SALMO 91
91
Ang Dios Atong Tigpanalipod
1Siya nga nagpuyo diha sa panalipod sa Labing Halangdon,#91:1 Labing Halangdon: Sa Hebreo, Shaddai.
nga nagpahulay ilalom sa landong sa Labing Gamhanan,#91:1 Labing Halangdon: Sa Hebreo, Elyon.
2moingon ngadto sa Ginoo, “Akong dalangpanan ug akong kuta,
akong Dios nga akong gisaligan.”
3Kay siya magluwas kanimo gikan sa lit-ag sa mangangayam,
ug gikan sa makamatay nga sakit.
4Tabonan ikaw niya sa iyang mga dagang,
ug sa ilalom sa iyang mga pako, magpasilong ikaw;
ang iyang pagkamatinumanon mao ang taming ug panalipod.
5Dili ikaw mahadlok sa kakuyaw sa kagabhion,
o sa udyong nga naglupad panahon sa adlaw,
6o sa kamatay nga nag-atang sa kangitngitan,
o sa kalaglagan panahon sa kaudtohon.
7Mangapukan ang usa ka libo sa imong kiliran,
ug ang napulo ka libo dapit sa imong tuong kamot,
apan dili kini makaabot kanimo.
8Ikaw magtan-aw lamang pinaagi sa imong mga mata,
ug makita nimo ang balos alang sa daotan.
9Kay gihimo nimo ang Ginoo nga imong dalangpanan
ang Labing Halangdon nga imong puluy-anan,
10dili moabot kanimo ang kadaot,
o magpaduol ang katalagman sa imong tolda.
11Kay siya magsugo sa iyang mga anghel sa pag-atiman kanimo,
sa pagbantay kanimo sa tanan nimong mga dalan.
12 #
Mat. 4:6; Luc. 4:11. Sapnayon ikaw nila sa ilang mga kamot,
aron ang imong mga tiil dili mapandol sa bato.
13 #
Luc. 10:19. Imong tumban ang liyon ug ang bitin nga malala;
yatakan nimo ang batan-on nga liyon ug ang bitin.
14Tungod kay siya nagbutang sa iyang gugma kanako, luwason nako siya;
ipahiluna nako siya sa itaas tungod kay nakaila siya sa akong ngalan.
15Sa diha nga magtawag siya kanako, ako motubag kaniya;
ubanan nako siya diha sa kalisdanan,
luwason nako siya ug akong pasidunggan.
16Tagbawon nako siya sa taas nga kinabuhi,
ug akong ipakita kaniya ang akong kaluwasan.
Currently Selected:
SALMO 91: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
