Zekaria 5
5
Menyirok ma papila m'omin ma ay
1Awire, t'atiŋo waŋan malo, aŋiyo, aka neni, Papila m'omin ma ay. 2Malaika openjan ni, “Ineno aŋo?” Adwoko ni, “Aneno Papila m'omin ma ay, boro mere mita apar, aka laco mere mita abic.”
3Go owaco ran ni, “Me lam macegin kadho ruwaŋ piny gibe, kole kisi dhano ma kwalo ilakwanyo woko luwo kwoŋe, aka kisi dhano ma kwoŋere nono ilakwanyo woko luwo kwoŋe. 4Aladhiro wokadhi, Rwoth pa lwak jolweny waco, aka ladonjo i ot pa jakwo, kodi i ot pa ŋata kwoŋere gi nyingan nono; aka labedo i ot pere to waŋo woko mbawin kiri gi telin.”
Menyirok ma dhako iy'adita
5Malaika m'oyido luwo kodan owok, aka owaco ran ni, “Mondo tiŋi waŋin malo, ineni aŋo me ma wok kadho.”
6Apenjo ni, “Me aŋo?”
Go odwoko ni, “Me adita ma wok, aka nyutho reco ma piny gibe.”
7Neni, otiŋ malo giumo ma nyaraunda, aka oyido nitie dhako m'obedo i dier adita.
8Malaika owaco ni, “Dhako me cungo ri kidakana.” Malaika odilo dhako no iy'adita, aka odiyo dhoke gi tele ma umo. 9Atiŋo waŋan malo, aŋiyo, aka neni, mon ario jowok, koyo oyido nitie i bwombi jo. Bwombi jo oyido cal bwombi obusi, aka jotiŋo malo adita i dier piny kodi polo.
10Apenjo malaika m'oyido luwo kodan ni, “Jotero yukune adita?”
11Go odwokan ni, “Ma geto rigo ot i lowo ma Sinar, aka ilayiko, t'ijengo kenyo i kabedo mere.”
Currently Selected:
Zekaria 5: DHOCDC
Highlight
Share
Copy

Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.