Isaaya 2
2
Luukoosi lulukhawawo ta
(Miik 4.1-3)
1Khuno nikhwo khuubonekhelwa khweesi Isaaya umusooleli wa Amozi aafuna, khuukhuwaamba khu Yuda ni khu Yerusalemu. Nga buloma buri: 2Imbuka ikhoole mu bifukhu biimaliilisi, lukiingi khweesi Lisaayilo ly'Omukasya Likhulu lyemikha, lulibeela luuleeyi khufuura tsoosi, naluundi nga nisho shiifwo shishifuura buukhulu mu shiibala shoosi. Lukiingi luno lukhenyusibwe angaaki khuufuurisa bikoongo bibiindi byoosi, ni babaandu khukhwaama mu buli shisiintsa mu shibala shoosi, bakhaakyeende beetse isi luli. 3Babaandu baakali khukhwaama mu manaambo baliitsa, lwanyuma balome bari, “Yiitsa khutsye khu lukiingi lw'Omukasya, khutsye mu ntsu ya Wele wa Yakobo. Nga khuli mu bweene umwo, alikhuleekela ifwe tsintsila tseewe, ni nafwe khuryo khulikyeendela mu mikhoosi kyeewe.” Lwekhuuba kamakaambila k'Omukasya kalirura khukhwaama mu Sayuuni, n'Ilomo yeewe iliitsa khukhwaama mu Yerusalemu. 4#Yow 3.10; Miik 4.3Umukasya umweene niye ukhaakaye kamanaambo, akhaakhale kimisaango kye babaandu be mu manaambo kamakali. Awo nio bashuuse tsiindima tsaabwe batsibasemo tsimbako tsitsiilima, ni kamafumo kaabwe bakabasemo kimilobo. Mbaawo linaambo lilikhaatsye libwakale linaambo lyashe ta, namwe bari ibewo khukhwiyika bye busoolo luundi ta.
5Inywe be lisaaye lya Yakobo, ni mwiitse khukyeendele mu buwaanga bw'Omukasya! 6Lwekhuuba Umukasya waantsukhile babaandu beewe, nga nibo babetsukhulu ba Yuda. Nga shishikila shili ndi baayitsusa mu shibala shaabwe tsisaambo tse bye khuulakula khukhwaama Ibwaamanyaanga, naluundi baayitsula bye buulosi nga ba Filisitiya ni bakhola. Naluundi baatsya nga bakhola tsikwangwaani ni babaandu banaambo. 7Shiibala shaabwe shoosi shaayitsulamwo izaabu ni feetsa; bye buyiindifu bwabwe sibyakama ta. Naluundi shiibala shaabwe shaayitsulamwo tsiŋwaaŋwa; ni kamakaali kaabwe sikabalikha ta. 8Shiibala shaabwe shaayitsulamwo biifwaani biikali naabi, babaandu baamwo bafukhama aasi besaaya bibiindu byeesi baakhola ni kamakhono kaabwe kameene. 9Aryo buli muundu akheesibwe aasi awaambisibwe tsisoni, babaandu boosi baswaale busa. Iwe ukhabeyakhila ta!
10 #
Bimb 6.15; 2 Ses 1.9 Ari nimwalaamile aasi mutsye mwibise mu lwaanda. Tsya mwibise mwiloba aasi lwekhuuba lirima ly'Omukasya lili liikali, ni shiriifwa sheewe shili she kamaani naabi. 11Awo nio babaandu be bunywaanywa bekhisibwe aasi, ni naabo babeyiingayiinga baswaale. Umukasya niye yenyene ukhaaweebwe shiriifwa she angaaki naabi khu shifukhu isho. 12Lwekhuuba Umukasya Uwe kamahe, niye uunyala byoosi, ali ni shifukhu sheesi aarobora, khweesi akhaakwiisile aasi abo boosi babeyiingayiinga, ni babaali ni kamaani. Boosi bakhaaswaale busa. 13Akhaareme kimisaala kimileeyi kimi kedali kye mu Lebanoni kikwe aasi, ni khuutubaasakho kimisaala oko kya Bashani. 14Niye akhaakwalaase tsinjiinji tsindeeyi tsoosi, atweela ni tsingoongo tseene. 15Akhaafuniaakake kiminaala kikyeyiinga mu ngaaki kyoosi, atweela ni kamatikiiyi ke kamaani keene. 16Akhaahese ni tsimeeri tsitsikhola bye busuubusi tse Tarushishi tsoosi, atweela ni kamakhoŋolo kakaabonekha buulayi koosi. 17Nashiryo khukhwiyiingayiinga khwe babaandu khukhaawewo, ni bunywaanywa bwaabwe bweene. Umukasya niye yenyene ukhaaweebwe shiriifwa she angaaki naabi khu shifukhu isho. 18Bibuumbe byoosi bikhaaweelewo ilala.
19Babaandu bakhaalaame busa batsye beebise mu lwaanda, ni mu malowo kakaali aasi mwiloba. Bakhaatsye beebise lwe khuurya buurafu bw'Omukasya, nilwe shiriifwa sheewe she kamaani, isi umweene akheenyukhile anikinise shiibala. 20Khu shifukhu khweene ukhwo, babaandu bakhaatuumake bifwaani byaabwe bye zaabu ni bye feetsa byeesi babeene bekholela khuukhwisaaya. Bakhaabituumake isi tsimbeba ni kamawukuru. 21Bakhaalaame batsye beebise mu tsifwa tse mu lwaanda, ni mu mafuluma ke mu mabaale. Bakhaakhakekho naabi nga bakana khuutitukha shiiriisa sh'Omukasya, ni shiriifwa she kamaani keewe, lweesi akhenyukhile khuunikinisa shiibala.
22Mukheelayo luundi khukhwiyikina umuundu buundu busa, uuli busa ni kumuukha kweesi aheelela mu moolu ta. Niye anyala waayeeta shiina?
Lumasaaba Catholic Bible © The Bible Society of Uganda, 2017.