Matayo 10

Jomoor apar g'ario

(Mar 3:13-19; Luk 6:12-16)

1Yesu olwoŋo jofonjirok pere apar g'ario kanyacel to miyo jo meni ma riemo woko cuny m'ocido kodi ma botho kiti ramirok je kodi two je. 2Me a nyingi jomoor apar g'ario: Marapena Simon (m'ilwoŋo ni Petero) kodi Andereya omin go; Yakobo kodi Yohana omin go, wot Zebedayo; 3Filipo kodi Batholomayo; Toma kodi Matayo, jacoki misolo; Yakobo wod pa Alfayo kodi Tadeyo; 4Simon ma wok Kana ma jalweny ri piny pere; kodi Yuda Iskariot m'ocamo sereko ri Yesu.

Yesu oro japar g'ario

(Mar 6:7-13; Luk 9:1-6)

5Yesu ooro japar g'ario no gi fonji me: “Wikiri wikidhi i piny pa Jopath kosa i tindi moro je ma Samaria, 6kwanyo woko, kidhi win bongi rombo m'orwenyo ma ot pa Joisiraili. 7Kidhi wifonji ni, ‘Ker ma polo nicegin.’ 8Bothi win jotwo, cerino win jom'otho, lony win jodhowo, riemi win jwogi. Wilimo ma bu cul, am'omiyo bende miy win ji ma bu cul. 9Wikiri witiŋ zahabu kada feza, kosa dome moro i migowa mewin. 10#1 Kor 9:14; 1 Tim 5:18Wikiri witiŋ migowa ma kwac i woth mewin, kosa sati man, kosa war, kosa luth. Jatic ripo limo gima go tiyo rigo.”

11“Ka witundo i tindi kosa loka moro, donji win aka wirangi ŋata yeyo jolo win, aka wibedi gi go cuka winoeye kenyo. 12Ka widonjo i ot, mothi win jo ni, ‘Siem wobedi kodi win.’ 13Ka ji ma kenyo jojolo win, weyi siem mewin wodoŋ kenyo; to ka jok'ojolo win, siem mewin wodwoki riwin. 14#Tim 13:51Aka ka nyatoro k'ojolo win, kosa okwero ciko ithe riwin, ka wiwok peco no kosa i tindi no, witeŋ woko fukefuke ma tiendi win. 15#Mat 11:24; Cak 19:24-28; Luk 10:4-12Adieri awaco riwin, ndelo ma thumo banja bino bedo marac ri tindi no loyo Sodom kodi Gomora.”

Lweny ma bino

(Mar 13:9-13; Luk 21:12-17)

16 # Luk 10:3 “Neni win! Onyo adhiro win paka rombo i dier arara. Wiripo bedo mariek pa thwol odoko mamwol p'akuru. 17#Mar 13:9-11; Luk 12:11,12; 21:12-15Kure win, rupiri ji jobino mako win to jotero win i kapido, aka jobino cwado win i kalamo pa Joyuda. 18Ibino tero win bongi jodhum madongo kodi kerin ro an, ŋey wititi Wac Manyen Maber rijo kodi ri Jopath bende. 19K'oter win i kapido, wikiri wirembi gima wibino waco kosa paka winoluw. Ato ibino miyo win gima winowaci. 20Kole wac ma winowaci k'obedi mewin; to bino wok bongi Cuny pa Bawin ma bino luwo, luwo i win.”

21 # Mar 13:12; Luk 21:16 “Omin dhano won ama bino tero omin go woneki, aka bacere bende jobino timo ameno ri nyithindho pajo; nyithindho bende jobino wire ri jonywol pajo to jomiyo ineko jo. 22#Mat 24:9; Mar 13:13; Luk 21:17; Mat 24:13; Mar 13:13 Dhano je bino mon gi win, ro an. To ŋat'ocir kiri i gike bino both. 23Aka ka ilwenyo gi win i tindi acel, ringi win i man. Awaco riwin, wik'ocow tic mewin i tindi je ma Isiraili mafodi Wod Dhano k'obino.”

24 # Luk 6:40; Yoh 13:16; 15:20 “Ongoye jafonjirok maloyo jafonji pere gi dwoŋ, aka ŋeca bende kiloy rwoth pere gi dwoŋ. 25#Mat 9:34; 12:24; Mar 3:22; Luk 11:15Ripo ka jafonjirok odongo to cale kodi jafonji pere, kendo ŋeca bende wocale gi rwoth pere. Aka k'otiek lwoŋo won peco ni Belzebul, kosa to joma ni peco pere olwoŋi jo gi nyingi jo mareco ma nedi!”

Ŋata ripo alwora

(Luk 12:2-7)

26 # Mar 4:22; Luk 8:17 “Am'omiyo, wikiri wilwor ji. Ongoye gimoro je m'oum ma k'oyaw, kosa nyaliŋliŋ moro je ma k'othangi kamaler. 27Gim'onyo awaco riwin i mudho wiripo medo waco odieceŋ. Aka gima wiwinjo omwoŋ liŋliŋ wiripo waco gi i tipin wiy ot. 28Wikiri wilwor joma neko del to jokinyal neko cuny; to lwor win Ŋati manyalo nyeko woko kwo ma del kodi cuny je i mac makitho. 29Obico ario kinyew nyaka dome acel won? To kad'acel kwoŋ jo kinyal podho piny ma Bawin k'oŋeyo. 30Aka kole kiri ye wiy win je otiek kwano. 31Am'omiyo wikiri wibedi malwor; welo mewin loyo apa obico kweth.”

Yeyo kodi kwedirok kwoŋ Kristo

(Luk 12:8-9)

32“Ŋat'otucan i dier ji nike go ŋata luwan, abende abino tuco nyinge ameno i nyim Baba man polo. 33#2 Tim 2:12To ŋat'okwedere kwoŋan i dier ji nike go k'obedo aparan, abende abino kwedere kwoŋe i nyim Baba man polo.”

Ki siem, t'abor ayino

(Luk 12:51-53; 14:26-27)

34“Wikiri wipar nike abino kelo siem i piny; be, akibino kelo siem, t'abor ayino. 35#Mika 7:6Abino thuyo wot ji gi bacere pajo, nyigi ji gi megi jo, mondiwot ji kodi adhacere pajo; 36jakwor pa dhano bino bedo joma ot pere won.”

37“Ŋat'omar bamere kosa yokimere loyan k'oripi bedo aparan, odoko bende ŋat'omar wode kosa nyare loyan k'oripi bedo aparan. 38#Mat 16:24; Mar 8:34; Luk 9:23Moro je ma k'otiŋ musalaba pere to luwan k'oripi bedo aparan. 39#Mat 16:25; Mar 8:35; Luk 9:24; 17:33; Yoh 12:25Ŋata won otemi gwoko kwo pere bino rwenyo woko, to ŋat'obol woko kwo pere kwoŋbedo an, bino limo.”

Kemba

(Mar 9:41)

40 # Luk 10:16; Yoh 13:20; Mar 9:37; Luk 9:48 “Ŋata jolo win, meno jolan, aka ŋata jolan meno jolo ŋat'ooran. 41Ŋata jolo jamikwenda pa Were rupiri go jamikwenda bino limo kemba ma cale g'apa jamikwenda. Ŋata jolo dhano maleŋ rupiri go leŋ, bino limo kemba pa ŋataleŋ. 42Aka adieri awaco riwin, ŋat'omiy acel kwoŋ nyithindho ma joluwan me kada nyaka pi maŋic rupiri go obedo ŋata luwan, ŋato kilakeŋ kemba pere.”

Currently Selected:

Matayo 10: DHOPE

Highlight

Copy