Si Bel ug ang Dragon 1
1
Si Daniel ug ang mga Pari ni Bel
1Human sa kamatayon ni Hari Astiages, mipuli kaniya paghari si Ciro sa Persia. 2Si Daniel usa sa mga suod nga kauban ni Hari Ciro ug ang hari nagmahal pag-ayo kang Daniel labaw kay kang bisan kinsa sa uban niyang mga magtatambag.
3Ang#Is. 46:1; Jer. 51:44. mga taga-Babilonia adunay usa ka diosdios nga ginganlag Bel. Matag adlaw ang mga tawo kinahanglan nga magsangkap kang Bel ug usa ka halad nga 12 ka bakid sa labing maayo nga harina, 40 ka karnero ug 50 ka galon nga bino. 4Si Hari Ciro nagtuo nga si Bel usa ka dios ug matag adlaw naanad siya pag-adto ug pagsimba niini. Apan si Daniel nagsimba sa iyang kaugalingong Dios.
5Usa ka adlaw niana ang hari nangutana kang Daniel, “Nganong wala man ikaw magsimba kang Bel?”
Mitubag si Daniel, “Dili ako mosimba sa mga diosdios nga hinimo sa mga kamot sa mga tawo. Ang akong gisimba mao lamang ang buhi nga Dios nga nagbuhat sa langit ug sa yuta ug mao ang Ginoo sa tanang mga tawo.”
6“Ug wala ba ikaw motuo nga ang among dios nga si Bel tinuod gayod nga buhi?” nangutana ang hari. “Wala ba ikaw makakita unsa kadaghan ang gikaon ug giinom niya matag adlaw?”
7Mikatawa si Daniel ug miingon, “Ayawg patunto, Kamahalan. Kining dios nga imong ginganlag Bel lapok lamang nga giputos ug bronsi. Dili gayod kini makakaon o makainom bisag unsa.”
8-10Niining tungora ang hari nasuko pag-ayo ug gitawag niya ang tanang 70 ka pari ni Bel. Gisultihan niya sila, “Pasidan-an ko kamo nga pahamtangan ko kamo sa kamatayon gawas kon makapakita kamo kanako nga si Bel gayod mao ang nagkaon sa mga halad. Kon mapamatud-an ninyo nga ang nagkaon mao gayod si Bel, pahamtangan ko sa kamatayon si Daniel tungod kay nagsulti man siya nga si Bel dili dios.”
Si Daniel miuyon niining sugyota.
11Unya silang tanan uban sa hari nangadto sa templo ni Bel diin ang mga pari misulti ngadto sa hari, “Kamahalan, manggawas kami ug ikaw maoy magpahimutang sa mga pagkaon diha sa lamisa ug ikaw maoy mag-andam sa bino. Sa imong paggawas mahimo nga yawihan nimo ang pultahan ug butangan nimo sa silyo nga harianon. 12Sa pagkabuntag inigbalik nimo, kon makaplagan nimo nga si Bel wala mokaon sa tanan, mahimo nga pahamtangan nimo kami sa kamatayon. Apan kon gikaon niya, si Daniel patyon tungod sa pasangil batok kanamo.”
13Ang mga pari wala mabalaka tungod kay naghimo man sila ug usa ka tinago nga agianan ubos sa usa ka lamisa didto sa templo aron makaadto sila matag gabii ug makakaon sa mga halad.
14Sa pagbiya na sa mga pari, ang hari mipahimutang sa mga pagkaon alang kang Bel. Unya gisugo ni Daniel ang iyang mga sulugoon sa pagdala ug mga abo ug gikatag nila kini sa tibuok salog sa templo. Walay nakakita kanila nga naghimo niini gawas sa hari. Human niana nanggawas silang tanan. Giyawehan nila ang pultahan ug gisilyohan sa silyo sa hari ug nanglakaw sila.
15Niadtong gabhiona sama sa naandan, ang mga pari uban sa ilang mga asawa ug mga anak miadto sa templo agi sa tinago nga agianan ug mikaon sa tanan nga pagkaon ug miinom sa tanan nga bino.
16Sayo sa pagkasunod buntag, ang hari ug si Daniel miadto sa templo. 17Ang hari nangutana, “Nabungkag ba ang silyo, Daniel?”
“Wala, Kamahalan, wala kini maguba,” mitubag si Daniel.
18Sa pagkaabli na sa pultahan, ang hari nakakita sa basiyo nga lamisa ug misinggit siya, “Gamhanan ka gayod, O Bel! Tinuod gayod nga ikaw usa ka dios.”
19Apan si Daniel mikatawa ug misulti ngadto sa hari, “Sa dili ka pa mosulod sa templo, tan-awa ang salog ug tug-ani ako kang kinsang mga tunob ang nakita nimo.”
20Miingon ang hari “Uy, mga tunob man kini sa mga lalaki, mga babaye ug mga bata!” 21Napungot siya pag-ayo ug gipadakop niya ang mga pari ug ang ilang mga banay aron dad-on sa iyang atubangan. Napugos sila sa pagtug-an ngadto sa hari sa mga sikretong agianan ug ganghaan nga maoy agian nila matag gabii aron pagkaon sa mga gibutang didto sa lamisa. 22Busa mimando ang hari nga patyon ang mga pari ug gihatag niya si Bel ngadto kang Daniel ug giguba ni Daniel ang maong diosdios ug ang templo niini.
Gipatay ni Daniel ang Dragon
23May usa usab ka dakong dragon nga gisimba sa mga taga-Babilonia. 24Usa ka adlaw niana, ang hari misulti kang Daniel, “Ayaw akog ingna nga kining maong dios dili buhi. Busa simbaha siya!”
25Mitubag si Daniel, “Nagsimba ako sa Ginoo. Siya lamang ang buhi nga Dios. 26Ug kon imong itugot kanako, Kamahalan, patyon ko kining imong dragon sa walay paggamit ug espada o bunal.”
Mitubag ang hari, “Gitugotan ko ikaw.”
27Busa mikuha si Daniel ug mga alkitran, mga sibo, ug mga buhok ug gisagol kining tanan ug gipabukalan. Naghimo siyag mga torta gikan niini ug gipakaon kini sa dragon. Sa nakakaon na ang dragon niini, miburot ang dragon ug mibuto. Miingon si Daniel ngadto sa mga taga-Babilonia, “Mao kana ang butang nga gisimba ninyo!”
28Sa pagkadungog sa mga tawo sa Babilonia sa nahitabo, mihimo sila ug protesta batok sa hari. Misinggit sila, “Ang hari nahimo nang usa ka Judio. Una sa tanan gilaglag niya si Bel ug gipatay ang mga pari ug karon gipatay niya ang atong dragon.” 29Nangadto sila sa hari ug gipangayo nila nga si Daniel itugyan ngadto kanila. Gipasidan-an nila ang hari, “Kon magdumili ka, patyon ikaw namo ug ang imong banay.”
30Sa pagkakita sa hari nga tumanon gayod nila ang ilang gisulti, napugos siya sa pagtugyan kang Daniel ngadto kanila. 31Busa#Dan. 6:16-24. ilang gitambog si Daniel ngadto sa usa ka langub sa mga liyon diin gibiyaan siya didto sulod sa unom ka adlaw. 32Didto sa langub may pito ka liyon nga sa matag adlaw lawgan kini ug duha ka tawo ug duha ka karnero. Apan sulod sa unom ka adlaw wala kini lawgi ug bisan unsa aron pagsiguro nga si Daniel kan-on gayod sa mga liyon.
Giluwas si Daniel gikan sa Langub sa mga Liyon
33Niadtong panahona si propeta Habacuc nga didto sa yuta sa Juda nagluto ug sud-an nga gisagolan ug dinugmok nga pan. Gidala kini niya ngadto sa mga tawo nga nangani didto sa uma. 34Unya usa ka anghel sa Ginoo ang misulti kaniya, “Dad-a kanang pagkaon nga gibitbit nimo ngadto kang Daniel nga atua sa langub sa mga liyon didto sa Babilonia.”
35Si Habacuc mibalibad, “Sir, wala pa ra ba gayod ako makaadto sa Babilonia ug wala ako makatultol hain ang langub sa mga liyon.”
36Busa#Ezeq. 8:3. gigunitan sa anghel ang buhok sa propeta ug gidala siya ngadto sa Babilonia sama sa kusog nga hangin:#1:36 sa kusog nga hangin: o pinaagi sa gahom sa iyang espiritu. Gibutang siya duol sa langub sa mga liyon. 37Si Habacuc misinggit, “Daniel, Daniel! Ang Dios nagpadala kanimo ug pagkaon. Ania, dawata kini.”
38Sa pagkadungog ni Daniel kang Habacuc, nag-ampo siya, “O Dios, nahinumdom ka gayod kanako. Dili ka gayod mobiya kanila nga nahigugma kanimo.” 39Unya mibangon siya ug mikaon sa kan-onon ug ang anghel sa Dios midala sa walay langan kang Habacuc balik sa ila.
40Pito ka adlaw human gitambog si Daniel ngadto sa langub sa mga liyon, ang hari miadto sa langub aron pagbangotan alang kaniya. Sa pag-abot niya didto ug sa pagtan-aw niya sa sulod sa langub, nakita niya si Daniel nga naglingkod. 41Ang hari misinggit, “O Ginoo nga Dios ni Daniel, pagkahalangdon mo. Ikaw lamang ang Dios!” 42Busa gikuha niya si Daniel gikan sa langub ug misugo nga ang mga tawo nga buot mopatay kang Daniel maoy ibalhog didto. Ug sa walay langan gitukob sila sa mga liyon samtang nagtan-aw ang hari.
Currently Selected:
Si Bel ug ang Dragon 1: MBBCEB99
Highlight
Share
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.