Baroma 10
10
1Be buulebe, ise khukana khwe kumwoyo kwase ni khuloomba khwase isi Wele khu lwe ba Isiraeli bili biri, khali Wele abawonesele. 2Ise ishiwandalasa ndi mu bulamu bwaabwe, Wele bamukana naabi. Ne khukana khwaabwe khutaambamo khumanya khukhumala. 3Khulwekhuba mu saambo yeesi balekha khubamo ni bibiwaamba khu bukwalaafu bubwama isi Wele bibiimala ta, baalekha khulondelela bya Wele ta, ne akhali baweentsa khurawo bukwalaafu bubwaabwe. 4Khulwekhuba ari Kristu wakila kamakaambila kayakama khuraamba, nio buli mundu yeesi umufukiililamo abe umukwalaafu isi Wele.
Buwonesi buli bwa Boosi
5 #
Lev 18.5
Nga Musa arona khu bibiwaamba khu bukwalaafu bubunyolikhana khubirira mu makaambila aloma ari, “Umuundu yeesi ukhola nga kamakaambila ni kaloma, alifuna bulamu khulwe kamakaambila.” 6#Maka 30.12-14Ne bukwalaafu bubwimile khu khufukiilila khw'omundu buloma buri, “Ukhereeba mu mwoyo kwoowo uri, ‘Ne naanu ukane aniine mwikulu akhureerere Kristu asi khu shiibala?’ 7Namwe ukhereeba uri, ‘Naanu ukane ekhe asi imakoombe khukhureera Kristu khungaaki, khukhwaama mu bafu?’ ” 8Shisharonebwa shiloma shiryeena? Sishiloma shiri, burume bwa Wele, nga nibwo buli shilomo she khufukiilila sheesi ifwe khukukuula, shili ambi ni nawe. Shili khu minwa kyoowo, nalundi shili mu mwoyo kwoowo? 9Khulwekhuba iwe n'ufukiilisa ni kumunwa kwoowo uri Yezu niye Umukasya, nalundi wafukiilila mu mwoyo kwoowo uri Wele amulamusa khukhwaama mu bafu, uliwonesebwa. 10N'ufukiilila ni kumwoyo kwoowo, wikyela umukwalaafu; ne n'ubuula ni kumunwa kwoowo, uwonesebwa. 11#Isay 28.16Nga bibyaronebwa bikhosefu ni biloma biri, “Mbaawo umuundu namutweela ufukiilila mu Yezu, uliwambisibwa kamaŋaanyu ta.” 12Khulwekhuba mbaawo khuromboosa akari w'Omuyudaaya n'Umunaambo ta. Umukasya mutweela uyo, niye Umukasya uwa boosi. Nalundi niye ukabila boosi babamwiitsayo buyiindifu bweewe. 13#Yow 2.32Nga ni sharonebwa shiri, “Buli mundu yeesi uwisaaya Umukasya, aliwonesebwa.”
Mbaawo khukhwiwambilisa ta
14Ne babaandu banyala baryeena besaaya Umukasya nga bashiili khumufukiililamo ta? Nalundi banyala baryeena bamufukiililamo, nga bashiili khuwulila burume bubwama isi Umukasya ta? Nalundi banyala baryeena bawulila bibiwaamba khu Mukasya, nga imbaawo ubakhupiile kumulaanga ta? 15#Isay 52.7Nalundi babaandu banyala baryeena bakhupa kumulaanga kwe burume, nga imbaawo ubarumanile ta? Ne nga bibyaronebwa bikhosefu ni biloma biri, “Babareera kamakhuuwa kamalayi nga bali ni bikele bilayi!” 16#Isay 53.1Ne seshili bari boosi bakaanila kamakhuuwa kamalayi kano ta. Nga Yisaaya n'aloma ari, “Umukasya, babaandu beenga babafukiilila kamakhuuwa keesi ifwe khwakukuula?” 17Nashiryo, khufukiilila khwama mu khurekeeresa burume, nalundi burume bwiitsa khukhwaama mu khulaangila khweesi Kristu akhola.
18 #
Zab 19.4
Lekha ise indeebe shireebo: Shinyala shaba shiri bashiili khuwulila burume ta? Ilala bawulila burume, nga bibyaronebwa bikhosefu ni biloma biri,
“Likono lye babaandu babakukuula burume lyayola mu shiibala shoosi.
Nalundi burume bwaabwe bwayola isi shiibala shakama.”
19 #
Maka 32.21
Khayo indeebe shireebo shishikhola khabili: Shinyala shaba shiri babaandu be mu Isiraeli si bamanya burume ta? Musa anyoowa khukhwiilamo shireebo shino khaale busa nga aloma ari,
“Ise indiraambisa linaambo lilishili khukhwikyela linaambo ta,
indikila liwambise babaandu baase libuba,
ni lwe linaambo lye babaandu babaali basilu indikyelisa babaandu khuuba be lirima.”
20 #
Isay 65.1
Ni Yisaaya ashilomakho ni kamaani nga n'aloma ari,
“Babaandu babakhameentsa ta, nibo babanyoola ise;
nalundi ari samweene neyokesanile isi abo babakhaamentsa ta.”
21 #
Isay 65.2
Ne nga Yisaaya akanikha khu ba Isiraeli aloma ari, “Buli shifukhu ise indi umwirekefu khukhwakaanila babaandu babakhakana khuwulila ta, nalundi babaali ni bituluungu.”
Currently Selected:
Baroma 10: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
