Khuubala 1
1
Khuubala khukhwanyoowa
1 #
Bala 26.1-51
Khu shifukhu shishinyoowa she kumweesi kwe khaabili, mu mwiiko kukuukhola khabili, nga babaandu ba Isiraeli balyaamile mu Misiri, Umukasya waakanikha isi Musa nga ali mu Lisari Likhosefu, mu mubiimbi kwa Sinaayi. Waamulomela ari, 2“Ngana iwe ni Aroni mubale babaandu ba Isiraeli boosi nga musiintsiila khu tsiingo, ni bukuuka bukyeekhe. Mubale babaandu besaani boosi 3baboolesa kimiiko kamakhumi kabili kye buukhulu ni khufuurisakho awo, mu Isiraeli mwoosi, babanyala khuutsya khusoolana mu busoolo. 4Kane mube nga muyeetebwakho ni basaani babaakhulila bikuuka byaabwe, nga buli shikuuka shaakaanisayo umusaani mutweela.”
5Bino nibyo bikuuka atweela ni kamasiina ke baaraangilisi ba buli shikuuka, babaakane baakhuyeete: Elizuri umusooleli wa Shedewuri, khukhwaama mu shikuuka sha Rewubeni. 6Shelumieli umusooleli wa Zurishadaayi, khukhwaama mu shikuuka sha Simeoni. 7Nahishoni umusooleli wa Aminadabu, khukhwaama mu Yuda. 8Nesaneli umusooleli wa Zuari, khukhwaama mu shikuuka sha Isakaari 9Eliyabu umusooleli wa Heloni, khukhwaama mu shikuuka sha Zebuluni. 10Elishama umusooleli wa Amihudi, khukhwaama mu shikuuka sha Efurayimu (mutweela khu basooleli ba Yozefu). Ni Gamalieli umusooleli wa Pedahizuri, khukhwaama mu shikuuka sha Manase (naye mutweela khu basooleli ba Yozefu). 11Abidani umusooleli wa Gideoni, khukhwaama mu shikuuka sha Benyamini. 12Ahiyezeri umusooleli wa Amishadayi, khukhwaama mu shikuuka sha Dani. 13Pagieli umusooleli wa Okurani, khukhwaama mu shikuuka sha Asha. 14Eliyasafu umusooleli wa Dewueli, khukhwaama mu shikuuka sha Gadi. 15Ahira umusooleli wa Enani, khukhwaama mu shikuuka sha Nafutaali.
16Bano nibo baaraangilisi babaaroborebwa khuuraangilila bukuuka bwaabwe, atweela ni bikuuka byeene mu Isiraeli nga bayeetakho Musa ni Aroni.
17Baryo Musa ni Aroni baalaanga atweela baaraangilisi likhumi na babili bano, 18naluundi baabusanisa lituuli lye babaandu boosi ba Isiraeli khu shifukhu khweene ikhwo. Lwanyuma baababala nga babarona kamasina kaabwe, khusiintsiila khu bukuuka bwaabwe bukyeekhe ni tsiingo. Ndi luundi Musa ni Aroni baaruunga kamasiina ke basaani babaaba nga boolesa kimiiko kamakhumi kabili ni khufuurakho, 19nga Umukasya umweene n'alakila Musa khuukhola. Aryo Musa waabala babaandu mu mubiimbi kwa Sinaayi.
20-21Luruungo lwe basaani beesi baabala, khukhwaama mu buli khakuuka khakyeekhe ni tsiingo, abe babanyala khuutsya mu busoolo, nga boolesa kimiiko kamakhumi kabili ni khuufuurisawo, baaba boola bari: Khukhwaama mu shikuuka sha Rewubeni, umusooleli wa Yakobo umukhulu, boola kimikaanda kine, biikana biseesaba, ni bitoondo biraano (46,500). 22-23Khukhwaama mu shikuuka sha Simeoni, nabo boola kimikaanda kiraano, bikana syeenda, ni bitoondo bitaru (59,300). 24-25Khukhwaama mu shikuuka sha Gadi, nabo boola kimikaanda kine, biikana biraano, ni bitoondo bisesaba, ni kamakhumi karaano (45,650). 26-27Khukhwaama mu shikuuka sha Yuda, nabo boola kimikaanda musaafu, biikana bine, ni bitoondo bisesaba (74,600). 28-29Khukhwaama mu shikuuka sha Isakaari, nabo boola kimikaanda kiraano, biikana bine, ni bitoondo bine (54,400). 30-31Khukhwaama mu shikuuka sha Zebuluni, nabo boola kimikaanda kiraano, biikana musaafu, ni bitoondo bine (57,400). 32-33Khukhwaama mu shikuuka sha Efurayimu, umusooleli wa Yozefu, nabo boola kimikaanda kine, bitoondo biraano (40,500). 34-35Khukhwaama mu shikuuka sha Manase, naye umusooleli wa Yozefu, nabo boola kimikaanda kitaru, biikana bibili, ni bitoondo bibili (32,200). 36-37Khukhwaama mu shikuuka sha Benyamini, nabo boola kimikaanda kitaru, biikana biraano ni bitoondo bine (35,400). 38-39Khukhwaama mu shikuuka sha Dani, nabo boola kimikaanda kisesaba, biikana bibili, ni bitoondo musaafu (62,700). 40-41Khukhwaama mu shikuuka sha Asha, nabo boola kimikaanda kine, shiikana shitweela, ni bitoondo biraano (41,500). 42-43Khukhwaama mu shikuuka sha Nafutaali, nabo boola kimikaanda kiraano, biikana bitaru, ni bitoondo bine (53,400).
44Bano boosi nibo basaani beesi Musa ni Aroni baabala, nga bayeetebwakho ni baaraangilisi tsana be mu Isiraeli likhumi na babili, nga buli mutweela abalibwa khusiintsiila khu shikuuka sheewe. 45Baabarona kamasiina kaabwe khusiintsila khu tsiingo, nga basaani bano boosi boolesa kimiiko kamakhumi kabili ni khufuurisakho awo, abe babaanyala khuutsya khusoolana mu busoolo. 46Baryo boositsana atweela boola buukali kimyeeka kisesaba, biikana bitaru, bitoondo biraano, ni kamakhumi karaano (603,550).
47Ne luruungo luno silwayililamo babaandu khukhwaama mu shikuuka sha Levi ta. 48Lwekhuuba Umukasya alomela Musa ari: 49“Nga mubala babaandu ba Isiraeli, mukhabalilamo be mu shikuuka sha Levi ta. 50Khuurusakho ndi, ba Levi mubawatsaka kumulimo kwe khuuloolelela Lisari Likhosefu, bibiindu byamwo bye mukari, ni neebyo bibiraambisibwa mu khwiisaaya. Baakha khuuba nibo babaasuta lisari lino, ni bibilitsiilakho byoosi, buli oosi isi mutsya nga mukyeenda. Naluundi baakha khuuliloolelela buulayi, nga bamenyawo aambi khuulibotokhelela. 51Buli mbuka isi yoolela khukhwiinyukha mu shifwo, ba Levi nibo babaali ni khuufunya Lisari lino. Buli isi mubeela ni mbuka iye khuuwolakho, nibo babaakha khuulibaayuluula, balyoombekhe. Ne umuundu yeesi umunaambo ukhaakhila khuukhola kumulimo, n'atsya aambi ni Lisari lino, aakha khukhwiiribwa. 52Babaandu ba Isiraeli babaaramile boosi, bali ni khukhwiibuusila mu kaambi yaabwe, mu shifwo shishirekekhebweele muungo mwaabwe, aasi e bendela iye muungo mweene. 53Ne ba Levi bali ni khuuba nga nibo babebotokhelela Lisari lye Ndakaano, khuubona bari, mbaawo umuundu na mutweela khu ba Isiraeli uutsya aambi, shishinyala shaakila lirima ly'Omukasya lyaabamalawo ta. Baryo ba Levi nibo babaafunisikha khuuliinda Lisari lino.”
54Baryo babaandu ba Isiraeli baakhola buli shiindu shoosi sheesi Umukasya alakila Musa khuukhola.
Currently Selected:
Khuubala 1: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
