JOB 16
16
Ang Tubag ni Job kang Elipas
1Unya si Job mitubag:
2“Nakadungog ako ug daghan nga ingon niini;
kamong tanan mga maglilipay nga makadaot.
3Aduna bay kataposan ang mga pulong nga walay hinungdan?
O unsay nakapahagit kanimo nga ikaw mitubag?
4Makasulti usab ako sama sa imong gisulti,
kon ikaw ania pa sa akong dapit;
ako makahimo sa pagdugtong sa mga pulong batok kaninyo,
ug maglingolingo sa akong ulo nganha kaninyo.
5Makalig-on ako kaninyo pinaagi sa akong baba,
ug ang paglipay sa akong mga ngabil makahupay sa inyong kasakit.
6“Kon ako mosulti, ang akong kasakit dili mahupay,
ug kon ako magpakahilom, unsa may mahupay kanako?
7Sa walay duhaduha ang Dios karon nagkapoy kanako;
iyang#16:7 iyang: Sa Hebreo, imong. gihimong alaot ang tanan nakong mga kaubanan.
8Ug gipakuyos niya#16:8 niya: Sa Hebreo, nimo. ako nga maoy usa ka pagsaksi batok kanako;
ang akong kaniwang nagpasundayag batok kanako,
kini nagpamatuod sa akong atubangan.
9Iya akong gikuniskunis diha sa iyang kaligutgot ug nagdumot kanako;
iyang gipakagot ang iyang mga ngipon batok kanako;
ang akong kaaway nagpahait sa iyang mga mata batok kanako.
10Gipanganga sa mga tawo ang ilang mga baba batok kanako;
gisagpa nila ang akong aping uban ang pagbugalbugal;
sila nagtigom batok kanako.
11Ang Dios nagtugyan kanako ngadto sa mga dili diosnon,
ug nagtugyan kanako ngadto sa mga kamot sa mga daotan.
12Diha ako sa kahamugaway ug ako iyang gipikas;
gikuptan niya ako diha sa liog ug gilambos aron madugmok;
iya usab akong gipahimutang ingon nga ig-onon;
13ang iyang mga tigpana naglibot kanako.
Iyang gihiwa ang akong mga rinyon ug wala maluoy;
iyang gibubo ang akong apdo ibabaw sa yuta.
14Iya akong gidasmagan sa makadaghan;
siya midasdas kanako ingon sa usa ka manggugubat.
15Nagtahi ako ug sako nga bisti aron itabon sa akong panit,
ug gibutang nako ang akong kusog diha sa abog.
16Ang akong nawong napula sa paghinilak,
ug sa akong mga tabontabon anaa ang hilabihang kangitngit,
17bisan ug walay pagpanglupig sa akong kamot
ug ang akong pag-ampo putli.
18“O yuta, ayaw taboni ang akong dugo;
ayaw hatagi ug kapahulayan ang akong mga paghilak.
19 #
Job 19:25. Bisan karon, tan-awa, ang akong saksi atua sa langit,
ug siya nga nagpamatuod kanako atua sa kahitas-an.
20Ang akong mga higala nagyubit kanako;
ang akong mata nagpaagas ug mga luha ngadto sa Dios,
21nga unta adunay molaban kanako ngadto sa Dios,
sama#16:21 sama: Sa Hebreo, ug. niadtong usa alang sa iyang isigkatawo!
22Kay inig-abot sa pipila ka tuig,
mosubay ako sa dalan diin ako dili na mobalik.
Currently Selected:
JOB 16: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
