2 Macabeo 4
4
Si Onias Gipasanginlan ni Simon
1Apan si Simon (ang gihisgotan sa unahan nga mao ang nanugilon kang Apolonio mahitungod sa salapi ug nagdalag kagubot ngadto sa nasod) namakak usab mahitungod kang Onias. Miingon siya nga si Onias mao ang hinungdan sa nahitabo kang Eleudoro ug sa mga kalisdanan nga misunod. 2Nangahas siya sa pagpasangil nga si Onias naglaraw batok sa kagamhanan. Apan ang tinuod mao nga si Onias naghatag hinuon ug mga gasa ngadto sa Jerusalem ug nanalipod sa Templo ug naningkamot nga ang tanan natong mga balaod tumanon gayod. 3-4Si Apolonio nga anak ni Menesteo, ang gobernador sa Siria Mayor, nagdasig kang Simon sa tanang daotang mga butang nga iyang gihimo. Nagkagrabi na gayod ang pagsupak ni Simon maoy hinungdan nga ang usa sa iyang sinaligan nga sumusunod mipatay na ug daghan. Si Onias nakaamgo unsa ka peligro ang ilang kahimtang 5busa miadto siya sa hari dili sa tuyo sa pagpamasangil batok sa iyang isigkatagilungsod kondili alang sa kaayohan sa tanan nga mga Judio diha sa ilang kinabuhi nga pribado ug publiko. 6Nakita niya nga kon dili motabang ang hari, wala gayoy kalinaw ug si Simon makapadayon sa iyang binuang.
Si Jason Nagpasiugda sa mga Batasan nga Grego
7Sa#1 Mac. 1:10. dihang namatay si Hari Seleuco, mipauli kaniya si Antioco nga nailhan nga Epifanes. Si Jason, ang igsoon ni Onias, maoy nahimong Pangulong Pari pinaagi sa limbong. 8Miadto siya aron pagpakigkita sa hari ug pagtanyag kaniya ug 12,337 ka kilo nga plata uban ang dugang nga 2,740 ka kilo nga pagabayran unya. 9Si Jason mihalad usab kaniya ug dugang nga 5,140 ka kilo nga plata aron hatagan siya ug awtoridad sa pagtukod ug usa ka estadyum diin ang mga batan-ong lalaki makabansaybansay ug aron makapanglista sa katawhan sa Jerusalem ingon nga mga lungsoranon sa Antioquia.#4:9 Antioquia: o mga tawo sa Jerusalem nga nagpaluyo kang Hari Antioco.
10Ang hari mihatag sa iyang pag-uyon ug sa dihang gihuptan na ni Jason ang katungdanan sa pagka-Pangulong Pari, iya dayon nga gipausab ang pamatasan sa katawhan sa Jerusalem ngadto sa pamatasan sa mga Grego. 11Nagsugod#1 Mac. 8:17. siya pagpapas sa mga kaayohan nga nakab-ot ni Juan alang sa mga Judio gikan sa nangaging mga hari nga taga-Siria. (Si Juan mao ang amahan ni Eupolemo nga maoy gipaadto sa Roma aron paghimog panag-abin ug aron pagtukod sa mga bugkos sa panaghigalaay.) Giwagtang usab ni Jason ang atong mga pamatasan ingon nga mga Judio ug gipasiugdahan niya ang bag-ong mga pamatasan nga supak sa atong Balaod. 12Uban sa dakong kadasig gitukod niya ang usa ka estadyum duol sa bungtod sa Templo ug giaghat niya ang labing maayo sa mga batan-ong lalaki sa pagsunod sa batasan nga Grego diha sa pagsalmot sa mga paugnat sa kusog. 13Dili hitupngan ang kadaotan ni Jason, ang tawo nga walay kahadlok sa Dios ug nahimong Pangulong Pari pinaagi sa limbong. Tungod niini ang paagi sa pagkinabuhi sa mga Grego ug ang mga batasan nga langyaw migamot pag-ayo nga 14bisan ang mga pari nawad-an sa tanang gana sa ilang mga balaan nga katungdanan. Wala na silay gana sa mga kasaulogan sa Templo ug wala na sila magtagad sa mga paghalad. Inighatag sa sinyas, managan dayon sila aron pagsalmot sa mga dula nga gidili sa atong Balaod. 15Wala na sila magtagad mahitungod sa bisan unsa nga gimahal sa ilang mga katigulangan. Gipangita lamang nila ang mga kadungganan nga Grego. 16Kini maoy nahimong hinungdan sa tanan nilang mga kagubot kay ang mga tawo kansang mga paagi ug batasan sa pagkinabuhi ilang gidayeg ug gisunod nangahimo man hinuon nilang mga kaaway ug maoy nagdaugdaog kanila. 17Dili gayod katiawtiawan ang pagpasagad sa Balaod sa Dios sama sa inyong makita sa mosunod nga mga hitabo.
Ang Jerusalem ubos sa Gahom sa Siria
18Usa ka higayon niana, ang hari miadto sa Tiro alang sa mga kalingawan sa paugnat sa kusog nga gihimo matag lima#4:18 lima: Sa ubang sinulat, upat. ka tuig. 19Sa samang higayon, si Jason nga walay ulaw nagpadala ngadto sa Tiro ug pipila ka mga lalaki gikan sa Jerusalem nga gilista usab ingon nga mga lungsoranon sa Antioquia aron pagdala ug 300 ka salapi nga plata nga ibayad alang sa usa ka halad ngadto sa dios nga si Hercules. Apan bisan gani kining mga tawhana wala maghunahuna nga ang maong dakong kantidad angay nga gamiton alang sa usa ka halad. 20Busa ang salapi nga sa sinugdan gidala alang sa usa ka sakripisyo ngadto kang Hercules gigamit hinuon alang sa pagtukod ug mga sakayan sa gubat nga may tulo ka hut-ong sa mga tiggaod.
21Sa diha nga si Apolonio nga anak ni Menesteo gipadala ngadto sa Ehipto aron pagtambong sa pagpurongpurong kang Pilometor ingon nga hari, nahibaloan ni Antioco nga si Pilometor supak sa iyang mga hunahuna. Si Antioco nabalaka mahitungod sa seguridad sa iyang kaugalingong gingharian busa miadto siya sa Jopa ug unya ngadto sa Jerusalem. 22Didto giabiabi siya sa dako nga kaluho ni Jason ug ang mga tawo sa siyudad nanggula aron pagyukbo kaniya, naninggit ug nanagdala ug mga sulo. Gikan sa Jerusalem, si Antioco midala sa iyang kasundalohan ngadto sa Fenicia.
Si Menelao Nahimong Pangulong Pari
23Tulo ka tuig human niini, si Jason mipadala kang Menelao (igsoon ni Simon nga gihisgotan sa unahan) aron pagdala ug salapi ngadto sa hari ug aron pagkuha sa iyang hukom mahitungod sa pipila ka mga mahinungdanon nga mga butang. 24Apan sa pagbarog ni Menelao atubangan sa hari, nadani niya ang hari tungod sa iyang pagpasundayag sa awtoridad ug paghalad ug mga 10,200 ka kilo nga plata labaw sa gihalad ni Jason ug gitudlo siya sa katungdanan sa pagka-Pangulong Pari. 25Tungod niini si Menelao mipauli sa Jerusalem dala ang dokumento gikan sa hari nga nagmatuod nga siya na ang Pangulong Pari bisan ug wala siyay katakos alang niini. Masuk-anon hinuon siya, bangis ug mapintas sama sa usa ka ihalas nga mananap. 26Busa si Jason nga naglimbong sa iyang kaugalingong igsoon aron kini mahigawas gikan sa pagka-Pangulong Pari napugos na karon sa pagkagiw ngadto sa yuta sa Amon. 27Si Menelao nagpadayon sa pagka-Pangulong Pari apan wala gayod siya mobayad sa bisan unsa nga salapi nga iyang gisaad ngadto sa hari. 28Bisan pa niini, si Sustrato, ang kapitan sa kota sa Jerusalem, nagpadayon pagpaningil sa salapi kay iya man kining katungdanan. Busa sa kataposan si Menelao ug si Sustrato gipatawag aron moatubang sa hari mahitungod niining butanga. 29Gibilin ni Menelao ang iyang igsoon nga si Lisimaco ingon nga tinugyanan nga Pangulong Pari, samtang ang kota gibilin ni Sustrato ubos sa pagmando ni Crates, ang pangulo sa sinuholan nga mga sundalo gikan sa Cipre.
Ang Pagpatay kang Onias
30Samtang nanghitabo kini, may usa ka pag-alsa didto sa mga siyudad sa Cilicia, sa Tarso ug sa Malo tungod kay kining mga siyudara gihatag man sa hari ngadto kang Antioguida nga usa sa iyang mga asawa. 31Busa gibilin sa hari si Andronico nga usa sa iyang sinaligan nga mga opisyal aron maoy magmando samtang midali siya pag-adto sa Cilicia aron pagpahiuli sa kahusay. 32Si Menelao mipahimulos niining higayona ug mihalad ngadto kang Andronico ug pipila ka galamiton nga bulawan nga iyang kinuha gikan sa Templo sa Jerusalem. Gibaligya usab niya ang pipila niini ngadto sa siyudad sa Tiro ug sa ubang dug-ol nga mga siyudad. 33Nahibaloan kini ni Onias busa aron pagpanalipod sa iyang kaugalingon midangop siya sa templo didto sa Dafal duol sa siyudad sa Antioquia ug sa walay lipudlipod gibutyag niya ang daotang binuhatan ni Menelao. 34Busa#Dan. 9:26. sa tago gihulhogan ni Menelao si Andronico aron patyon si Onias. Unya si Andronico miadto kang Onias ug gilimbongan kini pinaagi sa usa ka hinigala nga yukbo ug sa mga saad nga walay mahitabo kaniya. Bisan ug may katahap si Onias, sa kataposan nadani siya ni Andronico palayo sa templo ug gipatay dayon siya sa walay kukaluoy.
Gisilotan si Andronico
35Ang mga Judio ug ang mga dili Judio nasuko pag-ayo tungod kay gipatay man si Onias. 36Busa sa paghibalik sa hari gikan sa kayutaan sa Cilicia, ang mga Judio sa Antioquia miadto kaniya ug misaway batok sa walay kukaluoy nga pagpatay. Daghan usab sa mga dili Judio ang samag gibati mahitungod niini. 37Si Hari Antioco naguol pag-ayo ug giabot ug dakong kahanugon kang Onias ug gani mihilak siya sa iyang paghinumdom sa kaalam ug sa kaligdong niini. 38Si Antioco nasuko pag-ayo ug tungod niini gigisi niya ang harianong bisti ni Andronico ug gihuboan kini ug gilibot sa siyudad ngadto sa dapit diin gipatay si Onias. Unya nagsugo si Antioco nga kining mamumuno nga uhaw sa dugo patyon. Giingon niini sa Ginoo pagpahamtang kaniya ang silot nga angay kaniya.
Gipatay si Lisimaco
39Sa laing bahin, si Lisimaco pinaluyohan sa iyang igsoon nga si Menelao makadaghan nga nangawat sa mga galamiton nga bulawan didto sa Templo sa Jerusalem. Sa dihang nahibaloan na kini, ang katawhan nagtigom aron pagsanta kang Lisimaco. 40Unya ang pundok sa katawhan isog na gayod kaayo ug dili na gayod kapugngan busa si Lisimaco nagpadala ug mga 3,000 ka tawo nga sangkap sa hinagiban aron pag-ataki kanila. Ang katawhan ni Lisimaco gipangulohan ni Aurano nga usa ka buangbuang nga tigulang. 41Ang mga Judio nga didto sa hawanan sa Templo nakaamgo sa nanghitabo busa namunit sila ug mga bato, mga kahoy o mga kinumkom nga abo gikan sa altar ug gilabay kini ngadto kang Lisimaco ug sa iyang mga tawo taliwala sa kaguliyang. 42Gipatay nila ang pipila sa mga tawo ni Lisimaco, gisamaran ang daghan kanila ug ang nahabilin nanagan aron pagluwas sa ilang kinabuhi. Si Lisimaco mismo, kadtong kawatan sa Templo, gipatay duol sa panudlanan sa Templo.
Gidala si Menelao aron Hukman
43Tungod niining hitaboa, si Menelao gipasakaan ug mga sumbong didto sa hukmanan. 44Sa pag-adto sa hari sa siyudad sa Tiro, ang mga kadagkoan nga Judio didto sa Jerusalem nagpadala ug tulo ka lalaki aron pagkiha kang Menelao. 45Sa pagtan-aw ni Menelao nga mapildi ang iyang kaso, gisubornohan niya si Tolomeo nga anak ni Dorimenes aron paghulhog sa hari sa paghukom dapig kaniya. 46Unya si Tolomeo mihangyo sa hari nga mogula siya sa lawak-hukmanan uban kaniya aron kunohay sa paghanggap ug hangin. Apan didto gihulhogan niya ang hari sa pag-usab sa iyang hunahuna 47ug pagdeklarar kang Menelao nga dili sad-an sa mga pasangil batok kaniya. Busa gibuhian sa hari si Menelao bisan ug siya maoy hinungdan sa kagubot ug mao hinuoy gihukman sa kamatayon ang tulo ka tawo nga bisan gani ang mapintas nga mga Escita mohukom man nga wala silay sala. 48Ang tulo ka lalaki misulti aron paglaban sa Jerusalem, sa mga tawo#4:48 mga tawo: Sa ubang sinulat, mga naglibot nga kabalangayan. niini ug sa balaan nga mga butang nga gikawat gikan sa Templo apan gipahamtangan sila sa hinanali ug dili makatarunganon nga kamatayon. 49Apan may pipila ka mga tawo sa Tiro nga mipakita sa ilang pagsupak niini pinaagi sa paghatag niining tulo ka tawo ug usa ka harianong paglubong. 50Si Menelao nagpabilin sa iyang katungdanan tungod sa kadalo niadtong mga anaa sa gahom. Sa matag adlaw nagdugang ang iyang pagkadaotan ug nahimo siyang nag-unang kaaway sa iyang kaugalingong mga katagilungsod.
Currently Selected:
2 Macabeo 4: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.