Joroma 13
13
Gir'atima kodi rwodhe ma piny
1Dhano je ripo winjo or pa rwodhe ma piny; ato ongoye meni mar'adhum ma Were ama k'oyeyo, aka jodhum ma jonitie Were ama oketho jo. 2Nyatoro je ma piemo kodi meni pa jodhum manitie, meno piemo kodi gima Were ocano; aka moro je ma timo ameno bino kelo wac kwoŋe won. 3Kole joma timo gimaber jokilwor jodhum, to joma timo reco ayino ama jolworo. Imito bedo ma bu lworo kwoŋ jadhum? Ere tim gimaber, aka go bino pakin. 4Kole go jatic pa Were ma tiyo ri bero perin. To k'itimo reco, lwor go, rupiri jadhum kibedi gi gilweny nono. Go obedo jatic pa Were aka go nyutho joma timo reco keme pa Were. 5Ro wac me dhano je ripo winjo or pa rwodhe, ki nyaka ro keme pajo kende, to ro gima paro ma cunyin nyuthin bende.
6 #
Mat 22:21; Mar 12:17; Luk 20:25 Meno bende am'omiyo wiripo goyo misolo, rupiri rwodhe jotiyo ri Were ka jotimo tic pajo no. 7Am'omiyo, cul win gima wiripo culo dhano; cul misolo perin bongi ŋat'iripo culo, kodi lim perin bende ameno; aka wor win ŋata ripo awora, odoko miy dhano je dwoŋ, ma ripo amiya dwoŋ.
Gir'atima i dier win wegi
8Wikiri wibedi gi banja pa dhano moro je. Nyaka banja ma wiripo bedo gine meno a marok i dier win. Nyatoro je m'omaro nyawote meno otieko winjo Cik. 9#Wok 20:14; Cik 5:18; Wok 20:13; Cik 5:17; Wok 20:15; Cik 5:19; Wok 20:17; Cik 5:21; Jolevi 19:18Or ma waco ni, “Ikir'itim cot, ikir'ineki, Ikir'ikwal, ikir'ibedi g'awanya.” Je kodi man oriw kanyacel i or acel ni, “Mari nyawotin paka iwon imarere.” 10Nyatoro je m'omaro nyawote kilatimo ri nyawote reco. Am'omiyo, marok meno winjo Cik gibe.
11Medo kwoŋ meno, wiŋeyo ndir ma pama ni ndir otundo riwin ma cew. Kole ndir ma both mawan onyo ocore cegin loyo munyo nyaka wacako yeyo. 12Wor cegin rumo, aka piny cegin yawirok. Riameno wawey win timo gigipiny ma mudho to wakwanyo win gilweny ma lero. 13Wabedi win i kwo m'otire paka ji ma jonitie i lero m'odieceŋ, m'ongoye woro kosa mero, cot kosa kidakana, gorok kosa nyeko. 14Kucel ruki win Rwoth Yesu Kristo, aka wikiri wiwey hola ri del, ma timo awanya mere.
Currently Selected:
Joroma 13: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
