Cakirok 50
50
1Kenyo Yozefu opodho kwoŋ bamere to ywako go, aka ocwiyo lembe. 2Aka Yozefu owodho or ri ŋecin pere ma jotweyo delkwoŋ jom'otho ma yik ni jowowir delkwoŋ bamere ŋey wokiri wotopi. Aka jotimo ameno. 3Otero jo ndelo piero aŋwen ma ripo gi timo ameno. Aka Jomisir joywako go ma ndelo piero abirio.
4Munyo ndelo ma ywak orumo, Yozefu oluwo gi jodhum pa Farawo ni, “Mondo ter win mikwenda me ri Farawo: 5#Cak 47:29-31Munyo baba cegin tho, omiyan kwoŋirok ni abino yiko go i kaliel ma go oyiko i piny Kanan. Onyo riameno mondo weyi akidhi malo, ayiki baba t'adwoko.”
6Aka Farawo odwoko ni, “Kadhi malo i yik benin paka ikwoŋere rigo.”
7Ameno Yozefu okidho yiko bamere. Jodhum pa kere je, jodongo ma ot pere, kodi jodongo ma piny Misir je jokadho gi Yozefu. 8Jopeco pa Yozefu, wutmin, kodi jopeco pa bamere je jokadho gi go. Nyaka nyithindho kodi mwendi kodi dhok pajo ama jodoŋ iy'adec ma Gosen. 9Cwo i cawila kodi kayina bende jokadho gi go. Oyido obedo kitipa madwoŋ.
10Munyo jotundo i kisia ma Atadi yuwok ceŋ ma Yordan, joywak ma hongo mabor, aka Yozefu otimo kalima ma ywak ma ndelo abirio. 11Munyo ji ma Kanan joneno jono joywak i Atadi, jowaco ni, “Nga me ywak ma kwoŋirok ma Jomisir jotimo!” Meno am'omiyo olwoŋi kabedo no ni Abel Mizirayim.#50:11 Abel Mizirayim Ywak pa Jomisir
12Ameno wot Yakobo jotimo paka go omiyo jo or. 13Jotiŋo delkwoŋe jotero Kanan to joyiko i ŋungu i Makipela yuwok ceŋ ma Mamire, i ndelo ma Abraham oyido onyewo wok bongi Efron Jahiti ma yik. 14Rumacen ma yiko bamere, Yozefu ogik i Misir gi wutmin kodi jono je m'oyido jokadho gi go malo yiko bamere.
Yozefu medo ridho ri wutmin
15Rumacen ma tho pa bajo, wutmin Yozefu jowaco ni, “To k'obedi ni Yozefu fodi odak wan to cano culo wan ro raco je ma watimo rigo?” 16Ameno jodhiro mikwenda ri Yozefu ni, “Mafodi bawan k'otho, 17owaco nike wakwayin, ‘Mondo cwaki reco pa wutmin in munyo jotimo rin marac.’ Aka onyo wakwayin cwaki riwan gimarac ma wan, ŋecin pa Were pa benin jotimo.” Yozefu oywaki munyo owaci rigo.
18Kenyo wutmin Yozefu wegi jobino to jokule piny ruwaŋ go, aka jowaco ni, “Neni, wabedo ŋecin perin.”
19To Yozefu owaco rijo ni, “Wikiri wibedi gi lworo, rupiri akinyali kethirok i kabedo pa Were. 20Wicano ran gimarac, to Were owiro i bero, gwoko kwo pa ji kweth ma konon jokwo ro gim'otimere. 21Ameno wikiri wibedi gi lworo; abino miyo win gi nyithindho mewin cemo.” Ameno go omedo ridho rijo to diyo adundo pajo.
Tho pa Yozefu
22Yozefu omedere bedo i piny Misir gi peco pa bamere, aka otieko oro 110. 23Aka Yozefu oneno nyithindho pa Efrayim kodi nyikwaye je. Go bende oneno nyithindho pa Makir wod pa Manase paka nyithindho pere. 24Aka Yozefu owaco ri wutmin ni, “Acegin tho, to Were bino wendo riwin to wotho win wok i piny me kelo win i piny ma go ociko Abraham, Isaka, kodi Yakobo.” 25#Wok 13:19; Yos 24:32; Ebu 11:22Kenyo go okwayo ji pere kwoŋirok ni, “Ka Were owodhi win wok i piny me, wibino tiŋo cokin paran wok ka.” 26Ameno Yozefu otho munyo jaoro 110 aka owir delkwoŋe wokiri wotopi t'iketho i sanduku ma yik.
Currently Selected:
Cakirok 50: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
