Esita 2
2
Kere ketho Esita paka nyamicala.
1Munyo gigipiny no je otieko timere, to hongo moro kadho, cuny kere opie. Kere oparo kwoŋ gima Vasiti otimo rigo, gi cik ma go won ondiko kwoŋ Vasiti. 2Ŋecin pa kere jowaco rigo ni, “Raŋo kere kior ŋecin pere rango nyir maŋon ma fodi jokuya cwo. 3Weyi kere wowaci ri jodhum pere ma kisi adec jowokeli nyir no, t'iketho jo i ot pa mon i tindi madwoŋ Susa. Nyir no okethi jo i cingi Hegay ma lur, ŋeca pa kere yuthenge pa mon pa kere. Hegay womiy jo mo ma fothirok. 4Nyaka kere won rumacen bino yero nyako ma cunye omito, to ketho go bedo nyamicala wolunji waŋ Vasiti.” Waci no oyomo cuny kere to go timo ameno.
5I hongo no, oyido nitie Jayuda m'ilwoŋo ni Modekay wod pa Yayir. Modekay oyido obedo nyakwar Kic gi Semei jonono pa Benyamin. 6#2 Kerin 24:10-16; 2 Kigana 36:10Modekay oyido obedo acel kwoŋ Joyuda, ma Nebukadineza kere pa Jobabilon omako wok Yerusalem, kanyacel gi kere pajo Yekonia to kadho gi jo paka jotwec ma lweny. 7Modekay oyido kuro nyar omin bamere m'ilwoŋo ni Esita. Esita oyido obedo nyako ma dhiaŋ onaŋo waŋe to cweyere maŋon. I hongo ma jonywol pere jotho, Modekay okwanyo go aka otero go peco pere, to kuro go paka nyathi pere.
8Munyo cik pa kere owok, okeli nyir madit i tindi madwoŋ Susa. Esita bende obedo acel kwoŋ nyir no. Okethi jo i cingi Hegay, jadwoŋ ma ot pa mon pa kere. 9Tekin Hegay neno Esita, cunye omaro Esita loyo nyir m'oyido oyer je. Hegay omiyo Esita tim manyakare ma loko go maŋon. Gi piyo no won go oyiko ri Esita cemo pere m'opokere g'apa nyir wadi, to miyo go mo ma fothirok. Go omiyo Esita nyir abirio tiyo rigo; aka otero jo i kabedo maŋon loyo i ot pa mon. 10Modekay oyido ocuno Esita ni wokan nyaliŋliŋ ma mako kwoŋ wade gi ji pere, aka Esita bende k'owaco ri nyatoro. 11Kisi ndelo Modekay oyido bino to langalanga i diedipo ma ot pa mon g'atoŋa ma mito ŋeyo nger m'oyido iter'iye Esita.
12Nyir m'oyer ri kere jocowo hongo ma dwe apar g'ario munyo jolwokere. Ma dwe aucel jobedo munyo jowire gi mo ma welo kweth swa ma fothirok, aka doko jotero dwe aucel man kareno jokudho kwoŋ jo mo maŋwe kur. 13Munyo weso pa kisi nyako otundo ma kidho i ot pa kere, go won oyero ruk m'osangala cunye. 14Kisi nyako ma weso pere otundo, okidho i ot pa kere othieno, aka yawere odikin itero go i ot pa mon man kama mon pa kere ma githenge jobed'iye. Ka ocow tero go kenyo, go won doko kinyal kidho i ot pa kere kwanyowoko ka kere doko cunye owanya go to lwoŋo go gi nyinge. Sasgaz ma lur am'oyido obedo ŋeca pa kere ma dhumo ot pa mon me.
15Munyo weso pa Esita nyar Abihayili m'oyido obedo ner Modekay otundo, go otimo gima Hegay ma lur owaco rigo; aka orukere i nger ma Hegay ma lur oyero. Kisi nyatoro je oneno Esita gi waŋe maber. 16I hongo m'oter'iye Esita bongi kere Aritakises, obedo i dwe mar'apar, dwe ma Tabethi#2:16 I kalenda pa Joyuda, dwe mar'apar, dwe ma Tabethi Me dwe mar'apar g'ario gi dwe mar'acel 17Kere omito Esita loyo mon man je aka Esita olimo mar gi nema wok bonge. To piyo piyo kere ketho kwoŋ Esita dwoŋ ma bedo nyamicala lunjo waŋ Vasiti. 18Kere otimo ri Esita kalima ma limo dwoŋ pere, aka olwoŋo jodhum pere gi jotel pere je i kalima no. Kere omiyo ndelo ma kalima no bedo ndelo madwoŋ. Kere opoko kisi nyatoro je m'obino i kalima no mic m'owok bongi go won.
Modekay botho kwo pa kere
19I hongo ma weso pa kisi nyako ma kidho bongi kere orumo, to jocokere kanyacel i ot pa mon, kere omiyo Modekay dwoŋ ma dhum. 20To kiri munyo Esita otieko limo dwoŋ ma bedo nyamicala, go k'owiro kula ma kwo pere. Go k'owaco ri nyatoro moro je ni go obedo Jayuda paka Modekay con mere ocuno go. 21I hongo ma kere omiyo Modekay dwoŋ ma dhum i ker pere, Bigithana gi Teres m'oyido jobedo jokur ma dhiot ma kisika pa kere, jocano neko kere r'atoŋa ma miyo Modekay dwoŋ no. 22Can me owinjere i ithi Modekay to go osa ri Esita nyamicala. Esita owaco gime ri kere i nyingi Modekay. 23Munyo omeny tiendi wac me, onwaŋere ni obedo adieri, to jokur ario no iŋawo jo kanek.#2:23 Kanek Me oyido obedo gima i geto kodi yen, aka bedo mabor swa Aka kere owodho or t'indiko gime i kitawo ma mako kwoŋ gigipiny ma ker pere.
Currently Selected:
Esita 2: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.