Mariko 11
11
Yesu donjo Yerusalem gi dwoŋ
(Mat 21:1-11; Luk 19:28-40; Yoh 12:12-19)
1Munyo joriko Yerusalem, i tindi ma Bethfage kodi Bethania, cegin gi got Oliv, Yesu ooro jofonjirok pere ario kadho yuwiye, 2gi wac me ni, “Kidhi win loka ma yuwiy win, aka tekin widonj'iye wibino nwaŋo nyathi punda m'otwey, ma fodi dhano k'obedo i wiye; gony to wikelo ka. 3Ka moro openji win ni, ‘Witimo aŋo?’ Waci win ni, ‘Rwoth ama yenyo punda me aka bino dwoko go ka mayot.’ ” 4Jokidho to jonwaŋo nyathi punda moro otwey dhiot i thengi royo, to jogonyo. 5To jomoro m'onwaŋo jocungo kenyo jopenjo jo ni, “Witimo aŋo no? Raŋo ma wigonyo nyathi punda no?” 6Jodwoko paka Yesu owaco rijo, to jono joweyo jo, to jokadho gi nyathi punda no. 7Jokelo nyathi punda no ri Yesu, to jopedho nangin i dieŋeye, to Yesu bedo i wiye. 8Ji mathoth jopedho nangin i royo, aka joman jopedho jangi yen ma joturo i dudi. 9#Zab 118:25-26Aka joma jotelo yuwiye kodi joma joluwo go yucen jowero ni, “Ozana! Jasilwany a ŋata bino i nyingi Rwoth! 10Silwany wobedi ri Ker ma bino mapa bawan Daudi! Ozana malo i polo!”
11Yesu otundo Yerusalem, to donjo i Ot pa Were; aka munyo otieko ŋiyo korin gi korin oneno gimoro je, owok to kadho Bethania gi jofonjirok apar g'ario, paka piny oyido kidho yutho.
Yesu kwoŋo makuyu
(Mat 21:18-19)
12Yawere mere munyo jo ni royo jodwoko wok Bethania, Yesu onwaŋo winjo kec. 13Munyo go oneno gi bor bor kiti makuyu moro m'icamo, ma boke otwere kwoŋe, okidho neno ni kono nyalo nwaŋo kwoŋe nyandere, to munyo otundo dho tiende, k'onwaŋo gimoro kwanyo woko boke; rupiri meno oyido ki ndir ma nyandere nyak'iye. 14Yesu owaco ri makuyu no ni, “Ongoye moro m'odoko ocam nyandere kwoŋin.” To jofonjirok pere jowinjo gima go owaco no.
Yesu kidho i Ot pa Were
(Mat 21:12-17; Luk 19:45-48; Yoh 2:13-22)
15Munyo jotundo Yerusalem, Yesu odonjo i Ot pa Were, to cako riemo woko joma nyewere kodi jomitan i Ot pa Were. Oriewo mezin pa jowili pesa, kodi kombere pa joma onwaŋo jotana akurin; 16aka k'oyeyo kada moro wotho gi gimoro i Ot pa Were. 17#Isa 56:7; Yer 7:11Ofonjo jo ka waco ni, “K'ondiki i Ndiko Maleŋ ni Ot paran ibino lwoŋo ni Ot ma kwayo mapa nonin je? Ama win wiloko kapondo pa jokwo ayino!”
18Jotel pa jocway ri Were i wi migam kodi jondiko jowinjo gime to jocako rango royo ma neko Yesu. To jolworo go, rupiri lwak ji gibe oyido odhier kwoŋ fonji pere. 19Munyo piny oyutho Yesu gi jofonjirok pere joeye i tindi no.
Fonji m'owok kwoŋ makuyu
(Mat 21:20-22)
20Yawere mere odikin, munyo jowotho i royo, jonwaŋo makuyu no othwo wok malo kiri i tiende. 21Petero opoyo gima nyoro otimere to waco ri Yesu ni, “Jafonji, panen! Makuyu ma nyoro ikwoŋo ca otieko thwo!” 22Yesu odwoko jo ni, “Bedi win gi yeyo i Were. Adieri awaco riwin, 23#Mat 17:20; 1 Kor 13:2ŋat'owaci ri got me ni, ‘Mukere woko, ikidhi imunyere i wakawaka.’ Ongoye gi kiganagana i cunye, to yeyo ni gima go owaco bino timere, ibino timo rigo gino. 24Am'omiyo awaco riwin, ka wikwayo gimoro, yey win ni witieko limo aka ibino miyo win gimoro je ma wikwayo. 25#Mat 6:14-15Aka ka wicungo wikwayo, cwaki win reco je ma nyatoro otimo riwin, aka nyaka Bawin manitie i polo bende bino cwako reco mewin. 26[Ka wikicwaki jowoti win, kada Bawin manitie i polo bende k'ocwaki reco mewin”].
Penjo meni pa Yesu
(Mat 21:23-27; Luk 20:1-8)
27Odoko jogik Yerusalem, aka munyo Yesu oyido wotho i Ot pa Were to jotel pa jocway ri Were i wi migam kodi jondiko kanyacel kodi jotel pa ji jobino bonge to jopenjo go ni, 28“Inwaŋo meni kune ma timo gigipiny me? Kosa ŋa m'omiyin meni ma timo gigipiny me?” 29Yesu odwoko jo ni, “Alapenjo win gimoro acel kende; dwokan win aka abino waco riwin kam'anwaŋ'iye meni ma timo gigipiny me. 30Meni pa Yohana ma batisimo ji owok kune, bongi Were kosa bongi ji? Dwokan win.”
31Wegi jocako piem kendi gin ni, “Wadwoki nedi? Ka wadwoko ni, ‘Owoki i polo.’ Go bino waco ni, ‘To raŋo ma wikwero yeyo go?’ 32Kosa di wadwoki ni, ‘Owoki bongi dhano?’ ” (Ato onwaŋo jolworo ji, rupiri dhano je onwaŋo otero Yohana paka jatuci wac Were.) 33Gikenyo jodwoko Yesu ni, “Wakuya.” To Yesu waco rijo ni, “Abende ak'owaci riwin kama meni ma atimo gine gime wok'iye.”
Currently Selected:
Mariko 11: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
