2 Macabeo 6
6
Gilutos ang mga Judio tungod sa Ilang Pagtuo
1Wala madugay human niadto mipadala ang hari ug usa ka gulangon nga taga-Atenas#6:1 gulangon nga taga-Atenas: o gulangon nga taga-Antioquia; o tigulang sa Antioquia. aron pagpugos sa mga Judio sa pagbiya sa ilang tinuohan ug sa mga batasan sa ilang mga katigulangan. 2Gisugo usab siya sa pagpasipala sa ilang Templo pinaagi sa paghalad niini ngadto sa dios sa Olimpo nga si Zeus.#6:2 ZEUS: Ang labaw nga dios sa mga Grego ug ang Bukid sa Olimpo gituohan nga mao ang iyang puloy-anan. Gimandoan usab siya nga ang Templo didto sa Bukid sa Gerisim nganlan usab ug “Templo ni Zeus, ang Dios sa mga Dumuduong,” sama sa gipangayo sa mga tawo nga nagpuyo didto.
3Ang pagpanglutos makalilisang ug hapit dili maagwanta. 4Diha gayod sa sulod sa Templo ang mga dili Judio nag-inom ug nagbuhat sa tanang matang sa kahilayan ug nakighilawas sa mga babayeng nagbaligya sa ilang dungog. Nagdala usab sila didto ug mga halad nga supak sa balaod. 5Busa ang altar napuno sa mga halad nga gidili sa balaod sa mga Judio. 6Wala na matamod ang Adlawng Igpapahulay ug ang gitakda nga mga kasaulogan ug bisan gani ang ilang pagka-Judio ila na mang gilimod. 7Matag bulan inigsaulog sa adlaw sa hari, ang mga Judio pugson gayod sa pagpakaon sa mga mananap nga gihalad. Unya sa panahon sa kasaulogan nga gipasidungog kang Dionisio, ang dios sa bino, pugson sila sa pagsul-ob ug mga koronang bagon nga dahonan sa ilang mga ulo ug sa pagkuyog sa ilang mga parada. 8Tungod sa sugyot ni Tolomeo,#6:8 Tolomeo: Sa ubang sinulat, mga tawo sa Tolomais. usa ka balaod ang gipakanaog ngadto sa silingan nga mga siyudad nga Grego nga pugson ang mga Judio sa pagpakaon sa mga halad. 9Gisugo sila sa pagpatay sa tanang mga Judio nga magdumili sa pagtuman sa pagkinabuhi sa paagi nga Grego. Klaro kaayo nga pait gayod ang umaabot nga panahon. 10Pananglitan,#1 Mac. 1:60-61. dihay duha ka babaye nga gidakop tungod kay ilang gipatuli ang ilang mga bata. Gipalakaw sila libot sa siyudad dala ang ilang mga bata nga nagbitay sa ilang dughan unya gitambog sila gikan sa paril sa siyudad. 11Sa#1 Mac. 2:32-38. laing higayon, si Felipe gisuginlan nga may pipila ka mga Judio nga nagtapok didto sa usa ka langub diha sa duol aron sa tago magsaulog sa Adlaw nga Igpapahulay. Gisulong sila ni Felipe ug gisunog silang tanan nga buhi. Tungod sa ilang hilabihang pagtahod sa Adlawng Igpapahulay wala sila makig-away aron pagpanalipod sa ilang kaugalingon.
Ang Ginoo Mosilot ug Maluoy usab
12Nangamuyo ako kaninyo nga dili kamo mawad-an sa inyong kaisog sa dihang mabasa ninyo ang mahitungod niining makalilisang nga mga panghitabo. Isipa nga kining mao nga silot gihimo dili aron sa paglaglag kondili aron sa pagdisiplina sa katawhan sa Dios. 13Ang matuod mao nga ang pagpahamtang dayon ug silot ngadto sa usa ka tawo tungod sa iyang mga sala ug ang dili paghulat sa taas nga panahon maoy usa ka timaan sa kaluoy. 14Ang Ginoo wala magtratar kanato sama sa iyang gibuhat sa uban nga mga nasod. Mapailubon siya nga naghulat hangtod nga ang ilang sala daghan na kaayo una pa niya sila siloti. 15Apan kita iyang silotan dayon aron dili na modaghan pa ang atong mga sala. 16Busa ang Ginoo kanunay nga maluluy-on kanato nga iyang kaugalingong katawhan. Bisan iya kitang gisilotan sa mga katalagman, wala gayod siya mobiya kanato. 17Gihimo ko kining pipila ka mga pahamatngon agi ug pahinumdom. Karon, padayonon ta ang sugilanon.
Si Eleazar Namatay tungod sa Iyang Pagtuo
18May#Lev. 11:7-8; Heb. 11:35. usa ka gulanggulang na ug tinahod kaayo nga magtutudlo sa Balaod nga ginganlan ug Eleazar. Gipugos siya pagpanganga aron pakan-on ug karne sa baboy. 19-20Apan gipalabi niya ang usa ka dungganan nga kamatayon kay sa usa ka kinabuhi sa kaulawan. Busa giluwa niya ang karne ug miadto siya nga mahinangpon sa dapit nga pagasakitan ug gipakita niya unsaon sa usa ka tawo sa pagbaton sa kaisog aron pagdumili sa mga pagkaon nga mahugaw bisan kon kini pagabayran ug kinabuhi. 21-22Ang mga lalaki nga nagdumala sa paghalad mga higala kanhi ni Eleazar sulod sa taas nga panahon. Tungod niining panaghigalaay giingnan nila siya sa tago nga pagdala ug karne nga mahimo niyang kaonon subay sa balaod ug igo lamang siyang magpakaaron-ingnon nga mikaon ug karneng baboy. Niining paagiha dili siya patyon.
23Apan si Eleazar mihimog usa ka hukom nga takos sa iyang ubanon nga buhok ug sa iyang kagulangon. Sa tibuok niyang kinabuhi nagpuyo siya diha sa hingpit nga pagsugot sa mga balaan nga balaod sa Dios busa mitubag siya, “Patya ako, karon dayon. 24Ang maong paglimbong dili angay sa usa ka tawo nga may panuigon sama kanako kay daghan unyang mga batan-on ang maghunahuna nga karon nga 90 na ang akong panuigon, mibiya na hinuon ako sa akong patuo. 25Kon magpakaaron-ingnon ako nga mikaon niining karne aron lamang madugangan ug diyutay ang gitas-on sa akong kinabuhi, kini magdala kanakog kaulawan ug magpahisalaag sa daghang mga batan-on. 26Sa pagkakaron mahimo tingali nga makalikay ako sa inyong pagabuhaton kanako apan mabuhi man ako o mamatay dili ako makalingkawas sa Dios nga Labing Gamhanan sa tanan. 27Kon mamatay ako karon nga maisogon, kini magpakita nga angay ako sa akong taas nga kinabuhi. 28Kini maghatag usab ug usa ka maayong panig-ingnan ngadto sa mga batan-on aron mahimo silang andam ug malipayon sa pagtahan sa ilang kinabuhi alang sa atong balaan ug tinahod nga mga balaod.”
Sa pagkahuman niyag sulti niini miadto#6:28 miadto: Sa ubang sinulat, gidala. siya sa dapit diin siya pagasakiton 29ug ang mga tawo nga nagpakita kaniya ug kaluoy karon mibatok na kaniya tungod kay binuang alang kanila ang iyang gipanulti. 30Sa dihang hapit na siya mamatay tungod sa ilang pagbunal kaniya, nag-agulo siya nga miingon, “Ang Ginoo nagbaton sa tanang balaan nga kahibalo. Nahibalo siya nga makalingkawas unta ako niining makalilisang nga alantuson ug kamatayon apan bisan pa niana, siya nahibalo usab nga malipayon ako nga nag-antos niini tungod kay may kahadlok ako kaniya.”
31Busa namatay si Eleazar. Apan ang iyang maisogon nga kamatayon gihandom ingon nga usa ka mahimayaon nga panig-ingnan dili lamang sa mga batan-on kondili sa tibuok nga nasod usab.
Currently Selected:
2 Macabeo 6: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.