MATEO 24
24
Gitagna ni Jesus ang Pagkagun-ob sa Templo
(Mar. 13:1-23; Luc. 21:5-24)
1Unya si Jesus mibiya sa Templo, ug samtang naglakaw siya miduol kaniya ang iyang mga tinun-an ug ilang gitudlo kaniya ang mga bahin sa Templo. 2Apan siya mitubag kanila, “Dili ba nakita man ninyo kining tanan? Sa pagkatinuod, sultihan ko kamo, nga dinhi walay bato nga pinatong sa laing bato nga dili tumpagon.”
Mga Kasamok ug mga Paglutos
3Samtang naglingkod siya didto sa Bungtod sa mga Olibo, ang mga tinun-an miduol kaniya nga silasila ra ug miingon, “Tug-ani kami, kanus-a man kini mahitabo ug unsa man ang ilhanan sa imong pag-anhi ug sa pagkatapos sa kapanahonan?” 4Ug mitubag kanila si Jesus nga nag-ingon, “Pagbantay kamo nga walay makapasaag kaninyo. 5Kay daghan unya ang moabot nga magdala sa akong ngalan nga moingon, ‘Ako mao ang Cristo,’ ug daghan ang ilang mapasaag kanila. 6Ug makadungog kamo ug mga gubat ug dungogdungog mahitungod sa mga gubat. Pagbantay kamo nga dili kamo makuyawan kay kinahanglan gayod kini nga mahitabo apan dili pa kini mao ang kataposan. 7Kay ang usa ka nasod moalsa batok sa usa ka nasod ug gingharian batok sa gingharian ug mahitabo ang mga gutom ug mga linog sa nagkalainlaing mga dapit. 8Apan kining tanan sinugdanan lamang sa mga kasakit.
9“Unya itugyan nila kamo ngadto sa kalisdanan ug ipapatay kamo ug dumtan sa tanang kanasoran tungod sa akong ngalan.#Mat. 10:22. 10Ug daghan unya ang mapandol sa ilang pagsunod kanako ug magbudhiay ug magdumtanay ang usa ug usa. 11Ug motungha ang daghang mini nga mga propeta ug magpasaag sa daghan. 12Ug kay mosanay man ang kadaotan, mobugnaw ang gugma sa kadaghanan. 13Apan ang molahutay hangtod sa kataposan maluwas.#Mat. 10:22. 14Ug kining Maayong Balita mahitungod sa gingharian iwali ngadto sa tibuok nga kalibotan ingon nga pagsaksi ngadto sa tanang kanasoran ug unya moabot ang kataposan.
Ang Makalilisang nga Talan-awon
15 #
Dan. 9:27; 11:31; 12:11. “Busa inigkakita ninyo sa makalilisang nga pagpasipala diha sa Templo nga gihisgotan sa propeta nga si Daniel, nga magtindog sa Dapit nga Balaan (pasabta niini ang magbasa), 16pakagiwa sila nga anaa sa Judea ngadto sa kabukiran. 17#Luc. 17:31. Ug siya nga anaa sa atop, ayaw na pakanaoga aron sa pagkuha sa kabtangan nga anaa sa iyang balay 18ug siya nga atua sa uma, ayaw na pabalika aron sa pagkuha sa iyang kupo. 19Ug alaot ang mga mabdos ug ang may mga masuso nianang mga adlawa! 20Pag-ampo kamo nga unta ang inyong pagpangagiw dili mahiatol sa tingtugnaw o sa adlaw nga igpapahulay. 21#Dan. 12:1; Pin. 7:14. Kay moabot unya ang dakong kalisdanan nga wala pa mahitabo sukad sa sinugdan sa kalibotan hangtod karon ug dili na gayod mahitabo pa. 22Ug kon ang gidaghanon niadtong mga adlawa wala pa paubsi, wala gayod untay tawong maluwas apan tungod sa iyang mga pinili, ang gidaghanon niadtong mga adlawa paubsan. 23Unya kon adunay moingon kaninyo, ‘Tan-awa, ania ra ang Cristo!’ o ‘Atua ra siya!’ ayaw kamo pagtuo niini. 24Kay motungha ang mga mini nga Cristo ug mga mini nga propeta ug magpakita sila ug dagkong mga ilhanan ug mga katingalahan aron pagpasaag, kon mahimo, bisan pa sa mga pinili. 25Tan-awa, gisuginlan na nako kamong daan niini. 26#Luc. 17:23-24. Busa, kon sila moingon kaninyo, ‘Tan-awa, atua siya sa kamingawan,’ ayaw kamo pag-adto didto. Ug kon sila moingon, ‘Tan-awa, anaa siya sa tinagong mga lawak,’ ayaw kamo pagtuo niini. 27Kay sama nga ang kilat mokilab gikan sa sidlakan ug makita hangtod sa kasadpan, mao usab unya niana ang pag-abot sa Anak sa Tawo. 28#Luc. 17:37. Diin gani may lawas nga patay, adto usab magtapok ang mga agila.
Ang Pag-abot sa Anak sa Tawo
(Mar. 13:24-31; Luc. 21:25-33)
29“Dihadiha inigkatapos sa kalisdanan niadtong mga adlawa, ang adlaw mongitngit, ug ang bulan dili na mohatag ug kahayag, ug ang mga bituon mangatagak gikan sa langit ug matay-og ang mga gahom sa kalangitan.#Isa. 13:10; Joel 2:10, 31; 3:15; Pin. 6:12; Isa. 13:10; Ezek. 32:7; Joel 2:10; 3:15; Isa. 34:4; Pin. 6:13. 30#Dan. 7:13; Zac. 12:10-14; Pin. 1:7. Unya magpakita diha sa langit ang ilhanan sa Anak sa Tawo ug unya ang tanang kabanayan sa yuta magminatay ug ilang makita ang Anak sa Tawo nga moabot nga sinapwang sa mga panganod sa langit uban sa gahom ug dakong himaya. 31Ug ipadala niya ang iyang mga anghel uban sa kusog nga tingog sa trumpeta ug ilang tigomon ang iyang mga pinili gikan sa upat ka suok sa kalibotan, gikan sa usa ka tumoy sa langit ngadto sa pikas.
Ang Pagtulun-an Mahitungod sa Kahoyng Igera
32“Gikan sa kahoyng igera tun-i ninyo kining usa ka sambingay: inigpanglunhaw sa iyang mga sanga ug manalingsing na, masayran ninyo nga duol na ang ting-init. 33Busa kamo usab, inigkakita ninyo niining tanan, masayran ninyo nga duol na siya, anaa na gayod sa mga pultahan. 34Sa pagkatinuod, sultihan ko kamo, sa dili pa mahanaw kini nga kaliwatan, kining tanan mahitabo gayod. 35Ang langit ug ang yuta mahanaw, apan ang akong mga pulong dili gayod mahanaw.
Walay Nasayod sa Adlaw ug Takna
(Mar. 13:32-37; Luc. 17:26-36; 21:34-36)
36“Apan mahitungod sa maong adlaw ug takna, walay usa nga nasayod, bisan pa ang mga anghel sa langit, bisan pa ang Anak,#24:36 bisan pa ang Anak: Wala kini sa ubang karaang sinulat. kondili ang Amahan lamang. 37#Gen. 6:5-8. Sama sa mga adlaw ni Noe kaniadto, mao usab unya ang pag-abot sa Anak sa Tawo. 38Kay sama niadtong mga adlawa, sa wala pa ang lunop, ang katawhan nangaon ug nanginom, nangasawa ug namana, hangtod sa adlaw nga misulod si Noe sa arka, 39#Gen. 7:6-24. apan sila wala masayod hangtod nga miabot ang lunop ug gianod silang tanan, mao usab unya niana ang pag-abot sa Anak sa Tawo. 40Unya adunay duha ka tawo diha sa uma, ang usa kuhaon ug ang usa mahibilin. 41Duha ka babaye maggaling diha sa galingan, ang usa kuhaon ug ang usa mahibilin. 42Busa pagtukaw kamo kay wala kamo mahibalo unsang adlawa moabot ang inyong Ginoo. 43#Luc. 12:39-40. Apan hibaloi ninyo nga kon ang pangulo sa panimalay nasayod pa unsang taknaa sa kagabhion moabot ang kawatan, magtukaw unta siya ug dili niya itugot nga lungkabon ang iyang balay. 44Busa kamo usab kinahanglang mangandam kay ang Anak sa Tawo moabot sa takna nga wala ninyo dahoma.
Ang Buotan ug Daotan nga Ulipon
(Luc. 12:41-48)
45“Kinsa ba ang kasaligan ug maalamon nga ulipon nga gitudlo sa iyang agalon sa pagdumala sa panimalay niini aron paghatag kanila sa ilang pagkaon sa hustong panahon? 46Bulahan kadtong ulipon nga sa pag-abot sa iyang agalon maabtan nga nagbuhat sa ingon. 47Sa pagkatinuod sultihan ko kamo nga ipahimutang niya siya sa pagdumala sa tanan niyang katigayonan. 48Apan kon ang daotang ulipon moingon sa iyang kaugalingon, ‘Madugay pa kadtong akong agalon,’ 49ug unya mosugod siya pagpamunal sa iyang isigkaulipon, ug magkaon ug mag-inom kauban sa mga palahubog, 50ang agalon sa maong ulipon moabot sa adlaw nga wala niya dahoma ug sa takna nga wala niya masayri. 51Ug silotan niya siya ug ibutang tipon sa mga tigpakaaron-ingnon. Didto, ang mga tawo manghilak ug magkagot ang ilang mga ngipon.
Currently Selected:
MATEO 24: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011