Matayo 3
3
Fonji pa Yohana Jakibatisa
(Mar 1:1-8; Luk 3:1-18; Yoh 1:19-28)
1I hongo no Yohana Jakibatisa obino to cako tito wac Were i thim ma Yuda munyo waco ni: 2#Mat 4:17; Mar 1:15“Ŋuti win, rupiri Ker ma polo nicegin!” 3#Isa 40:3Yohana oyido a ŋata Isaya jatuci wac Were cango oluwo kwoŋe con munyo waco ni:
“Nyatoro koko i thim,
yik win royo pa Rwoth,
tir win rigo royo pere.”
4 #
2 Kerin 1:8
Ruk pa Yohana oyido otim ma yer ŋamia, aka go oyido tweyo piere gi del ma pien, aka cemo pere oyido obedo bonyo kodi mo kic. 5Ji jobino bonge wok Yerusalem, wok iy'adec ma Yuda, kodi wok iy'adec je m'othoko jwom Yordan. 6Jotuco reco pajo aka obatisa jo i Yordan.
7 #
Mat 12:34; 23:33 Munyo Yohana oneno kweth Jofarisayo kodi Josadukayo jobino bonge obatisa jo, owaco rijo ni, “Win sidwol malasang, ŋata onyutho win rieko ma both kwoŋ keme pa Were macegin bino? 8Tim win gima nyutho nike witieko ŋuto reco mewin kicutho. 9#Yoh 8:33Aka wikiri wipar ni winyalo nwaŋo kagoŋirok munyo wiwaco ni, ‘Abraham obedo kwari wan.’ Awaco riwin ni Were nyalo kwanyo kada telin me to loko nyikway Abraham! 10#Mat 7:19Kada pama le otiek yiko ma toŋo yen gi tiendi gin! Yath je ma kinyak gimaber ibino toŋo woko t'ibolo i mac! 11Abatisa win kodi pi ma nyutho nike witieko ŋuto; to ŋata bino luwan cen bino kibatisa win gi Cuny Maleŋ kodi mac. Go loyan gi dwoŋ tektek m'akiripi kada tiŋo war pere. 12Go nitie g'odher pere ma yeko nyingi kal je; go bino coko kal pere ma lilo to konjo i dero pere, to waŋo woko cuŋ i mac makitho.”
Batisimo pa Yesu
(Mar 1:9-11; Luk 3:21-22)
13I hongo no Yesu owok Galili to kidho Yordan to bino bongi Yohana ni obatisa go. 14To Yohana otemo juko go ka waco rigo ni, “Iŋat'iripo kibatisa an, odoko ibino bongan ayino!” 15To Yesu odwoko go ni, “Weyi watim ameno pama. Kole i tim me wabino tiro gimoro je ma Were yenyo.” To Yohana yeyo.
16Tekin otiek kibatisa Yesu, owok i pi, gikenyo polo oyawere rigo aka oneno Cuny Maleŋ loro piny i cal p'akuru to pie kwoŋe. 17#Cak 22:2; Zab 2:7; Isa 42:1; Mat 12:18; 17:5; Mar 1:11; Luk 9:35Gikenyo dwondi nyatoro oluwo wok i polo ni, “Me a Wodan won m'amaro, aka asangala gine.”
Currently Selected:
Matayo 3: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.