SALMO 68
68
Nasodnong Awit sa Pagdaog
Ngadto sa pangulong musikero. Salmo ni David. Usa ka Awit.
1Patindoga ang Dios, patibulaaga ang iyang mga kaaway;
pakagiwa usab gikan sa iyang atubangan kadtong nagdumot kaniya!
2Ingon nga ang aso mapalid, papahawaa sila;
ingon nga ang talo matunaw atubangan sa kalayo,
wagtanga ang mga daotan gikan sa atubangan sa Dios.
3Apan palipaya ang mga matarong;
pamayaa sila sa atubangan sa Dios;
pamayaa sila uban sa kalipay!
4Pag-awit kamo sa Dios, pag-awit kamo ug mga pagdayeg sa iyang ngalan;
pasidunggi ninyo siya nga moagi ibabaw sa mga panganod;#68:4 Pasidunggi…panganod, o Pag-andam ug dalan kaniya nga moagi sa mga kamingawan.
Yahweh ang iyang ngalan,
pagmaya kamo sa atubangan niya!
5Amahan sa mga wala nay amahan ug tigpanalipod sa mga biyuda
ang Dios nga anaa sa iyang balaang puluy-anan.
6Ang Dios naghatag ug panimalay sa mga nag-inusara;
siya nagpagula sa mga binilanggo ngadto sa kauswagan;
apan ang mga masinupakon magpuyo sa uga nga yuta.
7O Dios, sa dihang nag-una ikaw sa imong katawhan,
sa pagpanaw nimo latas sa kamingawan, Selah
8 #
Ex. 19:18. ang yuta mikurog, ang kalangitan mipaulan usab,
diha sa atubangan sa Dios; ang Sinai mikurog
diha sa atubangan sa Dios, ang Dios sa Israel.
9Ikaw, O Dios, nagpadala ug daghang ulan;
ikaw nagpahiuli sa imong panulundon sa diha nga kini naluya na;
10ang imong panon nakakaplag ug puluy-anan didto;
ikaw, O Dios, nagtagana gikan sa imong kaayo alang sa mga kabos.
11Ang Ginoo naghatag sa mando;
dako ang panon sa mga nagsangyaw sa balita:
12“Ang mga hari sa kasundalohan, nangagiw sila, nangagiw sila!”
Ang kababayen-an nga nahibilin sa balay nagbahin sa inilog,
13bisan ug nagpabilin sila sa mga toril sa karnero,
ang mga pako sa salampati nga gisapawan ug plata
ang mga dagang niini sa dalag nga bulawan.
14Sa dihang gipatibulaag sa Labing Gamhanan#68:14 Labing Gamhanan: Sa Hebreo, Shaddai. ang mga hari didto,
nag-ulan ug yelo sa Zalmon.
15O gamhanang bukid, bukid sa Basan;
bukid nga daghan ug mga bungtod, ang bukid sa Basan!
16Ngano nga nagtan-aw kamo uban ang kasina, O bukid nga daghan ug mga bungtod,
sa bukid nga gitinguha sa Dios alang sa iyang puluy-anan,
diin ang Ginoo magpuyo niini hangtod sa kahangtoran?
17Uban sa gamhanang karwahi, 20,000,
liboan ka libo,
ang Ginoo miabot gikan sa Sinai ngadto#68:17 miabot…ngadto: Sa Hebreo, uban kanila didto sa Sinai. sa balaang puluy-anan.
18 #
Efe. 4:8. Ikaw miadto sa itaas,
mipagula sa mga binihag,
nagdawat ka ug mga gasa gikan sa mga tawo,
bisan gikan sa mga masinupakon, aron ang Ginoo nga Dios magpuyo uban kanila.
19Dalaygon ang Ginoo,
nga sa matag adlaw nagpas-an kanato;
ang Dios mao ang atong kaluwasan. Selah
20Ang atong Dios usa ka Dios sa kaluwasan,
ug ngadto sa Dios nga Ginoo, iya ang kagawasan gikan sa kamatayon.
21Apan ang Dios maghampak sa ulo sa iyang mga kaaway,
ang buhokon nga ulo niadtong naglakaw diha sa iyang kasal-anan.
22Ang Ginoo nag-ingon,
“Dad-on nako sila pagbalik gikan sa Basan,
dad-on nako sila pagbalik gikan sa kahiladman sa dagat,
23aron mahumol#68:23 mahumol: Sa Hebreo, mabuak. nimo ang imong tiil diha sa dugo,
aron ang mga dila sa imong mga iro makabaton sa ilang bahin gikan sa imong mga kaaway.”
24Nakita nila ang imong mga pagpanaw, O Dios,
ang mga pagpanaw sa akong Dios, sa akong Hari, ngadto sa balaang puluy-anan—
25ang mga mag-aawit nag-una, ang mga tigtugtog nagsunod,
sa taliwala nila ang mga dalaga nga nagtugtog sa mga gagmayng tambor:
26“Dayega ninyo ang Dios diha sa dakong katilingban,
ang Ginoo, O kamo nga gikan sa tuboran sa Israel!”
27Anaa si Benjamin, ang labing gamay nila, nag-una,
ang mga pangulo sa Juda ug ang ilang pundok,
ang mga pangulo sa Zabulon, ang mga pangulo sa Neftali.
28Gamita ang imong gahom, O Dios;
ipakita ang imong kusog, O Dios, ikaw nga nagbuhat alang kanamo.
29Tungod sa imong Templo didto sa Jerusalem,
ang mga hari nagdala ug mga gasa nganha kanimo.
30Badlonga ang mananap nga ihalas nga nagpuyo sa kabugangan,
ang panon sa mga torong baka, uban sa mga nating baka sa mga katawhan.
Tumbi kadtong nagtinguha sa daghang plata;
patibulaaga ang mga katawhan nga mangalipay sa gubat.#68:30 Ang Hebreo lisod sabton.
31Moabot ang mga pangulo gikan sa Ehipto;
padalia ang Etiopia sa pagbayaw sa iyang mga kamot ngadto sa Dios.
32Pag-awit kamo ngadto sa Dios, O mga gingharian sa kalibotan;
pag-awit kamo ug mga pagdayeg ngadto sa Ginoo, Selah
33kaniya nga nagsakay sa kalangitan, sa kalangitan sa kakaraanan;
pamati, siya mipalanog sa iyang tingog, sa iyang gamhanang tingog.
34Ipahinungod ninyo ang gahom ngadto sa Dios,
nga ang pagkahalangdon anaa sa ibabaw sa Israel,
ug ang iyang gahom anaa sa kapanganoran.
35Makalilisang ang Dios diha
sa iyang#68:35 iyang: Sa Hebreo, imong balaang dapit,
ang Dios sa Israel;
siya naghatag ug kusog ug gahom ngadto sa iyang katawhan.
Dalaygon ang Dios.
Currently Selected:
SALMO 68: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
