Kwan 10
10
Gwarin ma feza
1Rwoth oluwo gi Musa ka waco ni: 2“Tim gwarin ario ma feza; itimi jo matek pa nyundu; aka ibino oro jo ma lwoŋo cokirok, kodi ma cego kambi. 3K'okudhi jo je, cokirok gibe jobino cokere ruwaŋin i dhiot ma Wema ma romo. 4To k'okudhi acel kende, nyaka to jotel, jodongo ma nonin ma Isiraili, ama jobino cokere ruwaŋin. 5Ka wikudho gwara, kambin je ma yuthenge ma yupiny jobino ay; 6ka okudhi gwara mar'ario, kambin je ma yuthenge ma yupiny jobino ay. Wiripo kudho gwara hongo je ka joay. 7To ka inomiti kweth jowocokere, ikudhi to kiri goy ndur. 8Wot Aron, jocway ri Were i wi migam, jobino kudho gwarin; me bino bedo cik ma cil gi cil ri luse je. 9Ka winokidhi i lweny i piny mewin kwoŋ jokwor ma jodiyo win, wibino goyo ndur gi gwarin, ŋey wonyali poyo win ruwaŋ Rwoth Were mewin to wiboth kwoŋ jokwor mewin.”
10“I ndelo mewin bende ma forok, i kalimin mewin ma Dwe Manyen gi kalimin megi manyadini, wiripo kudho gwarin ka wikelo mic mewin awaŋa kodi cowirok mewin ma mic ma siem; jobino bedo paka rapoy i nyingi win ruwaŋ Rwoth Were mewin. An abedo Rwoth Were mewin.”
Joisiraili jocako woth pajo
11I oro mar'ario, i dwe mar'ario, ka ndelo piero ario ma dwe, pondeponde otiŋere malo to umo tabenakulo ma cikirok. 12Kenyo to Joisiraili joay cako woth pajo wok i thim ma Sinai, to pondeponde cungo i thim ma Paran. 13Joay marapena i or pa Rwoth ri Musa. 14Kitipa ma kambi pa nyikway Yuda ama jopen ay, i kitipin pajo ma lweny aka jadwoŋ ma kitipa oyido obedo Nason wod pa Aminadab. 15Jadwoŋ pa jolweny ma nono pa nyikway Isakar onwaŋo obedo Nethanel wod pa Zuar; 16aka jadwoŋ ma kitipa pa jolweny ma nono pa nyikway Zebulun onwaŋo obedo Eliab wod pa Helon.
17Kenyo t'idolo tabenakulo, to nyikway Gerisom gi nyikway Merari, ma jotiŋo Wema pa Rwoth joay. 18M'oluwere gi kitipa ma kambi ma jolweny pa Ruben joay, aka jadwoŋ pajo oyido obedo Elizur wod pa Sedur. 19Jadwoŋ ma kitipa pa jolweny ma nono pa nyikway Simeo oyido obedo Selumiel wod pa Zurisaday. 20To jadwoŋ ma kitipa pa jolweny ma nono pa nyikway Gad oyido obedo Eliasaf wod pa Duwel.
21Kenyo to nyikway Kohath ma jotiŋo gigipiny maleŋ joay, t'ijengo tabenakulo mafodi jok'otundo. 22M'oluwere gi kitipa ma kambi nyikway Efrayim joay i kitipin pajo ma lweny aka jatel ma kitipa pa jolweny oyido obedo Elisama wod pa Amihud. 23Jadwoŋ ma kitipa pa jolweny pa nyikway Manase oyido obedo Gamaliel wod pa Pedazur. 24Jadwoŋ ma kitipa pa jolweny ma nono pa nyikway Benyamin oyido obedo Abidan wod pa Gideon.
25Kenyo kitipa ma kambi pa nyikway Dan oay kareno obedo paka jakur ma yucen ma kambin je, ri kitipin pa jolweny, aka jadwoŋ ma kitipa pa jolweny oyido obedo Ahiyeza wod pa Amisaday 26Jadwoŋ ma kitipa pa jolweny ma nono pa nyikway Aser oyido obedo Pagiel wod pa Ociran. 27Jadwoŋ ma kitipa pa jolweny ma nono pa nyikway Nafital oyido obedo Ahira wod pa Enan. 28Me oyido a can ma woth mapa Joisiraili i kitipin pa jolweny pajo, munyo joay.
29Musa owaco ri Hobab wod pa Reuel Jamidian, ba cipa Musa ni, “Wakidho i kabedo ma Rwoth owaco ni, ‘Alamiyo win.’ Biye gi wan, aka walakurin maber, kole Rwoth otieko ciko bero ri Isiraili.” 30To Hobab dwoko go ni, “Akilakadho, to aladok i piny paran won gi bongi wade paran.” 31To Musa waco rigo ni, “Mondo ikir'iwey wan, kole iŋeyo kama wanyalo keth'iye kambi i thim aka ibino bedo riwan paka waŋ wan. 32Kucel, k'ikadho gi wan, bero je ma Rwoth otim riwan, gimoro acel no walatimo rin.”
33Ameno to joay wok i got pa Rwoth woth ma ndelo adek gi Kakan ma Cikirok pa Rwoth kareno otelo jo i woth ma ndelo adek no, ma rango rijo kama joywomer'iye. 34Pondeponde pa Rwoth oyido telo jo odieceŋ ka jowok i kambi.
35 #
Zab 68:2
Kisi hongo ka otiŋ malo Kakan ma Cikirok, Musa oyido waco ni,
“Ay malo, Awi Rwoth, weyi jokwor perin jowokedhere,
aka jokwor perin jowoŋweci ruwaŋin.”
36Aka hongo je k'ocungo, Musa oyido waco ni,
“Dwoki, Awi Rwoth ro pecin gana gi gana ma Isiraili.”
Currently Selected:
Kwan 10: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
