1 CORINTO 2

Ang Mensahe nga si Cristo Gilansang sa Krus

1Sa akong pag-anha diha kaninyo, mga igsoon, mianha ako nga wala magsangyaw kaninyo sa misteryo#2:1 misteryo: Sa ubang karaang sinulat, pagpamatuod. sa Dios ginamit ang hinashasan nga mga pulong o kaalam. 2Kay gituyo nako nga dili mahibalo sa bisan unsa gawas lamang kang Jesu-Cristo ug nga siya gilansang sa krus. 3#Buh. 18:9. Ug ako, diha sa kahuyang ug kahadlok ug sa hilabihan nga pagkurog, nakig-uban kaninyo. 4Ang akong pulong ug pagwali dili pinaagi sa madanihong mga pulong sa kaalam kondili diha sa pagpadayag sa Espiritu ug sa gahom, 5aron ang inyong pagtuo dili diha sa kaalam sa mga tawo kondili diha sa gahom sa Dios.

Ang Kaalam sa Dios

6Apan ang kaalam nga among gisulti ngadto sa mga hamtong, kaalam nga dili iya niining panahon o sa mga pangulo niini nga lumalabay. 7Apan ang among gisulti kaalam sa Dios nga tinagong misteryo nga gitakda nang daan sa Dios sa wala pa ang kapanahonan alang sa atong kahimayaan. 8Walay bisan usa sa mga pangulo niining panahona nga nakasabot niini kay kon nakasabot pa sila, dili unta nila ilansang sa krus ang Ginoo sa himaya.

9 # Isa. 64:4. Apan ingon sa nasulat,

“Unsay wala makita sa mata,

o madungog sa dalunggan,

o wala mosantop sa kasingkasing sa tawo,

maoy gitagana sa Dios alang kanila

nga nahigugma kaniya.”

10Kay kanamo nagpadayag ang Dios pinaagi sa Espiritu. Kay ang Espiritu nagsusi man sa tanang mga butang, bisan sa mga lalom nga mga butang sa Dios. 11Kay kinsa bang tawhana ang nasayod mahitungod sa tawo gawas sa espiritu sa tawo nga anaa kaniya. Sa ingon niana usab, walay bisan usa nga makasabot mahitungod sa Dios gawas sa Espiritu sa Dios. 12Apan kita nakadawat dili sa espiritu sa kalibotan kondili sa Espiritu nga gikan sa Dios, aron kita makasabot sa mga butang nga gihatag sa Dios kanato. 13Ug kini among gisulti pinaagi sa mga pulong nga wala itudlo sa tawhanong kaalam kondili sa gitudlo sa Espiritu, naghubad sa mga espirituhanong butang ngadto sa mga nagbaton sa Espiritu.#2:13 naghubad…Espiritu: o naghubad sa mga espirituhanong butang diha sa espirituhanong pinulongan o nagtandi sa mga espirituhanong butang ngadto sa espirituhanon.

14Ang tawo nga kalibotanon dili modawat sa mga butang sa Espiritu sa Dios, kay alang kaniya kini mga binuang, ug siya dili makahimo pagsabot niini tungod kay kini matugkad lamang sa espirituhanon nga paagi. 15Apan ang tawong espirituhanon makatugkad sa tanang mga butang apan siya dili matugkad ni bisan kinsa. 16#Isa. 40:13 (LXX). “Kay kinsa ba ang nakasabot sa hunahuna sa Ginoo aron motudlo kaniya?” Apan atong nabatonan ang hunahuna ni Cristo.

Currently Selected:

1 CORINTO 2: ABCEB

Highlight

Copy