MATEO 17

Ang Pagkausab sa Dagway

(Mar. 9:2-13; Luc. 9:28-36)

1 # 2 Ped. 1:17-18. Human sa unom ka adlaw, gidala ni Jesus uban kaniya sila si Pedro ug si Santiago ug ang igsoon niini nga si Juan, ug iyang gipauban sila ngadto sa usa ka habog nga bukid nga silasila ra. 2Ug nausab ang iyang dagway sa ilang atubangan, ang iyang nawong midan-ag sama sa adlaw, ug ang iyang bisti miamag sa kaputi sama sa kahayag. 3Ug didto, nakita nila si Moises ug si Elias nga nakigsulti kang Jesus. 4Unya si Pedro miingon kang Jesus, “Ginoo, maayo hinuon nga ania kami dinhi. Kon buot nimo, magbuhat ako dinhi ug tulo ka payagpayag, usa alang kanimo, usa alang kang Moises ug usa alang kang Elias.” 5#Gen. 22:2; Sal. 2:7; Isa. 42:1; Mat. 3:17; 12:18; Mar. 1:11; Luc. 3:22; Deut. 18:15. Samtang nagsulti pa siya, dihay usa ka silaw nga panganod nga mitabon kanila ug gikan sa panganod dihay usa ka tingog nga nag-ingon, “Mao kini ang akong Anak nga pinalangga, diha kaniya nalipay ako, pamati kaniya.” 6Sa pagkabati sa mga tinun-an niini, mihapa sila ug nangalisang pag-ayo. 7Apan si Jesus miduol ug mihikap kanila ug miingon, “Bangon ug ayaw kamo kalisang.” 8Ug sa pagyahat nila sa ilang mga mata, wala silay laing nakita gawas kang Jesus lamang.

9Sa dihang nanglugsong sila sa bukid, gibaoran sila ni Jesus nga nag-ingon, “Ayaw ninyo isugilon ang panan-awon kang bisan kinsa hangtod nga ang Anak sa Tawo mabanhaw na gikan sa mga patay.” 10#Mal. 4:5. Ug gipangutana siya sa mga tinun-an nga nag-ingon, “Nganong nag-ingon man ang mga eskriba nga si Elias kinahanglan nga moanhi una?” 11Kanila mitubag siya nga nag-ingon, “Tinuod nga si Elias moanhi ug ipasig-uli niya ang tanang mga butang. 12#Mat. 11:14. Apan sultihan ko kamo nga si Elias mianhi na ug wala sila makaila kaniya, hinuon ilang gibuhat ngadto kaniya ang bisan unsa nga ilang gikahimut-an. Ug sa ingon usab, ang Anak sa Tawo mag-antos unya diha sa ilang mga kamot.” 13Unya ang mga tinun-an nakasabot nga nagsulti siya kanila mahitungod kang Juan nga Tigbautismo.

Giayo ni Jesus ang Usa ka Bata nga Gidemonyohan

(Mar. 9:14-29; Luc. 9:37-43)

14Sa pag-abot nila ngadto sa panon sa katawhan, dihay usa ka tawo nga miduol ug sa iyang atubangan miluhod nga nag-ingon, 15“Ginoo, kaluy-i intawon ang akong anak nga lalaki kay siya patulon ug nag-antos pag-ayo ug kanunay siyang mahulog ngadto sa kalayo ug kanunay usab ngadto sa tubig. 16Gidala nako siya ngadto sa imong mga tinun-an apan wala sila makaayo kaniya.” 17Ug si Jesus mitubag nga nag-ingon, “O katawhan nga walay pagtuo ug sukwahi! Hangtod kanus-a ba nga ako makig-uban kaninyo? Hangtod kanus-a ba nga ako mag-antos kaninyo? Dad-a siya dinhi kanako.” 18Ug gibadlong ni Jesus ang demonyo ug migula kini gikan sa bata, ug ang bata naayo niadto gayong taknaa. 19Unya ang mga tinun-an miduol kang Jesus nga silasila ra ug miingon, “Nganong wala man kami makapagula niini?” 20#Mat. 21:21; Mar. 11:23; 1 Cor. 13:2. Ug siya miingon kanila, “Tungod sa kagamay sa inyong pagtuo. Kay sa pagkatinuod, sultihan ko kamo, nga kon may pagtuo kamo nga sama sa liso sa mustasa, inyong ingnon kining bukira, ‘Balhin ngadto,’ ug kini mobalhin, ug walay dili mahimo alang kaninyo.”#17:20 Ang ubang karaang sinulat nagdugang ug bersikulo 21. Apan kining matanga dili mahimong pagulaon kon dili pinaagi sa pag-ampo ug pagpuasa.

Gipasidaan na Usab ni Jesus ang Iyang Kamatayon

(Mar. 9:30-32; Luc. 9:43-45)

22Ug samtang nagkatigom#17:22 nagkatigom: Sa ubang karaang sinulat, nagpuyo. sila sa Galilea, si Jesus miingon kanila, “Ang Anak sa Tawo itugyan ngadto sa mga kamot sa mga tawo 23ug patyon nila siya ug sa ikatulo nga adlaw siya banhawon.” Ug nasubo sila pag-ayo.

Ang Pagbayad ug Buhis Alang sa Templo

24 # Ex. 30:13; 38:26. Ug sa pag-abot nila sa Capernaum, ang mga tigpaningil sa buhis#17:24 BUHIS: Sa Grego, duha ka drakma; ang duha ka drakma balig katunga sa siklo nga maoy buhis nga gipangayo gikan sa matag lalaki nga Judio alang sa Templo. Tan-awa sa Ex. 30:13. sa Templo miduol kang Pedro ug miingon, “Wala ba magbayad ug buhis sa Templo ang inyong magtutudlo?” 25Siya miingon, “Nagbayad!” Ug sa pag-uli na ni Pedro sa balay, giunhan siya ni Jesus sa pagsulti nga nag-ingon. “Unsa may imong hunahuna, Simon? Kang kinsa man maningil ug buhis o bayranan ang mga hari sa yuta? Sa ila bang mga anak, o sa uban?” 26Ug sa dihang siya miingon, “Sa uban,” si Jesus miingon kaniya, “Busa wala diay bayranan ang mga anak. 27Apan aron dili kita makahatag ug kapandolan nila, lakaw ngadto sa lanaw, pag-itsa ug pasol ug bitara ang unang isda nga mapaslan ug ukba ang baba, ug sa sulod niini makita nimo ang salapi alang sa buhis sa Templo. Kuhaa kini ug ibayad kanila alang kanako ug kanimo.”

Currently Selected:

MATEO 17: ABCEB

Highlight

Copy