Matayo 20
20
Jotic i ndelo vini
1“Ker ma polo cale won ndelo vini m'oay odikin worwor ketho ji moro tic i ndelo pere ma vini. 2Go ocikere kodi jo ni bino culo jo kemba ma ndir je, siringi acel ndelo acel, to dhiro jo i ndelo pere. 3Go odoko oay to kidho i katale sawa adek to neno jomoro jocungo kenyo ma bu tic. 4Omiyo go owaco rijo ni, ‘Wibende kidhi win witiy i ndelo paran ma vini, aka abino miyo win gima ripo je.’ 5To jono jokidho. Aka sawa aucel kodi sawa abuŋwen go odoko otimo ameno. 6Dho kapa sawa apar g'acel go okidho i katale kendo to neno ji moro ma fodi oyido jocungo kenyo. Go openjo jo ni, ‘Raŋo ma winyeko ndelo gipi ma wikitim gimoro?’ 7Jodwoko ni, ‘fodi ongoye ŋat'omiyo wan tic.’ Gikenyo go owaco ri jono ni, ‘Ere wibende kidhi win witiy i ndelo vini paran.’ ”
8 #
Jolevi 19:13; Cik 24:15 “Aka munyo piny otundo othieno, won ndelo owaco ri jakur jotic pere ni, ‘Lwoŋ jotic imiy jo kemba pajo, icaki kodi jom'oketh i tic macowe, aka icowi kodi joma open ketho jo i tic.’ 9Joma nende jocako sawa apar g'acel, omiy jo siringi acel acele. 10Meno omiyo munyo joma jopen i tic jobino limo kemba pajo, joparo ni di jonwaŋo madwoŋ loyo, to jo bende omiy jo siringi acel acele won. 11Jojolo pesa pajo to jocako kiŋunyaŋunya gi won tic. 12Jowaco ni, ‘Jome, m'oketh jo i tic macowe me, kole jotiyo nyaka sawa acel won kende, to neni wan wathiele gi tic mapek ndelo gipi i min ceŋ, ama odoko iculo jo marom gi wan!’ 13Won ndelo odwoko ŋat'acel kwoŋ jo ni, ‘Nyawotan akibuyin pesa. Kole nende wayere kodin timo tic odieceŋ gipi kwoŋ siringi acel. 14In maki kemba perin idok peco; an awon ayero miyo ŋat'aketho i tic macowe me kemba marom kodi m'amiyin. 15Iparo ni angoye kodi thwolo timo paka ayenyo gi pesa paran won? Kosa nyeko makin nyaka ni rupiri atimo bero ri ŋatiman?’ ” 16#Mat 19:30; Mar 10:31; Luk 13:30Aka Yesu omedo ni, “Am'omiyo joma cowe ama jobino bedo marapena, aka joma bedo marapena jobino bedo macowe.”
Yesu luwo mar'adek kwoŋ tho pere
(Mar 10:32-34; Luk 18:31-34)
17Munyo Yesu onwaŋo kidho Yerusalem, otero jofonjirok japar g'ario gicen to luwo gi jo nyaliŋliŋ. 18Owaco rijo ni, “At'onyo wakidho Yerusalem kam'ibino bol'iye Wod Dhano i cingi jotel pa jocway ri Were i wi migam kodi jondiko to jothumo rigo banja ma tho. 19Aka jobino ketho go i cingi Jopath wonyeri go, wocwadi go, t'iguro go kwoŋ musalaba, aka i ndelo mar'adek ibino cerino go.”
Kwac pa min yac ario
(Mar 10:35-45)
20Gikenyo min wot Zebedayo obino bongi Yesu gi wote ario to goyo conge ruwaŋe munyo kwayo go gimoro. 21Yesu openjo go ni, “Aŋo m'iyenyo?” Go odwoko ni, “Tim cikirok ni wotan me jobedi yuracuc kodi yuracam perin k'ilokere Kere.” 22Yesu odwoko jo ni, “Wikuya gima wikwayo. Winyalo madho agwata m'akidho madho?” To jodwoko ni, “Wanyalo”. 23Yesu owaco ni, “Adieri winyalo riwin madho agwata paran, to angoye kodi meni ma yero joma jobedi yuracuc kodi yuracam paran. Kabedo me obedo apa joma Baba oyiko rijo.”
24Munyo jofonjirok wadi gin apar jowinjo kwoŋ gino, nge omako jo gi wutmere ario no. 25#Luk 22:25-26To Yesu lwoŋo joje kanyacel bonge, to waco ni, “Wiŋeyo nike joma dhumo Jopath jodhumo gi maker, aka jotel pajo jodhumo gi mbaka. 26#Mat 23:11; Mar 9:35; Luk 22:26To k'obedi i dier win ameno. Kucel ka moro kwoŋ win mito bedo madwoŋ, go ripo bedo ŋeca mewin; 27aka ŋata yenyo bedo marapena i dier win, ripo bedo ŋeca mewin, 28paka Wod Dhano ma k'obino ka ni wotiy rigo, to ni wotiy ri ji gi miyo kwo pere paka cul ri ji mathoth.”
Yesu botho cwo ario ma waŋ gin otho
(Mar 10:46-52; Luk 18:35-43)
29Munyo Yesu kodi jofonjirok pere joeye Yeriko, lwak ji joluwo go. 30Ji ario ma waŋ gin otho oyido jobedo i thengi royo; munyo jowinjo ni Yesu oyido kadho, jocako koko ni, “Wod pa Daudi! Maki ye wor gi wan!” 31Lwak ji no jobwoko jo ka jowaco ni jowoliŋ! To jome jomedo koko malo loyo ni, “Nyakwar Daudi, mondo Rwoth, maki ye wor gi wan!” 32Gikenyo Yesu ocungo to lwoŋo jo to penjo jo ni, “Wimito atim riwin aŋo?” 33Jodwoko ni, “Rwoth, wayenyo waŋ wan wonen.” 34Yesu omako gi jo wor, aka tekin ogeyo waŋ jo to jocako neno to joluwo go.
Currently Selected:
Matayo 20: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
