Zekariya 4

Khuubonekhelwa khwe kusiindi kwe taala

1Malayika tsana isi ise nanyoowa khuukanikha ni naye waakobola luundi, waasisimusa ise, naba nga abe umuundu uuli mu khukona liilo. 2Kila andeeba ari, “Shiina sheesi uboone?”

Ise naamwiilamo indi, “Bona, ise naboone kusiindi kwe taala, nga kuli kwe zaabu, nga khu ngaaki khwakwo khulikho shipwaakhuli she khuuramo kamafura. Khu kusiindi kwe taala kuno, nga khulikho tsitaala musaafu, nga buli indweela ilikho biifwo musaafu bye khuuramo tsintaambi. 3#Bimb 11.4Nga iliwo kimisaala kimi olivu kibili aambi ni kusiindi kwe taala iyo, nga kutweela kuli khu mukhono kumulayi, ni kukuundi nga kuli khu mukhono kumunyeletsi.”

4Ise naareeba malayika tsana shireebo ndi, “Musakhulu, bibiindu bino bimanyisa shiina?” 5Kila malayika tsana antsilamo ari, “Iwe s'uumanya sheesi bibiindu bimanyisa ta?”

Ise naamwiilamo indi, “Musaakhulu, ise sinaamanyile ta.”

6Lwanyuma malayika tsana waanomela ise khuuwa Zerubabeeli buurume buno bubwaama isi Umukasya uwe kamahe, nga buloma buri: “Iwe kane ufuure mu busoolo, akhuba khulwekhuuba ni kamaani ke bye buusoolo ta, namwe khulwe kamaani koowo wamweene ta, ne akhali khulwa mwooyo wase. 7Bihangafu bibiili bitsowu nga tsingoongo kane bikhubonekhele iwe. Kane iwe wombakhe Lisaayilo Liikhulu bushaakha. Lweesi iwe ukhaabe nga ulikho urakho libaale limaliilisi, babaandu bakhaakhupe liyoombo nga baloma bari, ‘Nga Lisaayilo lili limiliwu, nga lili limiliwu naabi!’”

8Buurume bubuundi bwaama isi Umukasya bweetsa isi ise nga buloma buri, 9“Zerubabeeli waamalile kumusiingi kwe Lisaayilo Liikhulu, naluundi niye kane amaliilise khukhwombakha shishoombakhe shoosi. Nga isho shakholikhile, kane babaandu baase bamanye bari ise niye uwakhurumana iwe isi bali. 10aNaanu ulekelesa shifukhu khweesi bibiindu bikyeekhe bikholikhila. Nibo bakhaabe ni kumwikhoyo nga baaboone Zerubabeeli nga ali ni lukhoba lupima nga elosela khukhwombakha Lisaayilo Likhulu, shikile babe ni kumwikhoyo.” 10b#Ezira 5.2#Bimb 5.6Malayika waanomela ise ari, “Tsitaala tsana musaafu tsili nitsyo tsiimoni musaafu tsy'Omukasya, tsitsiibona khu shibala khwoosi.”

11 # Bimb 11.4 Kila ise imureeba ndi, “Kimisaala kimi oliva kiibili, nga kutweela kuli khu luwaande lulayi, ni kukuundi khu luwaande lunyeletsi lwe kusiindi kwe itaala iyo, kimanyisa shiina? 12Ni tsisakya tsibili tsye kimisaala kimi oliva kikiili andulo we tsikhoombe tsye izaabu mweesi kamafura ke ku olivu kaama, kimanyisa shiina?”

13Waandeeba ise ari, “Iwe siwamanyile sheesi kino kimanyisa ta?”

Ise naamwiilamo nga inoma indi, “Musaakhulu, ise sinaamanyile ta.”

14Kila aloma ari, “Abano bali nibo basaani batsana babili, beesi Umukasya uwe shiibala shoosi, aamala khaale khuurobola, waababiita ari babe babaakaanisi beewe.”

Currently Selected:

Zekariya 4: LCE

Highlight

Copy

Compare