Tsinikha 26
26
1Sishaakhila khuuwa umuundu umusilu shiriifwa shiikali ta,
lwekhuuba shifwaana busa nga n'ubona kamararara kakaakwa khu mbuka iye kumuumu,
namwe ifula khu mbuka iye shimiyu.
2Bitsubo bibikhali bibyoowo sibikhuwaambakho ta,
ne bifwaana busa nga n'ubona namundyoole
namwe khanywiinywi khakhapaamburukha nga khafulaafula busa
nenga sikhakwa aasi ta.
3Uba ni kumukhomwa khuukhupa iŋwaaŋwa yaakyeenda buulayi,
naluundi uba ni miimbo khuukhupa i sikilya,
n'umuundu umusilu naye aryo akhaya khuukhupibwa.
4Siinga wiilamwo shireebo she buusilu sh'omuundu umusilu,
nawe ufwaana busa nga umusilu mweene ushireebile.
5Ne siinga wilamwo shireebo sh'omuundu umusilu nga buusilu bweewe ni buli,
uyo ushireebile kane ewulile ari s'ali umukyesi nga ni eyambaasa khuuba ta.
6Iwe niwiyikina umuundu umusilu, waamuwa buurume bwoowo khuukhuyilila
ufwaana busa nga umuundu uwikhalilekho shikyele sheewe,
namwe uyo unyweele buutwa.
7Lunikha lulurura khukhwaama mu khanwa kh'omuundu umusilu
silulimo ni kamakhulu ta, lufwaana busa nga shikyele shishalemala.
8Uyo uruuya umuundu umusilu
afwaana busa nga umuundu ubowa libaale mu kholoto.
9Lunikha lulurura khukhwaama mu khanwa kh'omuundu umusilu
lufwaana busa nga umuundu umumeesi ni ekhala aasi
khuurusa liiwa khukhwaama mu mukhono kweewe.
10Umuundu uwaandiikha uyo uuli umusilu khuumuraambila kimilimo kyeewe,
namwe khuuwaandiikha umuundu ukyeendaana busa,
afwaana busa nga umuundu umala kalasaka buufumo bwe buyiingo busa aryo.
11 #
2 Pet 2.22
Nga imbwa nikobolayo khuulya byeesi ilusakile,
n'umuundu umusilu naye aryo elayo waakhola luundi bye buusilu byeewe.
12Waamanyakho umuundu uwilaanga umweene khuuba umukyesi?
Umuundu umusilu aba ni kumwiyikino kumukali khuumufuura niye.
13Umuundu umutoro ekhala nga aloma ari,
“Iliyo italanyi khu ntsila!
Ilala ibulafu iyo mu mikhoosi kye shiriimba iliyo italanyi!”
14Nga n'ubona lulwiitsi lwe ntsu ni lushuukhila khu pata,
umuundu umutoro naye akhola aryo nga ali khu shitaanda sheewe.
15Umuundu umutoro anyala waayila kumukhono kweewe mu sowaani,
ne nga s'anyalisa ni khuusuta kumukhono kweewe kweene waakuniinisa imunwa ta.
16Umuundu umutoro ebona nga ali umukyesi naabi
khuufuurisa baawi be kamakyesi musaafu.
17Umuundu uwitubila mu khulomana khukhukhali khukhweewe ta,
afwaana busa nga umuundu ukhweesa khukhuru khwe mbwa iili khuubira khu ntsila.
18Nga n'ubona umuundu umupeme namwe umutiimi
ulasaka buyiingo busa aryo bwaakhoonya babaandu,
19niye umuundu utsya waawombesa umwesanwa weewe,
lwanyuma waakyelawo waamulomela ari, “Imbeele iŋaaya busa.”
20Nga n'ubona kumulilo ni kusima nga tsiikhu tsaaweelewo,
ni khuulomana nakhwo khuryo khwaakama nga lukaambo lwaakamile.
21Kamaanda ke kumulilo kareera buukhafu, ni tsiikhu tsaaburusa kumulilo,
naye aryo umuundu uwe buurafu buukali nga n'arakikha bisaayuumba.
22Bilomo by'omuundu uwimoonyelesa ni lukaambo biŋaaha naabi,
lwekhuuba umuundu ubirekeeresa abimila byeekha mu byambaaso mukari.
23Biilomo biilayi bibikanikhibwa khu ngaaki busa
ne nga mu mwoyo mukari mulimo buubi bwonyene,
bifwaana nga inyuungu iye liloba iyawakhibwakho ni ifeetsa khu ngaaki.
24Umuundu umubeeyi anyala waabisa bubiiyile aasi mu mwoyo kweewe,
ne nga emiliisa busa khu ngaaki.
25Umuundu ufwaana aryo akhakanikha buulayi arye,
ukhamufukiilisa byeesi aloma ta,
lwekhuuba mu mwoyo kweewe mwaayitsula buubi buukali naabi!
26Umuundu uyo anyala waabisa buubi bweewe ubwo,
ne imbuka yoola babaandu baabona bibiindu biibi byeesi akhola.
27 #
Sir 27.25-27
Umuundu urekela basheewe kumureko ari bakukwemo,
umweene ashuukha waakukwamo,
ni nooyo upiringisa libaale ari litsye likhupe babaandi,
likhaashuukhe limuminiaangulake umweene.
28Khuukanikha bye bubeeyi uri nio utsiinise babaandi shimanyisa shiri waababiyila,
ni khuubawombesa uba ukana khuubahesa.
Lumasaaba Catholic Bible © The Bible Society of Uganda, 2017.