Khuubala 12
12
Miriamu ni Aroni beluŋuunya khu Musa
1Musa ayila umukhasi uwe Kushi. Isho shaakila Miriamu ni Aroni baamwikiitsa. 2Baaba nga baloma bari, “Umukasya uyu akanikhila mu Musa yenyene? Nafwe wakhukhukanikhatsakilamo ta?”
Umukasya wawulila khukhwiluŋuunya khwaabwe. 3#Sir 45.4Ate nga Musa aaba umusaani umuwolu naabi, aaba umuwolu khufuura babaandu boosi babaaba khu shibala shoosi.
4Kila khaangukho Umukasya aboolela Musa, ni Aroni, ni Miriamu khukhwiitsa abwinjililo e Lisari Likhosefu. Baryo bondaru baatsya. 5Umukasya weetsila mwifuumbi, wemikha amulyaango kwe Lisari, waalomela Aroni ni Miriamu khukhwisyeenda aambi. 6Waabalomela khuurekeeresa buulayi, nga abaloma ari,
“Siinga nga ibawo umuŋoosi yeesi akari mwiinywe,
ise nirumbula is'ali khubirira mu khubonekhelwa ni mu marooro.
7 #
Heb 3.2
Ne seshili shiryo isi umwakaanisi wase Musa ta.
Niye naamurawo khuuba umuraangilisi we babaandu baase ba Isiraeli.
8Nga inganikha ni naye, khuukanikha imoni khu moni,
mbaawo niye sheesi ise imubisabisa,
namwe natalaanda ni tsingano ta.
Niye ni khukhuumbonakho waayimbonakho!
Lwashiina inywe mweŋuluŋuunyile khulw'omwakaanisi wase Musa?”
9Aryo Umukasya lirima lyaamuniina khulwa Aroni ni Miriamu. Lwanyuma waarurawo waatsya, 10ni lifuumbi lilyabawo khu Lisari Likhosefu lyaatsya. Lubaluba, shihaafu she kumubili kwa Miriamu sheetsulakho bikeenge, shaakhosa shiri tswee. Aroni ni eshebukha waabona shishakholikha khu Miriamu, nga waakhosile, 11waalomela Musa ari, “Musakhulu, ukhakhuwa ifwe shitaambiso, lwekhuuba khwakholile shishiindu she busilu nga shino ta. 12Ukhalekha shihaafu sha Miriamu shaabola shafwaana nga sh'omwaana usaalikhile nga waafwiilile mu nda mwa maayi weewe ta.”
13Kila Musa aloomba isi Umukasya nga aloma ari, “O Wele, naakhwikoontseleele, n'umuwonese.”
14 #
Bala 5.2,3 Ne Umukasya waamwiilamo ari, “Iba nga paapa weewe uwamufuutsile kamare mu moni mweewe, khali abeele ni kumutaambo kwe khuuswaala khuumala biifukhu musaafu. Nashiryo ni mumulekhe amenye ibulafu we kaambi khuumala biifukhu musaafu, nio lwanyuma mumukobose.”
15Aryo Miriamu baamwikalila ibulafu we kaambi khuumala biifukhu musaafu. Babaandu ba Isiraeli sibenyukha khuurakikha lukyeendo ta, khukhwoolesa Miriamu n'amala khukobola. 16Lwanyuma lwayo benyukha khukhwaama i Hazerosi, baatsya bakholayo i kaambi ikiindi mu mubiimbi kwe Parani.
Currently Selected:
Khuubala 12: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
