Esita 3
3
Haman cano reyo woko Joyuda
1Munyo hongo moro okadho, kere omedo jadhum pere m'ilwoŋo ni Haman dwoŋ ma malo loyo jodhum wadi go je. Haman oyido obedo wod pa Hamedatha, aka nyakwar Agag.#3:1 Agag Me obedo kere pa Joamalek ma jobedo jokwor pa Joyuda 2Kere omiyo jodhum ma ker pere je cik ni joripo woro Haman. Joripo guro rigo congi jo to jobwonere ruwaŋ go. To Modekay okwero miyo Haman dwoŋ no. 3Wadi Modekay ma bende jobedo jodhum jopenjo go ni, “Raŋo ikwero luwo cik pa kere?” 4Kisi ndelo jotemo naŋo go, to go kwero winjo wac pajo. Modekay odwoko jo ni, “An abedo Jayuda; aka akinyali bwonirok ri Haman.” Wadi Modekay joosa go ri Haman kareno jomito neno k'adieri go ridho wac pere. 5Munyo Haman won bende oneno gi waŋe ni Modekay kiwor go aka kibwonere ruwaŋe, owinjo marac swa aka omako nge. 6Rumacen Haman oniaŋ ni Modekay obedo Jayuda. Riameno go k'omito neko Modekay kende, to cano reyo woko Joyuda je m'oyido jonitie i ker pa Aritakises.
7I oro mar'apar g'ario ma dhum pa kere Aritakises, i dwe marapena dwe m'ilwoŋo ni Nisan#3:7 Dwe ma Nisan I dhohiburu gime otimere i dwe mar'aŋwen gi dwe mar'abic Haman omiyo nonin man bolo kwir ma yero ndelo ma neko Joyuda. Munyo obol kwir no, oyer k'apar g'adek ma dwe mar'apar g'ario, dwe m'ilwoŋo ni Adar.#3:7 Adar I dhohiburu me dwe mar'adek Kwir no ilwoŋo ni Purim. 8Ameno Haman okidho bongi kere Aritakises, aka owaco rigo ni, “Nitie nono ji ma jonitie i kisi adec ma ker perin me aka jopokere kwoŋ nonin man aka kiri cik pajo je opokere. Jome jokiluwi cik pa kere m'oyido kiber weyo jo medo kwo. 9K'inen obedo mito pa kere, ayere ketho kilo 340,000 ma feza i dero pesa pa kere. Miy cik ma waco ni jonono me je woneki jo.” 10Kere olunyo peta ma go oro ma ketho cinge i kisi ndiko wok i lwet cinge, aka omiyo Haman wod pa Hamedatha ma bende nyakwar Agag jakwor pa Joyuda. 11Aka kere owaco ri Haman ni, “Pesa no aperin, aka ri nono no, tim gi jo gima cunyin mito.”
12Ameno k'apar g'adek, i dwe marapena, Haman olwoŋo jondiko pa kere je aka owaco rijo ndiko gima go waco rijo je i kisi dhodhok. Munyo jotieko ndiko, go oketho nyingi kere Aritakises gi peta pa kere aka opoko rwodhe, jotel, gi jodhum je ma kisi adec. 13T'ioro jomikwenda mayil yil poko balwin no i kisi adec. Ndiko me oyido miyo nonin man je cik reyo woko Joyuda je, mathindho gi madongo, mon gi nyithindho i ndelo acel, k'apar g'adek i dwe ma Adar; aka jowodoŋ gi lim pajo. 14Osoma ndiko me paka cik i kisi adec ŋey kisi nyatoro je woyikere ri ndelo no.
15Kere owodho or aka osoma cik me i tindi madwoŋ Susa. Oor jomikwenda mayil yil poko ndiko me i kisi adec. Kere gi Haman jobedo piny aka jocako madho vini, kucel nyawin ocakere i tindi madwoŋ Susa.
Currently Selected:
Esita 3: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.