Mariko 4

Ageca kwoŋ jacwoyo

(Mat 13:1-9; Luk 8:4-8)

1 # Luk 5:1-3 Yesu odoko ocako fonjo ji i thengi wakawaka ma Galili. Lwak ji m'oasere jocokere bonge, am'omiyo go odonjo i wakawaka to bedo i ye. Aka ji je jobedo dho thengi wakawaka. 2Yesu ofonjo gigipiny madit munyo luwo i agecin, aka i fonji pere owaco ni, 3“Winji win! Dhano moro okidho cwoyo. 4Aka munyo bayo kodhi, megi opodho i thengi royo, to winyin jobino jodimo woko. 5Kodhi megi opodho wi tele kama lowo rep'iye; jokwako twi, rupiri lowo oyido rep. 6To munyo ceŋ oliel, orewo jo, to paka tiendi gin oyido orewere, joner to jothwo woko. 7Kodhi megi opodho kama dikudhin, aka kudhin odongo gi jo to mwonyo jo woko ma jok'onyalo nyak gimoro. 8Aka kodhi megi opodho i lowo maber ma diwa, to jonyak withi gin, ma megi nyingi gin piero adek, megi piero aucel, megi miya acel.”

9Aka Yesu owaco ni, “Ŋata nigi ithe ma winjo wowinji.”

Atoŋa mar'agecin

(Mat 13:10-17; Luk 8:9-10)

10Gikenyo munyo Yesu oyido nikende, joma onwaŋo joni bonge, kanyacel gi jofonjirok pere apar g'ario, jopenjo go tiendi ageca me. 11Yesu owaco rijo ni, “Otiek miyo win ŋeyo nyaliŋliŋ ma Ker pa Were, to jonica ma joniwoko iwaco rijo gigipiny g'agecin.” 12#Isa 6:9-10 “Ŋey adieri,

Jowoŋiy to jok'onyal neno,

jowowinji to jok'onyal niaŋ,

Ipoyo di jonyalo gik bongi Were,

to cwako jo.”

Yesu tito dwoŋ ageca kwoŋ jacwoyo

(Mat 13:18-23; Luk 8:11-15)

13Gikenyo Yesu openjo jo ni, “Kere wikuya dwoŋ ageca me? Onyo winoŋey nedi dwoŋ agecin man? 14Jacwoyo cwoyo wac pa Were. 15Diceŋ wac megi podho thengi royo; meno ji ma jowinjo wac no, to tekin jotieko winjo, to Sitan bino to kwalo woko wac m'onwaŋo ocwoy i cuny gin. 16Ji man jocale kodi kodhi m'opodho wi tele ma lowo rep'iye. Me a joma tekin jowinjo wac to jojolo gi kisangala. 17To wac no kimoki i cuny jo, aka bedo ye i cuny jo nyaka hongo macek. To ka teko kosa acanda moro obino, ro wac no, jono jopodho mayot. 18Ji man jocale kodhi m'ocwoy kama dikudhin. Me a joma jowinjo wac, 19to rembo ri kwo ma piny me, kodi awanya ma ŋaŋo ma piny kodi giman mathoth jomwonyo wac to kinyak gimoro. 20To ji megi jocale kodhi m'ocwoy i lowo maber ma diwa. Jowinjo wac, jojolo, aka wac nyak: Megi piero adek, megi piero aucel, megi miya acel.”

Tala m'oum g'agono

(Luk 8:16-18)

21 # Mat 5:15; Luk 11:33 Gikenyo Yesu omedo waco ni, “Tala bende odoko iriewo iy'agono nedi? Kosa iketho nedi i tiendi kitanda, ma k'olier malo wi akare mere? 22#Mat 10:26; Luk 12:2Kole gim'opan je ibino wodho kamaler, aka gim'oum ibino yawo kamaler. 23Ŋata nigi ithe ma winjo gim'afonjo wowinji.”

24 # Mat 7:2; Luk 6:38 To waco rijo ni, “Kethi win i tim gima wiwinjo; paka ipima gim'imiyo ji, apaka bende ibino kipima rin gim'ibino miyin, aka ibino medin kiri man. 25#Mat 13:12; 25:29; Luk 19:26Aka ŋata nitie gi gigipiny mathoth ibino medo go man, ŋat'ongoye gine ibino mayo go kada nyaka mathin m'onwaŋo go nitie gine.”

Ageca kwoŋ kodhi ma twi aka dongo

26Yesu owaco ni, “Ker pa Were cale dhano m'ocwoyo kodhi i ndelo pere. 27Go nindo wor, to cew odikin to yindin odieceŋ gipi, kareno kodhi twi to dongo. Go kiŋey kada paka gino dongo. 28Lowo won miyo gim'opidhi dongo to nyak. 29#Yowel 3:13Gino kutho turo thiaŋ to ŋok, rumacen withe gi nyinge tegino. Ka kal ociek i ndelo, won ndelo kwanyo athero, rupiri keco otundo.”

Ageca kwoŋ kodhi m'ondhilo

(Mat 13:31-32,34; Luk 13:18-19)

30Yesu odoko owaco ama: “Di wawaci ni Ker pa Were cale aŋo? Kosa ageca aŋo ma wanoori ma tito? 31Gime cale nyaka kodhi m'ondhilo ma i ndir ma pidho thin swa loyo kodhi man je ma piny. 32To ka otiek pidho, twi to dongo madwoŋ loyo yen wadi je; rieyo jange madongo, aka winyin jonyalo geto od gin i jange.”

33Yesu bin fonjo ji munyo bolo agecin mathoth thoth paka meno. 34Oluwo gi jo i royo m'amiyo jowoniaŋ wac. Go k'oluwo gi jo m'ongoye agecin; to ka nitie gi jofonjirok pere wegi kakendi gin, tito rijo gimoro je gi thenethene mere.

Yesu kweyo koyo

(Mat 8:23-27; Luk 8:22-25)

35Munyo piny oyutho, Yesu owaco ri jofonjirok pere ni, “Wapor win loka ma koca ma wakawaka.” 36Joweyo lwak ji, to jodonjo i ye gi Yesu wegi kendi gin, to jocako cewirok. Ye megi oyido bende nitie kenyo. 37Gikenyo koyo madwoŋ obino gi meni to yengo wakawaka, to miyo pi sira to cako donjo i ye pa kidho poŋo. 38Yesu oyido nitie cen i ye, otheno wiye nindo. Jocewo go to jowaco rigo ni, “Jafonji, ikidew ni wacegin tho?” 39Yesu ocew, obwoko koyo no, to waco ri wakawaka ni, “Kudere! Kwe!” Aka koyo okwe to wakawaka je pie. 40Gikenyo Yesu owaco ri jofonjirok pere ni, “Wibwok aŋo? Wingoye gi yeyo kada masisiri?” 41Jodhier swa to wegi jowaco kendi gin ni, “Me ŋa me ma kiri koyo gi wakawaka je winjo wac pere!”

Currently Selected:

Mariko 4: DHOPE

Highlight

Copy

Compare