Jolevi 6

1Rwoth oluwo gi Musa ka waco ama: 2Ka nyatoro otimo reco kosa obenga kwoŋ Rwoth gi wondo jager pere i gim'omiy go kano kosa ociko, kosa okwalo, kosa otwodo, 3kosa onwaŋo gim'orwenyo to twodo kwoŋe, k'okwoŋere nono iy'acel kwoŋ gigipiny me ma dhano timo, meno otimo reco. 4Tekin go ŋeyo reco pere, to mito dwoko gima go okwalo kosa otwodo kwoŋe, kosa ociko, kosa gim'orwenyo ma go onwaŋo, 5kosa giman je m'ikwoŋere kwoŋe nono, iripo culo ma ripo kodi adec man i wiye. Iripo culo won mere tekin iŋeyo banja perin. 6Aka ilakelo bongi jacway ri Were i wi migam, paka mic ma banja ri Rwoth, wod rombo m'ongoye gi ŋolo wok i mwendi perin, kosa gima rom gine, ri mic ma banja. 7Jacway ri Were i wi migam latimo cowirok ma cwako reco perin ruwaŋ Rwoth, aka ilacwako rin ri gim'inotimi je to miyin bedo jabanja.

Kwer ma mic awaŋa

8Rwoth oluwo gi Musa ka waco ama: 9Miy Aron kodi wote cik k'iwaco rijo ama: Me kwer ma mic awaŋa. Mic awaŋa ripo doŋ i wi migam tundo odikin, aka mac ma migam ripo bedo ka liel. 10Jacway ri Were i wi migam laruko law pere, i wi pale macek, aka lakwanyo buru ma mic awaŋa ma mac owaŋo, to ketho i thengi migam. 11Go lalunyo woko law pere to ruko nanga man, aka latiŋo buru to tero woko ma kambi, i kabedo m'olony. 12Mac ma wi migam ripo bedo ka liel, aka kiripi tho. Kisi odikin jacway ri Were i wi migam lamedo yen i wiye, laketho mic awaŋa i wiye, to waŋo bor ma mic ma siem. 13Mac ripo liel i wi migam noknok, aka kiripi tho.

Kwer ma mic ma cemo manyinge

14Me kwer ma mic ma cemo manyinge. Wot Aron jolamiyo mic ruwaŋ Rwoth, yuwaŋ migam. 15Jolajowo moko masi cingi jo kodi mo ma mic ma cemo manyinge, kanyacel gi buban manitie i mac, aka jolawaŋo i wi migam ri ŋwece kur mamit ri Rwoth. 16Adec ma mic m'odoŋ, Aron kodi wote jolacamo paka jocamo mugat ma buthow i Kabedo Maleŋ, i diedipo ma Wema ma romo. 17Kiripi tedo gi thow. Atieko miyo paka adec pajo ma mic paran m'iwaŋo gi mac. Obedo adec maleŋ swa, paka mic ma cwako reco kodi mic ma banja. 18Nyikway Aron ma cwo je joripo camo, paka adec pajo ma cil gi cil i luse pajo je, wok i mic pa Rwoth m'iwaŋo gi mac; kisi gim'ogey jo je labedo maleŋ.

19Rwoth oluwo gi Musa ka waco ni: 20Me mic ma Aron kodi wote jolamiyo Rwoth i ndelo m'owir go gi mo. Kilo acel ma moko paka mic ma kisi ndelo, adec odikin, aka adec othieno. 21Iripo timo gi mo i sapik i kendo, ilakelo m'obil maber gi pi, m'oŋiny mathindho thindho, aka ilamiyo ri ŋwece kur mamit ri Rwoth. 22Aka jacway ri Were i wi migam, m'owir gi mo, kwoŋ wot Aron, lamiyo. Me obedo adec pa Rwoth m'iripo waŋo cil gi cil. 23Mic ma cemo pa jacway ri Were i wi migam je iripo waŋo, kiripi camo.

Kwer ma mic ma cwako reco

24Rwoth oluwo gi Musa ka waco ama: 25Luw gi Aron kodi wote, iwaci rijo ni: Me kwer ma mic ma cwako reco. Mic ma cwako reco ilathumo ruwaŋ Rwoth kama ithum'iye mic awaŋa; obedo maleŋ swa. 26Jacway ri Were i wi migam ma lamiyo paka mic ma cwako reco, lacamo i Kabedo Maleŋ, i diedipo ma Wema ma romo. 27Kisi gim'ogey riŋo mere labedo maleŋ, aka ka remo mere okire i nanga, iripo lwoko woko remo no i Kabedo Maleŋ. 28K'otedi i dak ma lowo iripo turo woko; to k'otedi i dak ma ywel, iripo rudo t'ilawo gi pi. 29Cwo je i dier jocway ri Were i wi migam joripo camo, obedo gimaleŋ swa. 30To ongoye mic ma cwako reco ma wocam ma remo mere ikelo i Wema ma romo ma cwako reco i Kabedo Maleŋ; iripo waŋo gi mac.

Currently Selected:

Jolevi 6: DHOPE

Highlight

Copy

Compare