JOB 38
38
Ang Ginoo Mitubag kang Job
1Unya gikan sa alimpulos, ang Ginoo mitubag kang Job:
2“Kinsa kini nga nagngitngit sa tambag pinaagi sa mga pulong nga walay kahibalo?
3Pangandam#38:3 Pangandam: Sa Hebreo, Baksi ang imong hawak. ingon nga usa ka lalaki,
Ako mangutana kanimo ug ikaw motug-an kanako.
4“Diin man ikaw sa pagpahimutang nako sa patukoranan sa kalibotan?
Sultihi ako kon ikaw adunay pagpanabot.
5Kinsa ang nagbuot sa mga sukod niini, ikaw nasayod gayod!
O kinsa ba ang naglatid sa badlis diha niini?
6Unsa ba ang giugbokan sa patukoranan niini?
O kinsa ba ang nagpahiluna sa sukaranan niini,
7sa dihang nagdungan pag-awit ang mga bituon sa kabuntagon,
ug ang tanang mga anak sa Dios naninggit sa kalipay?
8 #
Jer. 5:22. “O kinsa ba ang nagtak-op sa mga pultahan sa dagat,
sa diha nga nabukas kini gikan sa tagoangkan;
9sa diha nga gihimo nako ang panganod nga maoy bisti niini,
ug ang bagang kangitngit maoy bakbak niini,
10ug gipahimutang nako niini ang akong utlanan,
ug gibutangan ug mga rehas ug mga pultahan,
11ug nag-ingon, ‘Kutob ra ikaw dinhi, ug dili na molapaw,
ug dinhi magpabilin ang mapagarbohon nimong mga balod’?
12“Nakasugo ba ikaw sa kabuntagon sukad sa pagsugod sa imong mga adlaw,
ug nagtultol sa kaadlawon sa dapit niini.
13aron kini makahupot sa mga ngilit sa yuta,
ug ang mga tawong daotan matay-og gikan niini?
14Kini nausab sama sa lapok ilalom sa silyo,
ug kini natina#38:14 natina: Sa Hebreo, mipatigbabaw. sama sa usa ka bisti.
15Gikan sa mga tawong daotan ang ilang suga gihikaw,
ug ang tinuboy nila nga bukton nabali.
16“Nakaadto ba ikaw sa mga tubod sa dagat,
o nakalakaw sa mga bung-aw sa kahiladman?
17Gipadayag ba kanimo ang mga ganghaan sa kamatayon,
o nakita ba nimo ang mga pultahan sa hilabihang kangitngit?
18Natukib ba nimo ang gilapdon sa yuta?
Ipahayag kon ikaw nasayod niining tanan.
19“Hain ba ang dalan padulong sa pinuy-anan sa kahayag,
ug hain ba ang dapit sa kangitngit,
20aron imo kining madala ngadto sa iyang dapit
ug aron imong mahibaloan ang agianan padulong sa balay niini?
21Ikaw nahibalo, kay daan ka na man nga natawo,
ug dako man ang gidaghanon sa imong mga adlaw!
22“Nakasulod ka na ba sa mga balay tipiganan sa yelo,#38:22 yelo Sa Hebreo, snow.
o nakita na ba nimo ang mga balay tipiganan sa ulan nga yelo,
23nga akong gitagana alang sa panahon sa kasamok,
alang sa adlaw sa gubat ug sa pagpakig-away?
24Unsa ba ang dalan diin atua gibahin ang kahayag,
o diin ang hangin sa silangan gisabwag sa ibabaw sa yuta?
25“Kinsa ba ang naghimo ug kanal alang sa tubig nga nagbaha,
ug usa ka agianan alang sa liti,
26sa pagpadala ug ulan sa yuta diin walay tawo,
didto sa kamingawan nga walay tawo,
27aron sa pagtagbaw sa awaaw ug biniyaan nga yuta
ug aron sa pagpatubo sa mga balili?
28“May amahan ba ang ulan,
o kinsa ba ang nanganak sa mga tulo sa yamog?
29Kang kinsa bang taguangkan naggikan ang yelo,
ug kinsa ba ang nanganak sa nagbagtok nga tubig sa kalangitan?
30Ang katubigan nahimong gahi sama sa bato,
ug ang ibabaw sa kahiladman nabagtok.
31 #
Job 9:9; Amos 5:8. “Makabugkos ba ikaw sa mga kadena sa Pleyades,
o makahubad sa mga higot sa Orion?
32Makamando ba ikaw sa Masarot diha sa ilang panahon,
o makagiya sa Oso uban sa mga anak niini?
33Nahibalo ba ikaw sa mga tulumanon sa kalangitan?
Makatukod ba ikaw sa gingharian niini diha sa yuta?
34“Makahimo ba ikaw sa pagpatugbaw sa imong tingog ngadto sa kapanganoran,
aron ang baha sa tubig makatabon kanimo?
35Makapadala ba ikaw ug mga kilat, aron sila mangadto,
ug moingon kanimo, ‘Ania kami’?
36Kinsa ba ang nagbutang ug kaalam diha sa kapanganoran#38:36 kapanganoran…gabon: Ang kahulogan sa mga Hebreo nga pulong niini lisod sabton.
o naghatag ug pagpanabot sa gabon?
37Kinsa ba ang makaihap sa mga panganod pinaagi sa kaalam?
O kinsa ba ang makakiling sa mga sudlanan ug tubig sa langit,
38sa diha nga ang abog magtapok
ug ang tibugol sa yuta magkaipon?
39“Makapangayam ba ikaw ug tukbonon alang sa liyon,
o makapatagbaw sa bata pa nga mga liyon,
40sa diha nga sila maglubog sa ilang mga lungib,
ug mag-atang diha sa ilang mga tagoanan?
41Kinsa ba ang nag-andam ug makaon alang sa uwak,
sa diha nga ang iyang mga kuyabog nagsangpit sa Dios,
ug nangasaag tungod sa kakulang sa pagkaon?
Currently Selected:
JOB 38: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
