Baroma 12
12
Bulamu bushaakha mu Kristu
1Be buulebe, khulwe shiisa sha Wele shikali isi ifwe khuli, imbekoontselela ndi muwaaneyo kimibili kyenywe isi Wele, kibe nga isaayilo iya ŋali inyene, naluundi ikhosefu iyakhila khuwanayo isi Wele lundi imwikhoyesa. Khuno nikhwo khukhwisaaya khwenywe khwe mu mwoyo lundi khwa ŋali. 2Mukhebirisaka nga shiibala shino ni shikana ta. Ne ni mulekhe Wele abashuuse kimyoyo kyenywe kikyele kimishaakha, nio munyalise khukhola bibiindu bilayi, bibyaakha khukholebwa, nalundi bikhosefu, ibyo byeesi Wele akana.
3Khulwe bubweela bweesi Wele amba ise, imbaboolela inywe mweesi ndi buli mutweela khus'inywe akheyambaasakho khuuba niye uwe angaaki khufuura babaandi ta. Akhali buli mutweela ni eyambaasekho nga etsililisa, na buli mutweela khulondekhana ni bukali bwe khufukiilila bweesi Wele amuwa, nga ni khuli. 4#1 Kor 12.12Shili busa nga kumubili mutweela ni kulikho bisiintsa bikali, ne buli shisiintsa shikhola kumulimo kukwasho. 5Ni nafwe khuli busa khuryo. Akhaba nga khuli bakali, ne khuli kumubili mutweela mu Kristu. Buli mutweela ali uwe kumukaso isi uwashe. 6#1 Kor 12.4-11Biwaanwa byeefwe byeesi khwafuna khukhwaama isi Wele khulwe bubweela bweewe, bili bye tsisaambo tsitsikhali indweela ta. Noola shiwaanwa shoowo shili she buŋoosi, shiraambise nga khufukiilila khwoowo ni khukhuleekela. 7Noola shiili she bubwakaanisi, shiraambise mu khwakaanisa; namwe ne shiba she buleekeli, shiraambise mu khuleekela. 8Noola shili she khukaambila babaandi nga ubesamo kamaani, wakha khushiraambisa uryo. Noola shili she khuwanayo isi abo babakhali ni nabyo ta, wanayo nga siwibalilila ta. Uyo uli ni shiwaanwa she khuwambila babaandi shiisa akhiile khushikhola akhali khukhwiŋuluŋuunya ta.
9Khukana khwaakha khuuba khwa ŋali khukhweene. Mukhekoomba khukhola bibyonako ta. Nalundi ni muwandalalile khu buli shiindu shishiili shilayi. 10Ni mukanane mwabeene bulayi nga be buulebe ni bashiile khukanana, nga buli mutweela ali ni kameelu ke khukhwisamo uwashe shiriifwa. 11Raamba ni kamaani; mukhabamo butoro ta. Ni mwakaanise Umukasya nga muli basangaafu, khulw'Omwoyo. 12Lekha khukhwiyikina khweenywe khubareerere kumwikhoyo. Akhaba ni mubira mu bukosi, ni mube ni khukhwikhaliilikha, nalundi ni mube nga muloomba busheele. 13Noola mutweela khu bakhosefu si bali ni shishiindu ta, ni mubawe khu byeesi muli ni nabyo, nalundi ni mube ni kimyoyo kimilayi, nga muli ni bubweela.
14 #
Mat 5.44; Luk 6.28 Abo babaabakubyeenga inywe, ni mu baloombele ikhabi; ni mubaloombele, ne mukhabatsuba ta. 15#Sir 7.34Ni mwikhoyaatsakile atweela ni naabo babekhoya, nalundi mube mumutaambo atweela ni naabo babaali mu mutaambo. 16#Nikh 3.7Ni mumenyatsake mu lukoosi ni babaandu boosi. Mukhabatsaka be shikili ta. Ni mukholakanile atweela ni bataambi. Mukheyambaasa khu mwabeene khuuba bakyesi ta.
17Nga umuundu wakhukholilekho buubi, ukhelihaasa ta, ne lekha buli mundu abone ari ukhola bilayi mu moni tsaabwe. 18Noola shinyalikha, khakakho nga ni munyala, khumenya mu lukoosi ni babaandu boosi. 19#Maka 32.35Bakanwa baase, mukhakhakakho khukhwilihaasa ta. Ibyo ni mubilekhe mu makhono ka Wele. Khulwekhuba bibyaronebwa bikhosefu biloma biri, “Umukasya aloma ari, khukhwilihaasa khuli khukhwase. Ise samweene niye ulilihaasa.” 20#Nikh 25.21,22Mu shifwo she khukhwilihaasa, noola umusiku woowo intsala imulya, n'umuwe she khulya. Noola ali bulesa, muwe she khuunywa. Khulwekhuba iwe nga wakholile uryo, kamaŋaanyu kamuwaamba waba busa nga esi batsushile kamaanda ke kumulilo khu murwe. 21Ukhafukiilila khukhola bibyonako khwetsula mu bulamu bwoowo ta, ne akhali n'uwule bibyonako nga ubirira mu khukhola bulayi.
Currently Selected:
Baroma 12: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
