SALMO 66
66
Awit sa Pagdayeg ug Pagpasalamat
Ngadto sa pangulong musikero: Usa ka Awit. Usa ka Salmo.
1Paghimo ug usa ka malipayong kagahob ngadto sa Dios, tibuok nga yuta;
2awita ang himaya sa iyang ngalan;
ihatag kaniya ang mahimayaong pagdayeg!
3Ingna ninyo ang Dios, “Pagkamakalilisang sa imong mga buhat!
Hilabihan kadako ang imong gahom nga ang imong mga kaaway nangyukbo kanimo.
4Ang tibuok nga yuta magsimba kanimo;
sila mag-awit ug mga pagdayeg nganha kanimo,
mag-awit ug mga pagdayeg nganha sa imong ngalan.” Selah
5Dali ug tan-awa ninyo unsay nabuhat sa Dios;
makalilisang ang iyang mga buhat nganha sa mga tawo.
6 #
Ex. 14:21;
Jos. 3:14-17. Ang dagat gihimo niya nga uga nga yuta;
nanabok sila nga naglakaw sa suba.
Didto naglipay kita diha kaniya,
7nga naghari pinaagi sa iyang gahom hangtod sa kahangtoran,
nga ang mga mata naniid sa mga nasod.
Ayaw papasigarboha sa ilang kaugalingon ang mga masinupakon. Selah
8Dayega ninyo ang atong Dios, O mga katawhan,
himoa nga madungog ang tingog sa pagdayeg kaniya,
9nga mao ang nagkupot kanato uban sa mga buhi,
ug dili motugot nga ang atong mga tiil madakin-as.
10Kay ikaw, O Dios, nagsulay kanamo;
gisulayan nimo kami ingon nga ang plata gisulayan.
11Gisulod nimo kami sa pukot;
gibutangan nimo ug bug-at nga palas-anon ang among mga hawak;
12ikaw mitugot nga ang mga tawo mangabayo ibabaw sa among mga ulo;
milatas kami sa kalayo ug sa tubig,
apan ikaw nagdala kanamo ngadto sa kadagaya.
13Mosulod ako sa imong balay uban ang mga halad nga sunogon,
magtuman ako kanimo sa akong mga panaad,
14kadtong gipamulong sa akong mga ngabil,
ug gisulti sa akong baba samtang diha ako sa kalisdanan.
15Ihalad nako kanimo ang mga halad nga sunogon gikan sa mga pinatambok,
uban sa aso sa mga halad nga laking karnero;
Maghalad ako ug mga torong baka ug mga kanding. Selah
16Dali ngari ug pamati, kamong tanan nga may kahadlok sa Dios,
ug ipahayag nako ang gibuhat niya alang kanako.
17Kaniya mituaw ako
ug gidayeg siya pinaagi sa akong dila.
18Kon gipalabi pa nako ang kadaotan dinhi sa akong kasingkasing,
ang Ginoo dili unta magpatalinghog.
19Apan sa pagkatinuod ang Dios namati,
gidungog niya ang tingog sa akong pag-ampo.
20Dalaygon ang Dios
nga wala magsalikway sa akong pag-ampo
o maghikaw kanako sa iyang gugma nga walay paglubad!
Currently Selected:
SALMO 66: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
