Tsinikha 7
7
Khuureewula isi umukhasi umuyeyani
1Mwaana wase, shebulilatsaka biilomo byase byeesi ikhuboolela,
ubiikhe biilakilo byase mu mwoyo kwoowo mukari.
2Yiliindatsaka biilakilo byase byeesi ikhuboolela,
ni nawe kane ube umulamu.
Yiitsiliilisa khuuliinda biilomo byase nga n'uliinda imoni yoowo.
3Biliinde buulayi ubyoomise nga intsiyi niyomela khu lwaala.
Biilomo bino birone khu mwoyo kwoowo mukari.
4Lekha kamakhula kabe nga umukooko woowo,
ni khuumanya khwe mukari khufwaane nga umusaale woowo umweene.
5Nibyo kane bikhuliinde iwe isi umukhasi umuyeyani,
kane bikhuliinde isi khuwoombelesebwa khw'omukhasi umuyaayu.
6Ise lutweela naba nga ndi mwitilisa lye ntsu yase,
nekulawo nesheenga,
7naabona babaandu baasooleli baakali, babashili khuumanya buulayi ta,
ne noofwaasamwo mutweela uwaba umusilu.
8Umweene yuno aaba nga alikho akyeenda khu luguudo,
nga abirira aambi ni ntsu y'omukhasi mutweela,
waaba akyeenda nga atsya khu mukhoosi kukuulola lwe buuntsu nyeene.
9Antsye bwaba bwilabula angoloobe,
nga alikho amaliyaka.
10Lwanyuma umukhasi mutweela weetsa khuumwakaanana,
nga waakwaarire nga umukhasi malaaya, nga ali ni shitsiililwa shiibi.
11Umukhasi uyu aaba nga waabalakala busa,
nga s'alikho ni kamaŋaanyu koosi ta,
nga s'ekhalakho ingo weewe nakhafwiiti ta.
12Nga akyeenda khukhwaama khu luguudo lutweela
lwe mu shiriimba khuutsya khu luundi,
nga aliindilila khuuwaambilisayo umusaani yeesi.
13Aryo waakwa mu shifuba sh'omusaani umusooleli uyo,
waamunuuna imunwa, waamwoofwaasa buulayi mu moni,
waamulomela ari,
14“Nawaanileyo biwaanwa biikali naabi ingo wase,
shaleelo shino indiyo ni tsinyama tsingali busa,
15ni nashiryo, ari neetsile khuukhwaakaanila iwe.
Imbeele naakhukanile naabi, ari bona naakhunyoolile!
16Naalile bulili bwase ni tsisuukha tsiimiliwu naabi,
tse tsiraangi tsitsibonekha buulayi khukhwaama mu shibala she Misiri.
17Naafuyiliile bulili bwase ni bibiwunya buulayi bibyaama mu bubaani,
ni kimisaala kikiwunya buulayi.
18Ari yiitsa khutsye!
Khakhutsye khukone fweembi, khwikhoye nga khwaakonile atweela.
19Lwekhuuba shaleelo shino, umuseetsa wase s'aliyo ingo ta,
waatsiile lukyeendo lwe aleeyi naabi.
20Niye aasutile tsinusu ngali naabi waatsya ni natso,
nashiryo niye singene akobole khaangu kharyo ta,
khuurusakho nga abirirewo tsisabiti nga tsibili.”
21Umukhasi uyo waamukhongelesa naabi
nga araambisa biilomo biilayi biryo bye khuuwoombesa.
22Khaangukho, umusaani uyo waamuloondakho,
waafwaana nga ikhaafu isi batsya khusala,
nga ikhisi iili khuutsya khukwa mwilowo,
23nio bufumo bukiwunakile ilala.
Waatsya nga waafwaanile khanywiinywi khakhaali khuutsya khukwa mu mureko,
nga waakhumanya ari buulamu bweewe buli mu shihaangafu ta.
24Ni naari baana baase, ni mundekeerese buulayi.
Muwuliilise buulayi biilomo byeesi ise inoma.
25Mukhafukiilila umukhasi ufwaana nga oyu
waabakosaasa intsambaasa yeenywe ta,
mukhaborokha mwaatsya mu ntsila tseewe tsiimbi ta.
26Lwekhuuba umukhasi uyu waayila basaani baakali mu khuhela,
ilala waayila babaandu baakali swa busa mu khukoraana.
27Intsu yeewe ili kumukhoosi kukuutsya i makoombe,
kuli kumukhoosi kukuutsya mu shibala she baafu.
Lumasaaba Catholic Bible © The Bible Society of Uganda, 2017.