Matayo 24
24
Yesu luwo kwoŋ rerok pa Ot pa Were
(Mar 13:1-2; Luk 21:5-6)
1Yesu owok i Ot pa Were aka munyo onwaŋo kadho jofonjirok pere jobino nyutho go paka Ot no oger. 2To go odwoko jo ni, “Wineno gigipiny me je, k'ameno? Adieri awaco riwin, ongoye ka tele kad'acel m'ibino weyo wi nyawote ma k'okedhi woko.”
Teko kodi acanda ma bino
(Mar 13:3-13; Luk 21:7-19)
3Munyo go obedo wi got Oliv, jofonjirok jobino bonge nyaliŋliŋ to jokwayo go ni, “Waci riwan ndir ma gigipiny me bino timer'iye, aka ranyuth aŋo m'obedi kwoŋ bino perin, kodi apa gik piny?” 4Yesu odwoko jo ni, “Gwokere win, moro wokiri wowondi win, 5rupiri ji kweth jolabino gi nyingan, munyo jowaco ni, ‘An a Kristo.’ Jobino wondo ji mathoth. 6Aka wibino winjo kwoŋ lweny kama cegin kodi kamabor; to wikiri wibedi gi rembo rupiri gigipiny me ripo timere, to kareno gik piny fodi. 7Kole nono bino lwenyo gi nono man, to ker acel lwenyo gi ker man, aka kec bino bedo kodi yengirok pa piny i kabedo m'omore; 8me je cakirok pa candirok, paka ŋedi kafodi nyathi k'onywol.”
9 #
Mat 10:22
“Gikenyo jobino ketho win i teko, to joneko win; aka nonin je bino dak win kwoŋbedo an. 10Gikenyo jomathoth jobino podho i yeyo pajo to josegeya jowoti gin, to jodakere. 11Aka jotuci wac Were ma twodo mathoth jobino tundo to jowondo ji mathoth. 12Aka paka tim mareco medere, mar pa ji mathoth ri wadi jo bende bino rumo woko. 13#Mat 10:22To ŋat'ocir teko no kiri i gike ama bino both. 14Aka Wac Manyen Maber kwoŋ Ker pa Were me, ibino fonjo i piny gipi paka ranyuth ri nonin je, aka nyaka gik piny bino tundo.”
Lworo madwoŋ swa
(Mar 13:14-23; Luk 21:20-24)
15 #
Dan 9:27; 11:31; 12:11 Am'omiyo ka wineno gir'amien madwoŋ ma Daniel jatuci wac Were cango oluwo kwoŋe ojengi i Ot pa Were (ŋata soma wac me woŋey dwoŋ mere). 16Gikenyo joma nitie Yuda joworingi wi gote; 17#Luk 17:31aka ŋata ni wi ot wokiri wolori piny kwanyo gima ni ot pere; 18aka ŋata ni ndelo wokiri wogiki peco kwanyo ruk pere. 19Aka kidamba madwoŋ bino bedo ri mon ma yac, kodi mon ma jonigi nyithindho maŋic ma fodi jodhoth i ndir no! 20Kway win ni ŋwec mewin wokiri wobedi i ndir ma cwir munyo pe oŋico piny, kosa i Sabato. 21#Dan 12:1; Meny 7:14Ato i hongo no candirok madwoŋ kidho bedo, ma fodi yado k'obedo ye wok i cakirok pa piny tundo pama, aka gima pameno odoko k'obedi kendo. 22Aka bedi Were k'otieko kimoja ye woko ndelo no, onwaŋo ongoye dhano ma d'oboth; to ri bero pa jom'oyer, Were bino kimoja ye woko ndelo no.
23I hongo no, ka moro owaci riwin ni, “Panen, Kristo ee!” Kosa ni “Go dica.” Wikiri wiyey. 24Kole Kristo ma twodo kodi jotuci wac Were ma twodo jobino tundo to jotimo ranyuth madongo kodi gir'aura ma wondo ji, bedi nyalere di jowondo kiri jom'oyer. 25Neni win, eno atieko waco riwin gime mafodi ndir no k'otundo. 26#Luk 17:23-24Am'omiyo, ka jowaci riwin ni, “Panen, go nitie i thim.” Wikiri wikidhi yukorago; ka jowaco ni, “Panen go dica i kisika ma ot.” Wikiri wiyey. 27Kole paka lithkoth wok yuwok ceŋ aka menyo piny kiri yupodho ceŋ, apaka bino pa Wod Dhano bende labedo. 28#Luk 17:37Kama gimoro otho iye, ama acut jocoker'iye.
Dwoko pa Wod Dhano
(Mar 13:24-27; Luk 21:25-28)
29 #
Isa 13:10; 3:15; Yowel 2:10-11; 3:15; Meny 6:12-13 Aka ka tekin candirok ma ndir no rumo, waŋceŋ bino lokere macol aka dwe k'oliel. Mikalin jobino oy wok i polo, aka meni ma polo bino yengere. 30#Dan 7:13; Zek 12:10-14; Meny 1:7I hongo no, nyaka ranyuth pa Wod Dhano bino nenere i polo, aka nonin je ma piny jobino ywak, aka jobino neno Wod Dhano ka dwoko i pondeponde ma polo gi meni kodi dwoŋ m'oasere; 31gikenyo go bino oro jomalaika pere kudho gwara ma ywak malo, aka jobino coko jom'oyer pere wok i tum aŋwen ma koyo, wok i tielo acel ma polo tundo i man.
Fonji kwoŋ makuyu
(Mar 13:28-31; Luk 21:29-33)
32Fonjere win kwoŋ makuyu, tekin jange lothi to wodho boke mayom, wiŋeyo ni ndir ma ceŋ onyo cegin tundo. 33Am'omiyo bende ka wineno gigipiny me je, wibino ŋeyo nike go cegin tundo, ni dho waŋkac won. 34Adieri awaco riwin, luse ji ma pama me k'orumi woko mafodi gigipiny me je k'otimere. 35Polo gi piny bino rere woko, to wac paran k'orere woko.
Ongoye moro m'oŋeyo ndelo kosa hongo
(Mar 13:32-37; Luk 17:26-30,34-36)
36To ndelo no kosa hongo mere ongoye ŋat'oŋeyo, kada jomalaika ma polo, kada Wod Were, kwanyo woko Bamere kende. 37#Cak 6:5-8Paka cango obedo i ndir pa Nowa, apaka bende bino pa Wod Dhano bino bedo. 38Ato i ndir mafodi mikula k'omadh'iye piny, ji oyido jocemo, jomedho, cwo jonywomo, nyir jonywomere, cuka ndelo ma Nowa odonj'iye i ye, 39#Cak 7:6-24aka jok'oŋeyo cuka mikula obino to mol gi jo; apaka bende bino pa Wod Dhano bino bedo. 40I hongo no cwo ario jobino bedo i ndelo; ibino kwanyo acel t'iweyo nyawote. 41Mon ario jobino rego wi kidi; ibino kwanyo acel t'iweyo nyawote. 42Am'omiyo yikere win, rupiri wikuya ndelo ma Rwoth obin'iye. 43#Luk 12:39-40To ŋey win gime, ni bedi won peco ŋey hongo ma jakwo bin'iye dier wor, d'oyikere aka di k'oyeyo jakwo turo ot. 44Am'omiyo, wibende yikere win, rupiri Wod Dhano labino i hongo ma wikigen.
Jatic m'ogenere kosa ma k'ogenere
(Luk 12:41-48)
45Ŋat'obedo jatic mariek ma genere ma rwoth pere nyalo ketho go kuro peco pere? Meno ŋata miyo jopeco cemo i hongo m'otire. 46Jatic no jasilwany ma rwoth pere ka dwoko, bino nwaŋo go timo ameno. 47Adieri awaco riwin, rwoth pere bino ketho go kuro lim pere je. 48To ka jatic marac won owaci kende ni, “Rwoth paran ogalo.” 49To won cako goyo jotic wadi, cemo to medho kodi jomero, 50rwoth pere bino dwoko i ndelo ma go kigen, kodi i hongo ma go kuya; 51to miyo go gir'acula, to ketho go i candirok kanyacel gi jorendirok, kama ji jobino ywak'iye gi kay'iye lak.
Currently Selected:
Matayo 24: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
