Zekariya 7

Khuubuya intsala khukhuukhali khwa ŋali ta

1Mu mwiiko kukuukhola khane nga Dariyusi ali umuyiinga, khu shifukhu she khaane mu mweesi kwe shisheenda (kweesi balaanga bari Kisilefu), Umukasya waamba ise buurume.

2Ari abe babaandu be mu shiriimba Beseli baarumana Shareza ni Regemeleki, ni liiye lyaabwe khuutsya mu Lisaayilo Liikhulu ly'Omukasya, khuuloomba bari Umukasya abawe ikhabi, 3naluundi ni khuureeba basaayi ni baŋoosi bari: “Ari ifwe khwiloosele ni khuulila ni kumutaambo, khulwekhuuba baamala khaale khukhwoonakisa Lisaayilo Liikhulu, nga khubuya intsala mu mweesi kukuukhola kharaano, nga ni khubeele khukhola khuryo khuumala kimiiko kimikali?”

4Nio lwanyuma buurume khukhwaama isi Umukasya uwe kamahe bweetsa isi indi nga buloma buri: 5“Reeba babaandu boosi be mu shibala isho ni basaayi uri, inywe ni mwabuya intsala naluundi nga mulila naabi khulwe kumutaambo mu mweesi kwe kharaano ni kwe kumusaafu, khuumala kimiiko kino kamakhumi musaafu kyoosi, mwaba mulikho mushikhola khulwe khukhuumba ise shiriifwa? 6Namwe inywe ni muba mulikho mulya naluundi munywa, si muba mulikho mukhola muryo khulweenywe mwabeene ta? 7Mu mbuka isi babaandu baaba nga bamenya mu Yerusalemu, naluundi nga bali mu buyiindifu, nga biriimba bibiibebotookheleele, ni n'eebyo bibiili imwaalo, ni bye mu matila abe mbaawo umuundu umenyamo ta. Tsino tsili tsilomo ni tsiinyene tsyeesi Umukasya aamala khaale khuuloma, nga abirira mu baŋoosi bekhaale akho.”

8Umukasya waawa Zekariya buurume nga aloma ari: 9Khaale akho, ise Umukasya uwe kamahe nawa babaandu baase kamakaambila, nga kaloma kari buli busheele bali ni khuubona bari bakhola bibiindu byaŋali, naluundi indi buli mutweela ali ni khuuba ni bubweela ni shiisa isi uwashe. 10Mbaawo khuumiinikhilisa ba namulekhwa, baafuubi, abo babaali babeetswa, namwe abo babaali bataambi ta. Naluundi indi mbaawo khuuweentsa kamakhula ke khuukhola buubi khu washoowo ta. 11Ne baaloba khuurekeeresa byeesi ise naloma, khulwe shiikili baalekha khubitsiilakho ta. Beekala kamaru kaabwe bari beetsa khukhola baryo, bawulila byeesi ise inoma. 12Baaba ni kimyooyo kikyahandalala, bari busa beetsa khuwulila kamakaambila ni biilomo by'Omukasya uwe kamahe, byeesi niye asiindikha khuubetsila nga bibirira mu baŋoosi be khaale akho. Ni nashiryo ise liirima lyamaamba nabakhalalila naabi. 13Nga ise ni nakanikha nibo baalekha khurekeeresa ta, ni nashiryo nabo ni baloomba, nase naaloba khubeelamo ta. 14Ni nashiryo ise nabasalanisa mu manaambo kakaandi, baaba busa uri ikhuungu iye kamaani abe isi bakhabonatsakakho ta, ibasalanisile. Waakila shiibala abe sheesi bamenyamo shekela busa kumubiimbi, yaalekha khubawo umuundu yeesi umenyamo ta.

Currently Selected:

Zekariya 7: LCE

Highlight

Copy

Compare