Jolevi 8

Kwer ma wiro Aron kodi wote gi mo

(Wok 29:1-37)

1Rwoth oluwo gi Musa ka waco ni: 2Kwany Aron kodi wote, gi ruk pajo, mo, rwath ma mic ma cwako reco, wot rombo ario, kodi adita ma mugat ma buthow. 3Coki lwak ji i dhiot ma Wema ma romo. 4Musa otimo paka Rwoth omiyo go or, aka ocoko lwak ji i dhiot ma Wema ma romo. 5Musa owaco ri lwak ji ni, “Me a gima Rwoth omiyan or ni wotim.”

6Musa olwoŋo Aron kodi wote yuwiye, aka olwoko jo gi pi. 7Musa oruko ri Aron sati, kodi kanzu, to tweyo piere gi del, to ketho law pa jocway ri Were i wi migam kwoŋe, to tweyo. 8Musa oketho mugowa ma ketho giŋeyo mito pa Were kwoŋ go, to keth'iye Urim kodi Thumim. 9Musa oruko rigo junga i wiye, to ketho thiwino ma zahabu, sangaria maleŋ ruwaŋ junga, paka Rwoth omiyo go or.

10Musa okwanyo mo, aka owiro Kabedo Maleŋ kodi gigipiny mere je, to loko jo maleŋ. 11Go okiro mo i wi migam dibirio, owiro migam kodi gigipiny mere je gi mo, kalaya kodi pende, loko jo maleŋ. 12Musa okonjo mo i wi Aron aka owiro go, loko go maleŋ. 13Musa olwoŋo wot Aron, oruko rijo satere, to tweyo rijo del, aka oruko jungin i wi jo paka Rwoth omiyo Musa or.

14Musa okelo rwath ma mic ma cwako reco, aka Aron kodi wote joketho cingi jo i wic mere ri mic ma cwako reco. 15Musa othumo, aka okwanyo remo, to ketho i tungi migam thoko gi lwet cinge, loko maleŋ, okonjo remo i tiendi migam, oloko maleŋ, miy'iye cowirok ma cwako reco. 16Musa okwanyo bor je ma gigipiny ma iye, adec maber loyo ma cuny, roge ario gi bor mere, aka owaŋo i wi migam. 17To rwath won, pien mere, riŋo mere, kodi woyo mere, go owaŋo woko ma kambi, paka Rwoth omiyo Musa or.

18Musa okelo wod rombo ma mic awaŋa, aka Aron kodi wote joketho cingi jo i wic mere. 19Musa othumo, aka okiro remo mere i wi migam thoko. 20Musa oyaŋo mathindho thindho, aka owaŋo wic mere, mumin mere kodi bor. 21Go olwoko gigipiny ma iye kodi olenge gi pi, aka Musa owaŋo wod rombo gipi i wi migam. Me oyido obedo mic awaŋa ri ŋwece kur mamit, mic m'owaŋ gi mac ri Rwoth, paka Rwoth omiyo Musa or. 22Musa okelo wod rombo mar'ario, ma kwoŋo Aron kodi wote, aka joketho cingi jo i wic mere. 23Musa othumo, aka okwanyo remo to wiro i ithi Aron maracuc, lwet cinge ma thwon maracuc, kodi lwet tiende ma thwon maracuc. 24Musa okelo wot Aron, aka owiro remo i ithi jo maracuc, lwet cingi jo ma thwon maracuc, kodi lwet tiendi jo ma thwon maracuc. Remo m'odoŋ Musa okiro i tiendi migam. 25Musa okwanyo bor, yiwe maleny, bor je ma umo gigipiny ma iye, adec maber loyo ma cuny, roge ario gi bor mere kodi eme maracuc. 26Wok iy'adita m'oyido nitie ruwaŋ Rwoth, Musa okwanyo mugat acel ma buthow, mugat acel m'owir'iye mo, kodi mugat manwaŋ, aka oketho i wi bor kodi eme maracuc. 27Musa oketho i par cingi Aron kodi wote, aka otiŋo malo paka mic m'otiŋ malo ruwaŋ Rwoth. 28Musa okwanyo wok i par cingi jo, aka owaŋo i wi migam gi mic awaŋa. Me obedo mic ma kwoŋo jo, m'owaŋ gi mac ri ŋwece kur mamit ri Rwoth. 29Musa okwanyo thundho aka otiŋo malo paka mic m'itiŋo malo ruwaŋ Rwoth. Me obedo adec pa Musa wok i wod rombo ma kwoŋo jo, paka Rwoth omiyo Musa or.

30Musa okwanyo mo, kodi remo m'oyido nitie i wi migam, aka okiro kwoŋ Aron gi ruk pere, wote gi ruk pajo, aka ameno oloko Aron kodi wote gi ruk pajo maleŋ.

31Musa owaco ri Aron kodi wote ni, “Tedi win riŋo i dhiot ma Wema ma romo, aka wicam kenyo gi mugat manitie iy'adita ma mic ma kwoŋo jo, paka Rwoth omiyan or ni, ‘Aron kodi wote jowocami.’” 32Riŋo kodi mugat m'odoŋ, waŋ win gi mac. 33Wikiripi eye i dhiot ma Wema ma romo ma ndelo abirio, cuka ndelo mewin ma loko win maleŋ rumo. Kole ma ndelo abirio go lapoŋo cingi win. 34Paka go otimo i ndelo me, Rwoth omiyo or ni wotim, timo cowirok ma cwako reco mewin. 35Wilabedo i dhiot ma Wema ma romo odieceŋ gi wor ma ndelo abirio, kuro cik pa Rwoth, ŋey wikiri witho, kole omiyan or. 36Aron kodi wote jotimo kisi gimoro je paka Rwoth oyido owodho or luwo bongi Musa.

Currently Selected:

Jolevi 8: DHOPE

Highlight

Copy

Compare