sama sa iyang pagtuman kaniya sa gamay pa siyang bata ubos sa pagbantay ni Mardoqueo. Nagpadayon si Ester sa pagsimba sa Dios ug sa pagtuman sa mga sugo sa Dios ug wala gayod siya mobiya sa batasan sa pagka-Judio.
21Sa pagpauswag sa hari kang Mardoqueo ngadto sa usa ka mas taas nga katungdanan, ang duha ka yunuko sa palasyo nga mga opisyal sa guwardiya sa hari nangasuko ug naglaraw sa pagpatay sa hari. 22Nasayod niini si Mardoqueo ug gisuginlan niya si Rayna Ester ug gisuginlan usab ni Ester ang hari sa ginagmayng bahin sa maong laraw. 23Gipasukitsukit sa hari ang duha ka tawo ug gibitay sila. Aron pagpasidungog kang Mardoqueo, nagsugo ang hari nga isulat kining maong hitabo sa mga talaan sa hari aron hinumdoman ang iyang bililhong pag-alagad.
Currently Selected:
Ester (Grego) 2: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.