Hoseya 2
2
1Khu shifukhu isho, mukhalaange babaandaayeenywe muri, “Babaandu ba Wele.” Ni baakooko beenywe mubalaange muri, “Bakanwa b'Omukasya.”
Gomeri ukhali umwiyikinwa niyo Isiraeli
2Ari inywe nimwikiitse maayi weenywe, ni mumwiikiitse, lwekhuuba ari s'ashiili umukyelama wase ta, ni nase sishiili umuseetsa weewe ta. Ni mumuboolele erusekho bwamalaaya bweewe mu moni mweewe, naluundi erusekho buuyeyani bweewe bubuukila wokyesa ibulafu kamafuungu keewe. 3Nga waakhukhola aryo ta, kane imwabulemo tsingubo tseewe tsoosi, afwaane busa nga khu shifukhu khweesi aasaalikhilakho. Kane imulekhe afwaane busa nga kumubiimbi, imwikyelise afwaane busa nga liiloba lilyoomu lilikhalimwo kameetsi ta, lwanyuma kane afwe lwe buulesa buukali. 4Ni isi babaana beewe, ise sikhaabokyesanisekho shiisa shoosi ta, lwekhuuba nibo bali babaana be bwamalaaya. 5Lwekhuuba maayi waabwe ali malaaya ukhawaambikhakho tsisoni na khafwiiti khari ta, aryo aafuna shisoombo musaambo iye kamaŋaanyu. Lwekhuuba umweene elomela ari, “Kane indure ibulafu, inoondekhane ni baakanwa be bulafu, intsye niikulise samweene, inyale khuufuna biilyo ni kameetsi, ni khuufunayo bye khuukwaara bye bubwooya ni tsingubo tsitsimelamela, ni khukhwifunilayo kamafura ke khukhwiyakha ni bye khuunywa.”
6Ni nashiryo ise ndi khuutsya khuumubowela mu lumako lwe kamawa. Kane ifuundise tsintsila tseewe tsoosi nga inaambisa litikiiyi, nio alekhe khuunyalisa khukyeendaanaka busa aryo. 7Alikhakakho naabi khuuloondelela baakanwa beewe, ne singene anyalise khuubanyoola ta. Kane akhakekho khuubaweentsa, ne alekhe khuubabona ta. Nio lwanyuma elomele umweene ari, “Kane niileyo w'omuseetsa wase isi nanyoowela, lwekhuuba ibweene iyo, naba buulayikho khuufuurisa nga niindi ari.”
8Niye ashiili khuushiimanya ari, yaba ise niye uwamuwa biilyo bibuluungule, ni viini ishaakha, ni kamafura ke kuusaala ku olivu ta; ise niye uwamuwa ifeetsa, ni zaabu, byeesi aayila waaraambisa mu khwiisaaya Bayaali. 9Nashiryo, ise kane nikoboseleyo biilyo byase bibuluungule, ni viini yase byeesi namuwa busa khu mbuka iye likyesa. Naluundi kane imubukule bikwaaro tsana bye bubwooya ni bibimelamela, byeesi namuwa khukhwibiimbakho. 10Indyo ikhaamwabulakemwo biikwaaro byoosi nga babaandu babona, nga bakanwa beewe boosi baaloleleele. Mbaawo na mutweela khu nibo ulinyalisa khuumurusa mu bunyala bwase ta. 11Ise ndibonela ilala ndi bye kamayiiya keewe ka buli mwiiko kaakama, ni bye khukhwikhoyela kumweesi kumushaakha, ni bifukhu bya Sabato ni bye kamayiiya kakaandi bibiitsya nga biloondekhana nabyo byaakama. 12Indyoonakisaka kimikuunda kyeewe kye kimisabibu, ni kimifigi kyeene, nga nibyo bibiindu byeesi ekhala ebuyililakho ari bakanwa beewe baamuwa. Ise ndikhola kimikuunda kyeewe kikyele bitsakha busa, indekhuule tsisolo tse mwirome tsilye kamatuunda kaamwo koosi. 13Indimuwa shitaambiso lwe bifukhu ibyo byoosi byeesi aawaanatsakilayo tsisaayilo isi bifwaani bya Bayaali; khu mbuka iyo yoosi isi aakwaaratsakila bubuuma bweewe bwe khu maru, ni bya kadaali bibiindi nio waatsya nga aloondelela baakanwa beewe, ne waaba nga waantsibiliile ise. Bino byoosi Umukasya umweene niye ubiloma.
14Ni nashiryo indi khuutsya khuumuwooya kumuluundi kukuukhola khabili. Indimuyila iyo mu mubiimbi indi luundi, inganikhekho ni naye biilomo bye khuukana. 15#Yos 7.24-26Nga khuli ibweeneyo, ise ndimukobosela kimikuunda kyeewe kyeesi aaba nakyo, nikyelise Liitila lye Kumutaambo khuuba kumulyaango kwe khuusuubila. Ibweeneyo alirakikha khukhweemba kimyeenya kyeesi eembatsaka nga ashiili musooleeli, nga ni eembatsaka khu mbuka isi aarurira khukhwaama mu Misiri. 16Nga shifukhu isho sheetsile khwoola, alilayo luundi khukhuunaanga ari, “Umuseetsa wase”; s'aliilayo luundi anaange busa uri, “Bayaali wase” ta. 17Ise samweene indisaangulaka kamasiina ke ba Bayaali khukhwaama mu khanwa mweewe. Niye s'aliilayo luundi khuukakanikhakho ta. 18Khu shifukhu isho, indikhola indakaano ni tsisolo tse mwirome, atweela ni binywiinywi bye mu ngaaki, ni bisolo bibyalaamila aasi khwiloba, khulwoowo. Ise samweene ikhaamalilewo ilala buyiingo, ni tsiindima tsoosi, atweela ni busoolo khukhwaama khu shibala, nio babaandu boosi banyale khuumenya mu lukoosi!
19Ikhaakhuselele iwe, ube uwase biilo ni biilo,
indyo ikhwookesanise buukwalaafu ni bwa ŋali,
ni khuutubakho khuukana khukhuukhawawo ta, ni bubweela.
20Ise samweene ikhaabe uwaŋali is'uli,
ikhwikyelise khuuba uwase umweene, nio lwanyuma lwa byoosi
iwe umanye uri ise ndi Umukasya.
21Umukasya waarumbula ari,
“Khu shifukhu isho, ise ikhaakhukobolemu,
ikheelemwo likulu nga likana khuufuna kamafuumbi.
Ni likulu lyeene nalyo liliilamwo shiibala nga lyakaanisa ifula.
22Ni shibala nasho shinyale khukhwiilamwo khuulila khwe biilime bibulungule,
ni kimisabibu, atweela ni kimisaala kimifigi.
Ni biilime bino nabyo biililemwo atweela biri, ‘Yezureeli’.
23 #
Roma 9.25; 1 Pet 2.10 Ise samweene ikhebyaalile babaandu baase mu shibala;
Ikhookesanise khuukana khwase isi uyo abe isi nalaanga ndi,
‘S'ali Umukanwa wase ta’.
Ikhaalomele abo abe isi balaanga bari, ‘Sibali babaandu baase ta’ khuuba ‘Babaandu baase,’
ni nabo bakhaashuukhe balome bari, ‘Iwe uli Wele weefwe.’ ”
Currently Selected:
Hoseya 2: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.