Zekaria 2

Menyirok ma thol ma kipima

1Atiŋo waŋan malo t'aŋiyo, aka neni, jacwo m'otiŋo thol ma kipima i cinge. 2Kenyo apenjo go ni, “Ikadho kune?” Go odwokan ni, “Akadho kipima Yerusalem ŋeyo dwoŋo mere kodi boro mere.”

3Aka neni, malaika m'oyido luwo kodan obino malo, aka malaika man owok romo gi go, 4aka owaco rigo ni, “Ŋweci, iluw gi jayac no, aka iwaci ni, ‘Yerusalem ladoŋ paka adec m'othangere, ro ji kodi ogwaŋe ma jonitie i iye.’ 5Kole An, Rwoth awaco ni alabedo rigo cel ma kor ot thoko, aka alabedo dwoŋ i go.”

Ilwoŋo jotwec dok peco

6Awi, awi, ringi woko i lowo ma yumalo, Rwoth waco, kole paka koyin aŋwen ma polo, atieko kedhin woko, Rwoth waco. 7Awi, awi, Zayon kwale, in m'ibedo gi nyar Babilon. 8Kole Rwoth pa lwak jolweny waco ama; ri dwoŋ ma go ooran bongi nonin ma jonyaga win, kole ŋat'ogeyin, meno ogeyo tongi waŋan. 9Kole ee acegin yengo cingan kwoŋ jo, aka ŋecin pajo jolakinyaga jo, aka wilaŋeyo nike Rwoth pa lwak jolweny ooran.

10Koki ri kisangala aka fore, Awi nyar Zayon, kole neni, ee acegin bino aka alabedo i dier in, Rwoth waco. 11Nonin kweth jolariwere gi Rwoth i ndelo no, aka jolabedo ji paran, aka alabedo i dier in, aka ilaŋeyo nike Rwoth pa lwak jolweny ooran bongin. 12Rwoth lalunjo Yuda paka adec pere i lowo maleŋ, aka go layero Yerusalem kendo.

13Kudere, win ji je, ruwaŋ Rwoth, kole go oay wok i kabedo pere maleŋ.

Currently Selected:

Zekaria 2: DHOPE

Highlight

Compare

Copy