Baroma 2
2
Khukhalawo khwa Wele
1 #
Mat 7.1; Luk 6.37 Ne iwe n'ukhalila uwashoowo kumusaango, iwe s'uli n'ilomo yoosi iye khuwotsa ta? Khulwekhuba n'ukhalila uwashoowo kumusaango, nawe uba wekhaliile wamweene. Shishikila shili ndi iwe ukhala kumusaango nawe wamweene ukhola bibiindu byeene ibyo. 2Ne khwamanya khuri khukhalawo khwa Wele khuba khwa ŋali, n'aba wakhaliile babaandu babakhola baryo kumusaango. 3Ne iwe wambaasa uri n'ukhalila abo babakhola bibiindu nga ibyo kumusaango, ate nga nawe wamweene ubikhola, nawe Wele s'alikhukhalila kumusaango ta? 4#Makh 11.23Namwe ulekelesa bukali bwe shiisa sha Wele, ni khukhwikhaliilikha khweewe, ni bulayi bweewe? S'umanya uri shitsiililwa sha Wele shili ndi iwe wibiiyise bibyonako byoowo ta?
5Ne khulwe bumiinyi ni shikili bye kumwoyo kwoowo, ulikho wibikhila wamweene shitaambiso khu shifukhu sheesi Wele alyokesanisilakho lirima lyeewe ni khuukhala kimisaango khweewe khwa ŋali. 6#Zab 62.12; Nikh 24.12Khulwekhuba Wele aliiwa buli mutweela kumukheemba kweewe, khulondekhana ni bikholwa byeewe. 7Abo babaaba barabila khukhola buulayi, nga baweentsa shiriifwa ni lukoosi, Wele alibawa bulamu bubukhawawo ta. 8Ne abo babaali batakha nga si baloondelela bya ŋali ta, ne khurusakho ndi baloondelela bye bubwonaki, Wele s'alibawaambilakho shiisa nakhari ta. 9Umuundu yeesi ukhola bye bubwonaki, alifuna khutaambisibwa ni butsiina, khurakikha ni Bayudaaya, ne akhaba ni isi Banaambo nabo. 10Ne Wele aliiwa shiriifwa, n'imbuyila, ni lukoosi abo boosi babakhola buulayi, nga anyoowela khu Bayudaaya, nio elekho ni Banaambo nabo. 11#Maka 10.17Khulwekhuba Wele nga akhala kumusaango, s'aromboosa mu baandu ta.
12Ni naabo boosi babakhola bibyonako nga si bamanya bari likaambila lya Musa liliwo ta, Wele alibakhalila kumusaango bahele nga s'araambisa likaambila lya Musa ta. Ne abo boosi babakhola bibyonako ate nga bawulibwa ni likaambila lya Musa, Wele alibakhalila kumusaango nga ema khu likaambila. 13Khulwekhuba abo babarekeeresa busa likaambila ne balekha khulitsiilakho nga ni liloma, si bali nibo bakwalaafu mu moni tsya Wele ta. Ne akhali abo babakhola nga likaambila ni liloma nibo bababalibwa khuuba bakwalaafu.
14Banaambo si bali ni likaambila ta. Ne singa mu busaalikhana bwaabwe bakhola nga likaambila ni likana, babeene baba bali likaambila, akhaba nga si bali ni likaambila lilyaronebwa ta. 15Baba bokesanisile bari sheesi likaambila liloma sharonebwa mu myoyo kyabwe. Ni bibyambaaso byabwe lukana byokesana biri shino shili sha ŋali. Khulwekhuba bibyambaaso byabwe lukana bibawabila, ne lukana bya bayeeta. 16Nashiryo khulondekhana ni kamakhuuwa kamalayi keesi ise inangilila, Wele khu shifukhu shimaliilisi khubirira mu Yezu Kristu, alikhala kimisaango kye bibiindu bibyebisa.
Bayudaaya ni Likaambila
17Ne iwe wilaanga khuuba shiina? Wilaanga uri uli Umuyudaaya nga wiyikina likaambila nalundi wiruuya uri iwe uli umulayi isi Wele? 18Nalundi iwe wambaasa uri wamanya byeesi Wele akana ukhole nga wafukiilila ibyo bibifuura bulayi, khulwekhuba bakhuleekela kamakaambila? 19Iwe ushiŋaŋasa uri uli umuundu uwokesa babofu intsila, nalundi uli buwaanga ni she khubonelakho isi abo boosi babaali mu shilima? 20Wiyila nga iwe niye uleekela basilu, umuleekeli uwe babaana, nga iwe niye uwawamba kamakaambila nalundi iwe niye uli ni khumanya ni bwa ŋali?
21Noola iwe niye uleekela babaandi, khulwashiina kila iwe ukheleekela wamweene? Shiina kila iwe wiiba, ate iwe uleekela uri mukheeba ta? 22Shiina kila iwe ukhola buyeyani, ate iwe uleekela uri umuundu yeesi s'akhiile wakhola bye buyeyani ta? Iwe unyala uryeena walekelesa bifwaani byeesi babaandu babaandi besaaya, ate nga iwe wamweene unuula bifwaani bino khukhwaama mu masaayilo kaabyo? 23Iwe uwiruuya uri wawamba kamakaambila ka Wele, shiina kila umuwambisa kamaŋaanyu khulwe khufuniaka kamakaambila keewe? 24#Isay 52.5Khulwekhuba bibyaronebwa biloma biri, “Bafwotsola lisiina lya Wele mu Banaambo khulwenywe.”
25Ni nashiryo khukhwinjila imbalu khubamo itsamu nga mwalondeleele kamakaambila. Ne ni mufuniaka kamakaambila, ni khukhwinjila imbalu khweesi mwenjila, khuba khuli busa nga babakhenjila imbalu ta. 26Nashiryo umukulwa ukhenjila imbalu ta, n'atsiila khu biindu bibiili mu makaambila, wambaasa uri Wele singane amubale nga uwenjila imbalu ta? 27Nashiryo abo mu mubili babakhenjila imbalu ta, ne nga baloondelela kamakaambila, nibo babaalibakhalila inywe kumusaango, inywe babaali ni likaambila lilyaronebwa. Nalundi mwayingila imbalu, ne shitweela busa mufuniaka kamakaambila.
28Khulwekhuba khuuba Umuyudaaya sishiba ndi shili shishiindu she kumubili busa ta. Namwe khukhwinjila imbalu inyene seshili shishiindu shishibonekhela busa khungaaki ta. 29#Maka 30.6Umuyudaaya umweene aba uyo uli Umuyudaaya mu mwoyo mukari. Ni imbalu iya ŋali isi enjila iba yoolela ilala khu mwoyo kweewe. Iba iye khu mwoyo, ne shiili iye khu ngaaki busa ta. Umuundu uba aryo, abuyilibwa ni Wele, ne s'abuyilibwa ni babaandu ta.
Currently Selected:
Baroma 2: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.