SALMO 46
46
Ang Dios Nag-uban Kanato
Ngadto sa pangulong musikero. Salmo sa mga kaliwat ni Korah. Sumala sa Alamoth.#46 Ulohan ALAMOT: Sa ato pa mga batan-ong babaye. Kini mahimong nagpasabot nga awiton sa mga babaye o awiton diha sa taas nga paningog. Usa ka Awit.
1Ang Dios mao ang atong dalangpanan ug kusog,
dali nga katabang diha sa kalisdanan.
2Busa dili kita mahadlok bisan kon ang yuta mausab,
bisan kon ang mga bukid mauyog didto sa kahiladman sa kadagatan;
3bisan ang mga tubig niini magdahunog ug magbula;
bisan ang mga bukid mangurog tungod sa kagahob niini. Selah
4Adunay usa ka suba nga ang mga sapa niini makalipay sa siyudad sa Dios,
ang balaang puluy-anan sa Labing Halangdon.
5Ang Dios anaa sa taliwala niya busa siya dili matarog;
ang Dios sayo gayod nga motabang kaniya.
6Ang mga nasod nagkaguliyang, ang mga gingharian nangatay-og;
iyang gipalanog ang iyang tingog, ang yuta natunaw.
7Ang Ginoo sa mga panon nag-uban kanato;
ang Dios ni Jacob mao ang atong dalangpanan. Selah
8Dali kamo, tan-awa ang mga buhat sa Ginoo;
unsa nga mga kalaglagan ang iyang gihimo sa yuta.
9Gipahunong niya ang mga gubat hangtod sa kinatumyan sa yuta;
gibali niya ang pana, ug gibunggo ang bangkaw;
gisunog niya sa kalayo ang mga karwahi!
10“Hilom kamo ug ilha ninyo nga ako mao ang Dios.
Gibayaw ako taliwala sa mga nasod,
gibayaw ako dinhi sa yuta!”
11Ang Ginoo sa mga panon nag-uban kanato;
ang Dios ni Jacob mao ang atong dalangpanan. Selah.
Currently Selected:
SALMO 46: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
