1 Macabeo 4
4
1Si Gorgias migamit ug 5,000 ka sundalo nga naglakaw ug 1,000 sa iyang labing batid nga sundalong nagkabayo ug mibiya sa kampo pagkagabii 2uban sa mga tawo nga gikan sa kota sa Jerusalem nga maoy iyang mga giya. Naglaraw siya ug usa ka pakugang nga sulong batok sa kasundalohan nga Judio, 3apan si Judas nahibalo sa laraw ug milihok siya uban sa iyang mga tawo aron pag-ataki sa kasundalohan sa hari didto sa Emmaus 4samtang si Gorgias ug ang iyang mga tropa layo pa sa kampo. 5Sa pag-abot ni Gorgias ug sa iyang kasundalohan didto sa kampo ni Judas niadtong gabhiona, wala silay nakaplagan. Naghunahuna sila nga si Judas ug ang iyang mga tawo nangikyas busa gipangita nila sila didto sa kabukiran.
6Sa pagkakaadlawon mipakita si Judas didto sa patag uban sa 3,000 ka lalaki apan dili ang tanan kanila sangkap sa hinagiban sama sa gusto unta nila. 7Nakita nila ang dakong pundok sa batid nga kasundalohan sa mga dili Judio nga nagsul-ob ug mga salipod sa dughan ug gipanalipdan sa mga sundalong nagkabayo. 8Apan miingon si Judas ngadto sa iyang mga tawo, “Ayaw kamo kabalaka mahitungod sa gidak-on sa pundok sa ilang kasundalohan ug ayaw kahadlok inig-ataki nila. 9Hinumdomi nga ang atong mga katigulangan naluwas didto sa Dagat nga Pula sa diha nga ang hari sa Ehipto migukod kanila uban sa iyang kasundalohan! 10Karon hangyoon nato ang Ginoo nga kaluy-an kita. Mag-ampo kita nga iyang pasidunggan ang iyang kasabotan uban sa atong mga katigulangan ug nga buntogon niya kining kasundalohan inig-ataki nato karong adlawa. 11Unya ang tanang mga dili Judio makaila nga ang Israel adunay usa ka Dios nga nagpalingkawas ug nagluwas kanila.”
12Sa pagkakita sa mga dili Judio kang Judas ug sa iyang mga tawo nga nangandam alang sa gubat, 13nanggula sila sa ilang mga kampo aron pagpakiggubat. Unya si Judas ug ang iyang mga tawo mipatingog sa ilang mga trumpeta 14ug miataki. Ang mga dili Judio nagkatibulaag ug nangagiw ngadto sa kapatagan 15apan ang tanan nga nahibilin gipatay. Gigukod sa mga Israelita ang kaaway hangtod sa Geser, sa kapatagan sa Edomea ug sa mga lungsod sa Asdod ug Jamnia. Ang tanan nga kaaway nga napatay nila mikabat ug 3,000.
16Sa paghiuli ni Judas ug sa iyang kasundalohan gikan sa ilang pagpanggukod, 17-18miingon siya ngadto sa iyang katawhan, “Ayaw kamo pagdinalo sa mga sakmitonon. Si Gorgias ug ang iyang kasundalohan anaa sa duol nga mga bukid busa aduna pay bug-at nga pakiggubat nga atong sagubangon. Kinahanglan nga mobarog kita nga malig-on ug makig-away. Human niana, makadala na kamo sa mga sinakmit nga higustohan ninyo.” 19Igo lang nakahuman si Judas sa iyang pakigpulong sa diha nga mibutho sa kabungtoran ang usa ka pundok sa mga kaaway nga nagpatrolya. 20Nakita sa mga kaaway nga ang ilang kasundalohan gibuntog ug nakahibalo sila gikan sa aso nga ang ilang kampo nagdilaab. 21Sa pagkakita nila niining tanan, nangalisang sila, ug sa pagkakita usab nila nga ang kasundalohan ni Judas didto sa kapatagan andam sa gubat, 22nangagiw silang tanan ngadto sa Filistia. 23Unya mibalik si Judas aron pagpanakmit sa mga butang sa kampo sa kaaway. Nakuha nila ang daghang bulawan ug plata, mga sinina nga bughaw ug porpura ug ubang mahalon nga mga sinakmit. 24Sa pagbalik sa mga Judio ngadto sa ilang kaugalingong kampo, nag-awit sila ug usa ka alawiton nga nag-ingon: “Ang Ginoo takos sa pagdayeg; ang iyang kaluoy naglungtad hangtod sa kahangtoran.” 25Kadtong adlawa nagdala ug usa ka dakong kadaogan alang sa katawhan sa Israel.
Kadaogan batok kang Lisias
(2 Mac. 11:1-12)
26Ang mga sundalo nga dili Judio nga nakaikyas miadto kang Lisias ug mitaho sa tanan nga nahitabo. 27Sa pagkadungog ni Lisias nga napildi ang iyang mga tropa sa gubat, nakurat siya ug naguol nga ang Israel wala mapildi sumala sa gisugo sa hari.
28Sa pagkasunod tuig, gitigom ni Lisias ang usa ka pundok sa kasundalohan nga 60,000 ka maayong pagkabansay nga mga sundalo ug 5,000 nga mga sundalong nagkabayo aron sa pagbuntog sa mga Judio. 29Migula sila ngadto sa Edomea ug nagkampo didto sa Betzur. Miabot si Judas aron pag-asdang kanila uban ang 10,000 ka tawo. 30Sa#1 Sam. 17:41-54; 14:1-23. pagkakita ni Judas unsa ka daghan ang kasundalohan sa kaaway, nag-ampo siya, “Daygon ikaw namo, O Manluluwas sa Israel. Gisanta nimo ang hasmag sa higante pinaagi sa kamot sa imong sulugoon nga si David ug gitugot mo nga mabuntog ni Jonatan nga anak ni Saul ug sa batan-on nga nagdala sa iyang mga hinagiban ang tibuok kasundalohan sa mga Filistihanon. 31Karon sa sama nga paagi itugot nga ang imong katawhan sa Israel makabuntog sa among mga kaaway. Pakaulawi sila bisan pa sa tanan nilang pagsalig sa ilang kasundalohan nga naglakaw ug nagkabayo. 32Himoa silang talawan; kuhaa ang ilang mapangahasong kusog; pakuroga sila sa pagpaabot sa kapildihan. 33Nahigugma kami ug nagsimba kanimo busa itugot nga patyon namo ang among mga kaaway aron mag-awit unya kami sa imong mga pagdayeg.”
34Ang gubat misugod ug diha sa panagsangka nga dinul-anay kapin sa 5,000 sa mga tawo ni Lisias ang napatay. 35Sa pagkakita ni Lisias nga ang iyang kasundalohan gipildi ug sa pagkakita niya sa walay ukon-ukon nga kaisog ni Judas ug sa iyang mga tawo nga nagpakita nga andam sila sa pagpakabuhi o pagpakamatay uban sa dungog, mibalik siya ngadto sa Antioquia. Didto nanglista siya ug pipila ka mga sundalo nga magpasuhol ug naglaraw sa pagbalik unya ngadto sa Judea uban sa mas dako nga pundok sa kasundalohan.
Ang Paghinlo sa Templo
(2 Mac. 10:1-8)
36Si Judas ug ang iyang mga igsoon nga lalaki miingon, “Karon nga ang atong mga kaaway nabuntog na, mangadto kita sa Jerusalem aron paghinlo sa Templo ug sa paghalad niini pag-usab.” 37Busa ang tibuok kasundalohan nagtigom ug mitungas ngadto sa Bukid sa Sion. 38Didto nakaplagan nila ang Templo nga gibiyaan, ang altar gipanamastamasan, ang mga ganghaan gisunog, ang mga hawanan nahimong kasagbotan ug ang mga lawak sa mga pari giguba. 39Sa ilang kasubo, gigisi nila ang ilang mga bisti, nagminatay sila sa makusog ug nagbolibod ug abo sa ilang ulo 40ug nanghapa sila sa yuta. Unya sa gihatag na ang timaan pinaagi sa mga trumpeta, ang tanan nanghilak ngadto sa Ginoo.
41Unya misugo si Judas ug pipila sa iyang mga sundalo nga moataki sa mga tawo didto sa kota samtang gihinloan ang Templo. 42Gipili niya ang pipila ka mga pari nga takos ug mahigugmaon sa Balaod. 43Gihinloan nila ang Templo ug gikuha nila ang mga bato nga gipanamastamasan ug gibutang nila kini sa usa ka dapit nga mahugaw. 44Nagsabot sila unsa ang ilang buhaton sa altar sa mga halad nga sunogon nga gipanamastamasan 45sa mga dili Judio ug nahukom sila sa pagguba niini aron dili kini magbarog didto ingon nga usa ka bantayog sa ilang kaulawan. Busa giguba nila ang altar 46ug gibutang ang mga bato didto sa usa ka sibo nga dapit sa bungtod sa Templo diin gitagoan kini hangtod nga mopakita ang usa ka propeta ug mohukom unsa ang ilang buhaton niini. 47Unya#Exo. 20:25; Deut. 27:5-6. mikuha sila ug dili tinagsip nga mga bato sumala sa gisugo sa Balaod ni Moises ug gitukod nila ang usa ka bag-ong altar sama sa karaan. 48Giayo nila ang Templo sa sulod ug sa gawas ug gihalad ang mga hawanan niini. 49Nagbuhat sila ug bag-ong mga kasangkapan alang sa pagsimba ug gidala nila ang tungtonganan sa suga, ang altar sa insenso ug ang lamisa alang sa pan ngadto sa Templo. 50Nagsunog sila ug insenso didto sa altar ug gidagkotan nila ang mga suga diha sa tungtonganan niini ug nahayag ang Templo. 51Gibutang nila ang mga pan didto sa lamisa, gibitay ang mga kurtina ug gihingpit ang tanang buhat.
52-54Ang#1 Mac. 1:54. ika-25 ka adlaw sa ikasiyam nga bulan sa Kisleb, sa tuig 148#4:52-54 TUIG 148: Mitakdo sa tuig 146 B.C. mao ang kasumaran sa adlaw nga gipanamastamasan sa mga dili Judio ang altar. Niadtong adlawa gihalad ang usa ka sakripisyo ibabaw sa bag-ong altar subay sa Balaod ni Moises. Ang bag-ong altar gihalad ug ang mga alawiton giawit dinuyogan sa mga alpa, plawta ug piyangpiyang. 55Ang tanang mga tawo mihapa sa yuta ug gisimba nila ug gidayeg ang Ginoo tungod sa paghatag niya kanila ug kadaogan.
56Sulod sa walo ka adlaw gisaulog nila ang bag-ong paghalad sa Templo. Uban sa dakong kasadya, gidala nila ang sunogonon nga mga halad, ang mga halad sa panaghigalaay ug ang mga halad sa pasalamat. 57Gidayandayanan nila ang atubangan sa Templo ug mga korona ug mga taming nga bulawan, gibag-o pagtukod ang mga ganghaan ug ang mga lawak sa mga pari ug gibutangan nila kini ug mga sira. 58Naghimo sila ug usa ka dakong kasaulogan tungod kay wala na ang kaulawan nga gidulot kanila sa mga dili Judio. 59Unya si Judas, ang iyang igsoong mga lalaki ug ang tibuok katilingban sa Israel nagmando nga ang paghalad pag-usab sa Templo kinahanglang saulogon uban sa kasadya ug kalipay sa samang panahon matag tuig, sugod sa ika-25 nga adlaw sa bulan sa Kisleb ug nga himoon kini sulod sa walo ka adlaw.
60Unya gitukod nila ang tag-as nga mga paril ug ang malig-on nga mga bantayan libot sa Bukid sa Sion aron dili makasulod ang mga dili Judio ug makayatak ug makapanamastamas niini pag-usab. 61Gibutangan ni Judas didto ug usa ka bahin sa kasundalohan aron magbantay sa Templo. Iya usab nga gilig-on ang lungsod sa Betzur pinaagi sa mga kota aron ang katawhan sa Israel makabaton ug usa ka kota nga nag-atubang sa Edomea.
Currently Selected:
1 Macabeo 4: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.