JOSUE 5
5
1Sa diha nga ang mga hari sa mga Amorihanon nga didto sa tabok sa Jordan dapit sa kasadpan ug ang tanang hari sa mga Canaanhon nga didto duol sa dagat nakadungog nga gipahubas sa Ginoo ang katubigan sa Jordan alang sa katawhan sa Israel hangtod nga sila nakatabok na, ang ilang mga kasingkasing nangatunaw ug wala nay bisan unsang espiritu diha kanila tungod sa katawhan sa Israel.
Ang Pagtuli ug ang Kasaulogan sa Pagsaylo Didto sa Gilgal
2Niadtong panahona ang Ginoo miingon kang Josue, “Pagbuhat ug hait nga mga kutsilyo ug tulia pag-usab ang katawhan sa Israel sa ikaduhang higayon.” 3Busa si Josue nagbuhat ug mga kutsilyo nga hait ug gituli niya ang katawhan sa Israel didto sa Gibeat-haaralot.#5:3 GIBEAT-HAARALOT: Sa ato pa, Ang bungtod sa mga yamis. 4Mao kini ang hinungdan ngano nga gituli sila ni Josue: ang tanang mga lalaki sa katawhan nga nanggula gikan sa Ehipto, ang mga lalaki nga manggugubat nangamatay sa dalan sa kamingawan human sila makagula gikan sa Ehipto. 5Bisan ug ang tanang tawo nga nanggula natuli na, apan kadtong tanan nga didto matawo sa ilang pagpanglakaw sa kamingawan sa nakagula na sila gikan sa Ehipto, wala matuli. 6#Num. 14:28-35. Kay ang katawhan sa Israel nagpanaw sulod sa 40 ka tuig didto sa kamingawan hangtod nga ang tibuok nga nasod, ang mga tawo nga manggugubat nga nanggula sa Ehipto, nangamatay kay sila wala mamati sa tingog sa Ginoo. Kanila ang Ginoo nanumpa nga dili niya sila pakit-on sa yuta nga gipanumpa sa Ginoo ngadto sa ilang katigulangan nga iyang ihatag kanato, usa ka yuta diin nag-agas ang gatas ug dugos. 7Busa ang ilang mga anak nga iyang gipatubo puli kanila mao ang gituli ni Josue, kay sila dili tinuli kay wala man sila matuli didto sa dalan.
8Sa diha nga nahuman na ang pagpanuli sa tibuok nasod, sila nagpabilin sa ilang mga dapit sa kampo hangtod nga sila nangaayo. 9Ug ang Ginoo miingon kang Josue, “Niining adlawa giwagtang nako gikan kaninyo ang mga pagtamay sa Ehipto.” Tungod niini ang ngalan sa maong dapit gitawag ug Gilgal#5:9 GILGAL: Sa ato pa, Giwagtang. hangtod niining adlawa.
10 #
Ex. 12:1-13. Samtang ang katawhan sa Israel nagkampo sa Gilgal, ilang gisaulog ang Pagsaylo sa pagkagabii sa ikanapulo ug upat nga adlaw sa bulan, didto sa kapatagan sa Jerico. 11Ug sa pagkaugma human sa Pagsaylo, niadto gayong adlawa, nangaon sila sa abot sa yuta, mga pan nga walay patubo ug mga sinangag nga mga trigo. 12#Ex. 16:35. Ug ang mana nahunong sa adlaw nga nangaon sila sa abot sa yuta, ug ang katawhan sa Israel wala nay mana, apan nangaon sa abot sa yuta sa Canaan niadtong tuiga.
Si Josue ug ang Tawo nga May Espada
13Sa diha nga si Josue duol na sa Jerico, iyang giyahat ang iyang mga mata ug mitan-aw ug nakita niya nga may usa ka tawo nga nagtindog sa iyang atubangan nga nagdala ug usa ka espada nga gihulbot gikan sa sakoban diha sa iyang kamot ug si Josue miduol kaniya ug miingon kaniya, “Dapig ba ikaw kanamo o sa among mga kaaway?” 14Ug siya miingon, “Dili, apan ingon nga tigmando sa kasundalohan sa Ginoo, mianhi ako karon.” Ug si Josue mihapa sa yuta ug misimba ug miingon kaniya, “Unsa ba ang isugo sa akong agalon ngadto sa iyang ulipon?” 15Ug ang tigmando sa panon sa kasundalohan sa Ginoo miingon kang Josue, “Huboa ang imong sandalyas gikan sa imong tiil kay ang dapit nga imong gitindogan, balaan.” Ug si Josue mibuhat sa ingon.
Currently Selected:
JOSUE 5: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
