Jolevi 1
1
Mic awaŋa gikululu
1Rwoth olwoŋo Musa, aka oluwo gi go i wema maleŋ, ka waco ama: 2Luw gi Joisiraili, aka iwaci rijo ni: Ka nyatoro kelo mic mar'ogwaŋ ri Rwoth, ripo bedo mic ma dhiaŋ, kosa rombo kosa diel. 3Ka mic pere obedo mic awaŋa ma dhiaŋ, ripo bedo rwath m'ongoye gi ŋolo. Go won wokel i dhiot ma Wema ma romo, ŋey wojol rigo ruwaŋ Rwoth. 4Go laketho cinge i wic mic awaŋa, t'ijolo rigo ma cwako reco pere. 5Go lathumo rwath ruwaŋ Rwoth, aka jocway ri Were i wi migam, wot Aron, jolakelo remo, to jokiro thoko migam manitie i dhiot ma Wema ma romo. 6Go bino daŋo pien mere, to yaŋo i muma mathindho thindho. 7Wot Aron jolacwinyo mac i wi migam, to jocano i wiye yen. 8Jocway ri Were i wi migam, wot Aron jolacano mumin, wic, kodi bor i wi yen, i mac i wi migam. 9To gigipiny ma iye kodi olengin mere iripo lwoko gi pi. Kenyo jacway ri Were i wi migam lawaŋo gipi i wi migam, paka cowirok awaŋa, mic m'owaŋ gi mac, maŋwe kur mamit ri Rwoth.
10Ka mic pere obedo rombo kosa diel, ripo bedo ma wode m'ongoye gi ŋolo. 11Aka go lathumo i thengi migam yumalo ruwaŋ Rwoth. Jocway ri Were i wi migam, wot Aron jolakiro remo mere thoko migam. 12Go layaŋo i muma mathindho thindho, jacway ri Were i wi migam laketho gi wic mere kodi bor mere i wi yen manitie i mac i wi migam. 13To gigipiny ma iye kodi olenge mere go lalwoko gi pi. Jacway ri Were i wi migam lawaŋo gipi i wi migam paka cowirok awaŋa, mic m'owaŋ gi mac, maŋwe kur mamit ri Rwoth.
14Ka mic pere ri Rwoth obedi winyo, go layero akuro kosa njiwa. 15Jacway ri Were i wi migam lakelo i wi migam, to turo ŋute, to waŋo i wi migam. Remo mere ilakiro i thengi migam. 16Go lafudho kasekero mere to budho yer mere, aka labolo i thengi migam yuwok ceŋ, kama buru oy'iye. 17Go labaro diere gi bwombe, to kiripi coto diere wopokere, aka jacway ri Were i wi migam lawaŋo i wi migam i wi yen i mac, paka cowirok awaŋa, mic m'owaŋ gi mac, maŋwe kur mamit ri Rwoth.
Currently Selected:
Jolevi 1: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
