MGA TAGA-GALACIA 3

Pagtuo o Balaod

1O mga hungog nga taga-Galacia! Kinsa bay naglamat kaninyo? Sa atubangan sa inyong mga mata si Jesu-Cristo tataw nga gipasundayag nga gilansang diha sa krus. 2Kini lamang ang buot nako nga masayran gikan kaninyo: Pinaagi ba sa mga buhat sa Balaod kamo nagdawat sa Espiritu o pinaagi ba sa pagpamati uban sa pagtuo? 3Hungog ba gayod kamo? Nakasugod na man unta kamo sa Espiritu, karon taposon ba diay ninyo kini sa unod? 4Giantos ba ninyo ang daghang mga butang sa wala lamay kapuslanan?—kon kini wala gayoy kapuslanan. 5Siya nga naghatag kaninyo sa Espiritu ug nagbuhat sa mga milagro diha kaninyo, naghimo ba kaninyo niini tungod sa mga buhat sa Balaod o tungod ba sa pagpamati uban sa pagtuo?

6 # Gen. 15:6; Rom. 4:3. Si Abraham usab “mituo sa Dios ug kini giisip ngadto kaniya ingon nga pagkamatarong.” 7#Rom. 4:16. Busa inyong makita nga ang mga tawo nga adunay pagtuo mao ang mga anak ni Abraham. 8#Gen. 12:3. Ug ang kasulatan nga nasayod nang daan nga ang Dios maghimong matarong sa mga Gentil pinaagi sa pagtuo, mipahibalo nang daan sa Maayong Balita ngadto kang Abraham nga nag-ingon, “Pinaagi kanimo mabulahan ang tanang kanasoran.” 9Sa ingon niana, ang mga tawo nga adunay pagtuo mabulahan uban kang Abraham nga may pagtuo.

10 # Deut. 27:26 (LXX). Kay ang tanan nga nagsalig sa mga buhat sa Balaod nailalom sa tunglo, kay nasulat kini, “Tinunglo ang tanan nga wala magsubay sa tanang nasulat sa basahon sa Balaod aron sa pagtuman niini.” 11#Hab. 2:4. Karon dayag nga walay tawo nga nahimong matarong sa atubangan sa Dios pinaagi sa Balaod, kay “Mabuhi ang matarong pinaagi sa pagtuo.”#3:11 Mabuhi…pagtuo o Ang matarong mabuhi pinaagi sa pagtuo. 12#Lev. 18:5. Apan ang Balaod wala magsukad sa pagtuo, kay “Siya nga nagbuhat niini mabuhi pinaagi niini.” 13#Deut. 21:23. Si Cristo milukat kanato gikan sa tunglo sa Balaod sa diha nga nahimo siyang tunglo alang kanato—kay nasulat, “Tinunglo ang matag usa nga gibitay diha sa kahoy”— 14aron nga pinaagi kang Cristo Jesus ang panalangin kang Abraham mahiadto sa mga Gentil, aron nga pinaagi sa pagtuo kita makadawat sa gisaad nga Espiritu.

Ang Balaod ug ang Saad

15Mga igsoon, sa tinawhanon nga paagi ako magsulti. Sa diha nga kauyonan na ang pakigsaad sa usa ka tawo, wala nay lain nga makasalikway o makadugang pa niini. 16Karon ang mga saad gihatag kang Abraham ug sa iyang kaliwat. Wala ingna, “Ug sa mga kaliwatan,” nga daw ingon ug daghan, kondili, “Ug sa imong kaliwat,” ingon nga usa ra, nga mao si Cristo. 17#Ex. 12:40. Apan ako magsulti niini: ang Balaod nga ulahing miabot human sa 430 ka tuig, dili makasalikway sa kasabotan nga giuyonan nang daan sa Dios, aron nga mapapas ang saad. 18#Rom. 4:14. Kay kon ang panulundon pinaagi pa sa Balaod, dili na diay pinaagi sa saad. Apan ang Dios mihatag niini kang Abraham pinaagi sa saad.

Ang Katuyoan sa Balaod

19Ngano nga ang Balaod pa man? Kini gidugang tungod sa mga kalapasan, hangtod nga moabot ang kaliwat nga maoy gisaad, ug kini gihatag sa mga anghel pinaagi sa usa ka tigpataliwala. 20Karon ang tigpataliwala dili lamang alang sa usa. Apan ang Dios usa ra.

21Ang Balaod supak ba diay sa mga saad sa Dios?#3:21 sa Dios: Wala kini sa ubang karaang sinulat. Dili gayod! Kay kon may gihatag pa nga balaod nga makapabuhi, ang pagkamatarong mahimong pinaagi gayod unta sa Balaod. 22Apan ang kasulatan nagbilanggo sa tanang butang ilalom sa sala aron ang gisaad nga pinasikad sa pagtuo kang Jesu-Cristo ikahatag ngadto sa mga nagtuo.

23Apan sa wala pa moabot ang pagtuo, kita nabilanggo ilalom sa Balaod, pinugngan hangtod nga ang pagtuo napadayag. 24Busa ang Balaod nahimong atong tig-atiman hangtod kang Cristo, aron nga kita himoong matarong pinasikad sa pagtuo. 25Apan karon nga ang pagtuo miabot na, dili na kita ilalom sa tig-atiman, 26kay diha kang Cristo Jesus kamong tanan nahimo na man nga mga anak sa Dios pinaagi sa pagtuo. 27Kay ang tanan kaninyo nga gibautismohan ngadto kang Cristo nagsul-ob kang Cristo. 28Walay Judio o Grego, walay ulipon o gawasnon, walay lalaki o babaye, kay kamong tanan usa ra diha kang Cristo Jesus. 29#Rom. 4:13. Ug kon kamo mga iya ni Cristo, kaliwat kamo ni Abraham, mga manununod sumala sa saad.

Currently Selected:

MGA TAGA-GALACIA 3: ABCEB

Highlight

Copy