Esita 9
9
Joyuda joreyo woko jokwor pajo
1K'apar g'adek ma dwe ma Adar otundo, ndelo m'oyido iripo ketho cik pa kere i tim; ndelo ma jokwor pa Joyuda joyikere reyo woko jo. To i kabedo ma jokwor pa Joyuda reyo woko jo, jo ama doko joreyo woko jokwor pajo. 2I kisi tindi madwoŋ i kisi adec pa kere Aritakises, Joyuda jocokere kama jobed'iye kareno jokuro neko nyatoro moro je m'oyido otemi monjo jo. To ngoye nyatoro m'onyalo ciro jo rupiri lworo oyido otieko donjo i cuny jokwor pajo. 3Adieri jodhum ma kisi adec, jotel, rwodhe, gi ji ma jowok peco pa kere je, jocungo yu dieŋey Joyuda rupiri lworo oyido otieko donjo i cuny jo ro Modekay. 4Ato Modekay oyido obedo jacwo madwoŋ swa peco pa kere; aka bero pere olak i kisi adec paka go omedere idho malo i dwoŋ. 5Ameno Joyuda jomedere yuwaŋe i ndelo no, aka joneko piny jokwor pajo je g'abor, jothumo, joreyo woko jo aka jotimo gi jo gima cuny gin omito.
6I tindi madwoŋ Susa won, Joyuda joneko ji 500. 7Joyuda joneko cwo m'ilwoŋo jo ni Parsandatha, Dalfon, Asipatha, 8Poratha, Adalia, Aridatha, 9Parmasta, Arisay, Ariday, kodi Vayzatha. 10Jome oyido jobedo apar aka wot Haman wod pa Hamedatha, aka jakwor pa Joyuda. To ngoye gigipiny ma jonyaga.
11Gi ndelo no won owaci ri kere welo ji ma Joyuda joneko i tindi madwoŋ Susa won kende. 12To kere kidho bongi Esita aka owaco rigo ni, “Joyuda joneko ji 500 i tindi madwoŋ Susa won kende kiri gi wot Haman. To onyo kosa jotimo aŋo iy'adec pa kere man! T'onyo doko aŋo m'imito? Abino miyin. Aŋo man m'ikwayo? Abino ketho i kare.”
13Esita odwoko ni, “K'inen sangala kere, yey Joyuda ma jobedo i Susa jowotimi gima jotimo konon luwo i cik ma ndelo me, aka yey jowoŋaw delkwoŋ wot Haman i wi kanek” 14Kere oyeyo ni wotim paka Esita owaco; aka ondiko cik i tindi madwoŋ Susa. Ameno won to delkwoŋ wot Haman iŋawo kama kisi nyatoro je neno. 15Doko to Joyuda ma tindi madwoŋ Susa jocokere k'apar g'aŋwen ma dwe ma Adar aka joneko ji 300; aka jok'onyaga gigipiny.
16Medo i wi meno, Joyuda mar'adec pa kere man bende jocokere gwoko kwo pajo, aka jobotho kwo pajo kwoŋ jokwor pajo. Joneko ji 75,000 m'oyido jodak jo; aka jok'onyaga gigipiny. 17Gime otimere k'apar g'adek ma dwe ma Adar. Ndelo ma luwo mere k'apar g'aŋwen i dwe meno won joywomere aka joketho ndelo no bedo ma siemirok gi cemo. 18To Joyuda ma tindi madwoŋ Susa joloko k'apar g'abic ndelo ma ywomirok aka jobedo gi siemirok gi cemo; rupiri jothumo aka joneko jokwor pajo k'apar g'adek kodi k'apar g'aŋwen ma dwe ma Adar. 19Meno am'omiyo Joyuda ma jobedo i lokaloka kodi ma jobedo i tindin ma k'othoki gi cel jopoyo k'apar g'aŋwen ma dwe ma Adar paka ndelo ma siemirok, cemo, gi ywomirok. I ndelo me jodhiro ri wadi jo mic ma cemo manyinge.
Ndelo madwoŋ ri Joyuda
20Modekay ondiko gigipiny me je i kitawo aka odhiro ri Joyuda ma jowok cegin gi bor balwin iy'adec je pa kere Aritakises. 21Go owaco rijo kuro k'apar g'aŋwen gi k'apar g'abic ma dwe ma Adar kisi oro. 22Ndelo ario me i dwe ma Adar poyo jo hongo ma jonyalo bothirok kwoŋ jokwor pajo. Me a hongo ma kumo pajo olokere siemirok, aka ywak pajo olokere nyero, aka joripo poyo ndelo no kodi siemirok gi cemo to jopoko mic ma cemo manyinge kareno jomiyo kiri jocandi bende. 23Joyuda joyere medirok gi poyo ndelo ario no paka oyido jotieko cako kodi paka Modekay ondiko rijo.
24Jotimo ama rupiri Haman wod pa Hamedatha ma jakwor pa Joyuda je oyido ocano reyo woko Joyuda wok kwoŋ kwir m'obol m'ilwoŋo ni Purim. 25To munyo Esita okidho bongi kere, kere owodho or to can pa Haman marac je gik kwoŋ go won, aka Haman kiri gi yac pere je oŋaw jo i wi kanek. 26Luwo kwoŋ balwa pa Modekay kodi gim'otimere ri Joyuda, ywomirok me pama ilwoŋo ni Purim. 27Joyuda joyere aka joridho tim me i kwo pajo gi nyikway jo kodi jono je ma jowire to jolokere Joyuda. Jowaco paka jok'owey ma jok'opoyo ndelo ario me i hongo m'otire kisi oro paka Modekay ondiko i balwa pere. 28Oyere ni i kisi peco pa Jayuda, ji ma jobin yuwaŋe i kisi adec kodi i kisi tindi joripo poyo to jokuro ndelo ario no ma dwe ma Adar ma jok'oweyo to gik gi luse pa nyikway jo.
Balwa pa Esita ma mako kwoŋ ndelo madwoŋ pa Joyuda
29To Esita nyamicala nyar Abihayili ndiko balwa ma bende yere gi balwa pa Modekay Jayuda ma mako kwoŋ ndelo madwoŋ no aka oridho gi dwoŋ pere. 30Balwin me ondiki ri Joyuda je aka odhir i kisi adec je 127 ma ker pa kere Aritakises. Balwin no omito ri Joyuda siem kodi bedo ji ma jopie. 31Balwa me omiyo Joyuda kodi nyikway jo je cik ma kuro ndelo ma Purim i hongo m'otire, paka jo wegi oyido con mere joyere to jotimo i ndir ma joywak to joriyo; aka doko rupiri Modekay kodi Esita bende jomiyo cik. 32Cik pa Esita ma ridho tim ma Purim me ondiki piny ri ji apoya.
Dhopadhola DC Bible © Bible Society of Uganda, 2018.