Joroma 11
11
Wor pa Were kwoŋ Joisiraili
1 #
Filip 3:5
Onyo apenjo ni, Were otieko bolo woko ji pere? K'ameno be! An won bende abedo Jaisiraili, nyakwar Abraham, acel kwoŋ jonono pa Benyamin. 2Were k'obolo woko ji pere ma go won oyero cako con. Wikuya gima ndiko waco kwoŋ Elia, nger ma go pid'iye kodi Were kwoŋ Isiraili? 3#1 Kerin 19:10,14Owaco ni, “Rwoth, joneko jotuci wac perin aka jonyeko woko migam perin; aŋat'adoŋ kendan, aka jorango kiri nekan bende.” 4#1 Kerin 19:18Were omiyo go radwok aŋo? Odwoko go ni, “Atieko ketho gicen ji gana abirio ma fodi jok'olamo were Bal.” 5Am'omiyo bende kiri gunyo fodi nitie jom'odoŋ, ma Were oyero ro nema pere. 6K'obedo ro nema pere, meno yero pa Were kicungi kwoŋ tim mabeyo ma dhano timo, rupiri d'onyo nema no kidok bedi nema m'otire.
7Onyo aŋo to? Gima Joisiraili jorango tektek jok'onwaŋo; jom'oyer ama jonwaŋo, to jom'odoŋ jobedo gi cuny jo matek. 8#Cik 29:3; Isa 29:10Otimere paka ondiki ni,
“Were omiyo jo cuny ma miŋo,
gi waŋ gin ma k'onyalo neno,
kodi ithi gin ma k'onyalo winjo, kiri konon.”
9 #
Zab 69:23-24
Aka Daudi waco ni,
“Mada kalima pajo wolokere rijo bwo ma ciko jo,
kodi gima redho jo; jowolimi gir'acula!
10Mada waŋ gin tho woko ma jokinyal neno,
miy jowogwomere i candirok pajo ndir je.”
11Am'omiyo apenjo ni: Munyo Joyuda jocer, jopodho to jorere woko? K'ameno be! Rupiri jotimo gimarac, both obino ri Jopath, ŋey womiy Joyuda jowotimi nyeko gi jo. 12K'inen gimarac pa Joyuda okelo silwany mathoth ri piny, aka podho pajo okelo ŋaŋo ri Jopath, onyo ka orwaki jo, silwany no bino thoth marom nedi?
Both pa Jopath
13Pama onyo aluwo gi win Jopath: Kafodi abedo jamoor pa Jopath abino pakere gi tic paran. 14Miti anyalo miyo ji ma nono paran won nyeko, ŋey anyal botho jomegi kwoŋ jo. 15K'inen munyo obol jo woko, odwoki piny gipi i tiyirok gi Were, onyo aŋo man m'obedi ka ojol jo, loyo nwaŋo kwo wok i tho!
16Kole k'adec ma cemo m'omiy Were paka gima nyak marapena leŋ, meno cemo no gipi bende leŋ; aka k'inen tiendi yath leŋ, meno kiri jange bende leŋ. 17To k'inen otiek toŋo woko megi kwoŋ jangi yath vini m'opidhi, aka win ma wibedo jangi vini moro madudi onyo oriw win maber i kabedo pa m'otoŋ woko ca munyo ipoko win ye kwo m'oŋaŋ man tiendi yath m'opidhi no, 18onyo wikiri wipakere ri jangi yen m'ojwer woko ca, rupiri wibedo nyaka jangi yen, aka wiŋati wikithiel tiendi yath to tiendi yath ama thielo win.
19To wibino waco ni, “Ey, kole ojwer woko jangi yen ca ma leŋo ran hongo.” 20Meno otire, ojwer woko jo rupiri jok'oyeyo, to wikiri wibedi gi paro ma pakirok kwoŋ gime; kucel, bedi win gi lworo ayino. 21Ato k'inen Were k'oworo Joyuda ma jobedo paka jangi yen m'otire mere, wiparo nike go bino woro win ayino? 22Onyo neni win paka Were cunye ber aka odoko nyutho gero bende. Go ger kodi joma jopodho, to nyutho win bero tekin wicwire i bero pere; to ka wikitimo ameno, wibende ibino jwero win woko. 23Aka ka Joyuda joweyo bedo ma buyeyo, ibino dwoko jo i kabedo pajo m'onwaŋo jonitie iye, rupiri Were nyalo dwoko jo kendo. 24K'inen win Jopath oŋadi win paka jangi yath vini madudi to iriwo win kwoŋ vini m'opidhi peco, gim'oyido kinyalere, onyo Joyuda ma jobedo jangi yath kwoŋ yath vini m'opidhi, jobino bedo mayot nedi riwo jo kendo i kor yath mere won!
Wor pa Were ri ji je
25Amito ni winiaŋ nyaliŋliŋ me, wutmera, ŋey wikiri wipar ni wiriek swa: Wictek pa ji ma Isiraili k'obedo makiwire, to bino bedo cuka welo kwan pa Jopath ma mitere jowobin bongi Were worom. 26#Isa 59:20-21Aka me apaka Isiraili gipi bino limo both, paka ondiki ni,
“Jaboth bino wok Zayon,
Go bino kwanyo woko reco
pa nyikway Yakobo je.
27 #
Isa 27:9
Abino timo cikirok me gi jo,
munyo akwanyo woko reco pajo.”
28Rupiri jokwero Wac Manyen Maber, Joyuda jolokere jokwor pa Were ma bero mewin, win Jopath. To i yero pa Were, jobedo mere pere ma bero pa kwarere pajo. 29Kole Were kiwir paro pere kwoŋ mic kodi lwoŋo pere ri nyatoro. 30Gime rom kodi gim'otimere riwin Jopath; con oyido wicayo Were, to kole pama onyo wilimo wor pa Were rupiri Joyuda jotimo cay. 31Ameno bende, Joyuda pama jokiwinji Were, ŋey gi wor ma wilimo, jo bende jowolimi wor pa Were. 32Kole Were otieko loko ji je jotwec pa cay, ŋey wonyuthi wor ri ji je.
Pako Were
33 #
Isa 55:8
Thutho ma ŋaŋo pa Were kodi rieko kodi niaŋ pere rom nedi! Ŋa manyalo tito paro ma go ocano? Ŋa manyalo niaŋ kwoŋ royo pere? 34#Isa 40:13Kole ndiko waco ni,
“Ŋa m'oŋeyo paro pa Rwoth?
Odoko ŋa manyalo miyo go rieko?
35 #
Yob 41:11
Ŋa m'otieko miyo ye go gimoro
ma ripo wonwaŋi cul?”
36 #
1 Kor 8:6
Kole go am'ocweyo gimoro je, aka gimoro je nitie kwoŋbedo go kodi rigo. Dwoŋ wobedi ri Were cil gi cil! Ameno.
Currently Selected:
Joroma 11: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
