SALMO 58
58
Pag-ampo aron Silotan ang mga Daotan
Ngadto sa pangulong musikero: sumala sa Ayaw Laglaga. Miktam ni David.
1Nagsulti ba gayod kamo sa pagkamatarong, kamong mga gamhanang pangulo?#58:1 gamhanang pangulo: o dios.
Naghukom ba kamo sa mga anak sa mga tawo diha sa katarong?
2Wala, diha sa inyong kasingkasing kamo naglaraw ug daotan;
ang inyong mga kamot nagbuhat ug daotan diha sa yuta.
3Ang mga daotan nahisalaag sukad pa sa taguangkan;
nakasala sila sukad sa ilang pagkahimugso, nagsulti ug bakak.
4Ang ilang kalala sama sa kalala sa bitin,
sama sa kobra nga bungol nga nagsampong sa dalunggan niini,
5mao nga kini dili makabati sa tingog sa mga tiglamat
o sa malinglahon nga tiglamat.
6O Dios, balia ang mga ngipon sa ilang mga baba;
hingoa ang mga tango sa mga gagmayng liyon, O Ginoo!
7Wad-a sila sama sa tubig nga nagdagayday;
sama sa balili patumbi sila ug malaya.#58:7 sama sa balili…malaya: Ang Hebreo niini lisod sabton.
8Mahisama unta sila sa hilahila nga matunaw ug mahanaw,
sama sa bata nga nakuha nga dili makakita sa adlaw.
9Sa dili pa mobati ang inyong kulon sa kainit sa mga tunok,
buhi man o nagdilaab na, wagtangon unta niya sila!
10Ang matarong maglipay sa dihang makita niya ang panimalos;
manghugas siya sa iyang mga tiil diha sa dugo sa mga daotan.
11Ang mga tawo mag-ingon, “Sa pagkatinuod adunay ganti alang sa mga matarong;
sa pagkatinuod, adunay Dios nga maghukom dinhi sa yuta.”
Currently Selected:
SALMO 58: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
