Wok 17

Pi wok i tele

(Kwan 20:1-13)

1 # Kwan 20:2-13 Joisiraili je joeye i thim ma Sin, ka jowotho wok i kabedo acel kidho i man cungo kwoŋ cik pa Rwoth. Joketho kambi i kabedo m'ilwoŋo ni Refidim, to pi oyido ongoye kenyo ma jomadhi. 2Jogeŋisa ri Musa to jowaco ni, “Miy wan pi amadha.”

Musa odwoko ni, “Raŋo wigeŋisa? Raŋo witemo Rwoth?”

3To riyo pi oyido neko ji swa, aka jomedere kigeŋisa ri Musa. Jowaco ni, “Raŋo iwodho wan wok i Misir? Bino neko wan, nyithindho mawan g'ogwaŋe mawan gi riyo pi.”

4Musa oywaki ri Rwoth, “Aŋo ma tim gi ji me? Jocegin lilan gi tele.”

5Aka Rwoth owaco ri Musa ni, “Kwany jotel pa Joisiraili moro, aka iluw ruwaŋ ji. Kadhi gi luth ma i oro ma goyo wi malawa Nayil. 6Neni, abino cungo ruwaŋin kenyo i tele i got Sinai. Goy tele gi luth, aka pi lawok iye ri ji jowomadhi.” Musa otimo ameno, ruwaŋ jotel pa Joisiraili.

7Aka kabedo no ocwoki ni Masa kodi Meriba,#17:7 Masa gi Meriba I dhohiburu Masa nyutho temo, aka Meriba nyutho kigeŋisa kwoŋbedo Joisiraili jogeŋisa to jotemo Rwoth kenyo munyo jopenjo ni, “Rwoth nitie gi wan, kosa be?”

Lweny gi Joamalek

8Kenyo Joamalek jobino lweny gi Joisiraili i Refidim. 9Musa owaco ri Yosuwa ni, “Yer riwan cwo moro jokidhi jowolweny gi Joamalek dikin. Abino cungo i wi tendere gi luth pa Were i cingan.” 10Ameno Yosuwa otimo paka Musa owaco rigo, aka jolwenyo gi Joamalek, kareno Musa, Aron, kodi Hur joidho malo i wi tendere. 11Kisi ka Musa otiŋo cinge malo, Joisiraili joloyo, to k'odwoko piny, Joamalek jocako loyo. 12Munyo cingi Musa jojony, Aron gi Hur jokelo rigo tele ma bedo, to jocungo i thenge mako cingi go malo, ma kiyengere cuka waŋceŋ opodho. 13I nger me Yosuwa okengila Joamalek kicutho.

14Kenyo Rwoth owaco ri Musa ni, “Waci ri Yosuwa wondiki gime i kitawo ŋey wopoy. Waci ri Yosuwa nike abino reyo Joamalek kicutho.” 15Musa ogeto migam aka ocwoko ni Rwoth obedo bendera paran, 16ka waco ni, “Tiŋi malo bendera pa Rwoth. Rwoth lamedere lweny gi Joamalek i luse je.”

Currently Selected:

Wok 17: DHOCDC

Highlight

Copy